Briefwisseling van Hugo Grotius. Deel 2

416
Romanensis religionis Galli aut Angli, assentiente Britanniae Rege. Nihil tentabitur
quo nova nupta adducatur ad mutandam religionem; idque Rex et maritus sancte
iurabunt. Nova nupta successiones omnes repudiat; dotem habet octies centena
millia scutatorum, antipherna octodecim millia librarum sterlingarum, et domum
Regiam, si quando vidua in Anglia manere elegerit. Pro mundo accipiet a socero
quod valeat quinquaginta millia scutatorum. Caetera minoris sunt momenti. Creditur
non ante Pascha hinc abitura. Rumor hic spargitur aliquid moveri a Transligerinis
Protestantibus: quod si verum, accersent illi in se indignationem bonorum omnium,
ut obstantes egregiis Regis conatibus. Si quid apud vos scitu dignum geratur moneri
eius aveo, et patri, matri, tibi tuaeque, sorori et eius marito, amicisque omnibus
felicem annum hunc opto, cuius tertio die haec scribebam. Lutetiae 3 Ianuarii 1625.
Tuus tui amantissimus Frater
H. Grotius.
938. 1625 Jan. 9. Aan B. Aubéry du Maurier 1
.
Vir Amplissime.
Distuli literis, quas 22 Decembris dederas, rescribere, dum certi aliquid super his,
de quibus sciscitatus fueras, ex patria nostra exspecto: quod quia advenit tardius,
maxime eo, quod hi, quorum opera maxime utor, longius nunc absunt ab imperii
sede, nolui interim desidis amici speciem praebere. Ego Dei ope recte valeo, neque
peccaturum me putem in tua commoda, si valetudinem tibi qualis nunc quidem mea
est, exoptem, nisi quod ipsam quoque illam εὐεξίαν periculo vacare medici negant;
forte ut nusquam data securitate ipsis obnoxii vivamus. Spinola ad Bredam non ea
sentit incommoda, quae ex hieme et pluvia sperabantur. Bis iam nostri tentarunt
per stagnantia camporum naviculas inferre oppido, nova primum, deinde plena
Luna; sed irritus fuit conatus, aquis non satis crescentibus. Dicitur tamen manere
eadem spes, aut superfuso adiacentibus Marca amne, aut perfosso aggere, qua
humillima pars est hostilium castrorum. Milites aliquammulti, quibus pax inter Danum
et Sueonem inita missionem dedit, Mansfeldio militaturi advenerunt, ad duo millia
et plures exspectantur. His an Danus stipendium sit daturus incertum est. Creditur
nostris minus male velle, ex quo Princeps Mauritius summae rerum potitus aut est,
aut putatur. Nam privatam eius amicitiam publicae nostrorum ante habere se satis
iampridem praetulit. Quod si et in nostros maneret, qui fuit, tamen mirandum non
esset, si eum fortuna moneret filiae sororis suae. Mansfeldio ex Gallia bis mille
equites, ex Britannia duodecies mille pedites adventare, regum duorum pecunia
alendos, pro certo habetur. Sed Rex Britannus legem Mansfeldio addidit, ne quid
in Hispanum eiusve terras hostile inciperet. Alias quoque copias ei per Germaniam
colligit Halberstadiensis 2 . Hae omnes non exiguum metum Hispanis incutiunt, qui,
rarum in Belgio, nobilitatem omnem equis militare iusserunt: et ex Germania
acceperunt tres millenarias cohortes aut amplius. Limes adversus Galliam sollicite
1 Gedrukt Epistolae p. 73.
2 Zie p. 305 n. 10.
Hugo de Groot, Briefwisseling van Hugo Grotius. Deel 2