Briefwisseling van Hugo Grotius. Deel 2

417
custoditur. Tuos liberos sospites Paduam advenisse tibi gratulor, optoque ut semper
de illis quae voto meliora sunt tibi nuntientur. Vale, Vir Amplissime, cum tua, a me
et mea. 9 Ianuarii 1625.
939. 1625 Jan. 17. Aan Jan de Groot 1
.
Gratias tibi habeo, mi Pater, quod mei meaeque valetudinis tantam geris curam.
Etiam quod de esculentis sperare nos iubes ventura in tempore pergratum est.
Vossius fecit pro summo suo in me amore, quod negotium illud in se suscepit: nostra
interest ut id absolvatur. Editio libri nostri de iure belli ac pacis 2 tarde procedit. Rex
Britanniae, quanquam diserte Mansfeldio imperaverat nequid hostile in Hispanum
moliretur, adductus tamen eo est a Galliae Legatis, ut passurus sit a Mansfeldio iter
per Belgium Hispaniense in Germaniam posci et, si negetur, sumi, nimirum quia id
iuris est etiam in solo non hostili. Bredam Spinola Isabellae affirmat intra hunc
mensem captam iri. Idem Manlianae severitatis 3 exemplum edidit: nam cum edixisset,
ne qui suorum singulari inter se certamine dimicarent, filium ex iurgiis ad pugnam
cum altero iuvene prolapsum damnavit capitis; et cum eos evasisset quibus in
custodiam erat datus, eos ipsos sex numero suspendi fecit; filium in Gallias profugum
dedi sibi postulat; sed eum Rex, misertus iuvenis magnanimi, tuendum suscepit.
Rumor de Insula Rea a Subizio 4 occupata vanus apparet, atque inde ortus quod ille
cum navibus aliquot in mari vagans ibi prandium sumsisset nullo ulterius conatu;
tamen non frustra creditur se fluctibus committere, sed moliri aliquid; et iam a
Vandomio 5 in Armorico littore duae naves dicuntur deprehensae et centum in illis
homines, quibus consilium fuerit Castellum Blavetum et arcem Nannetensem sui
iuris facere. Intra dies paucos quid horum sit rescibitur. Interim tibi, matri, fratri, sorori
eorumque coniugibus et caeteris nostris ego et uxor cuncta salutaria ex animo
optamus. 17 Ian. 1625.
Dubletus 6 , curruum curator, qui cum literis publicis ad Legatum nostrum missus
erat, cum domicilium Legati et ipsum ignoraret, ambiguitate vocabuli delatus est ad
Legatum Belgicum, sed Bruxellensem, eique coepit de rebus non exiguis loqui. Sed
errore deprehenso abiit, et ad verum Legatum venit, atque ab eo ad hospitium
invitatus iussit eo deferri sarcinas: et coram iis qui deferebant aperuit, ita ut et
appareret pecuniam ipsi esse. Cum velut negotium quoddam curaturus exiisset,
nunquam comparuit et adhuc desideratur. Qui sarcinas detulerant capti ita se purgant,
ut innocentes videantur. Itaque alii avectum in Hispaniam, alii dolore erroris a se
commissi necem sibi intulisse iacto in amnem corpore suspicantur.
Tuus tibi obedientissimus filius
H. Grotius.
1 Gedrukt Epistolae p. 779.
2 Zie p. 254 n. 14.
3 T. Manlius Torquatus liet als consul zijn zoon ter dood brengen wegens insubordinatie; Livius
VIII, 7.
4 De hertog van Soubize.
5 De hertog van Vendôme.
6 Over deze zonderlinge vergissing van den Wagenmeester François Doublet, waarover in de
volgende brieven telkens sprake is, zie Rogge, Brieven van Nic. van Reigersberch p. 14 n.
5 en 6.
Hugo de Groot, Briefwisseling van Hugo Grotius. Deel 2