Briefwisseling van Hugo Grotius. Deel 2

319
Th. Canteri quam si meus ille partus esset: πάντα γὰρ τὰ ϰοινὰ ϕίλων 1 aiunt. Meae
fidei et candori optimus ille vir patrio et ipse exsulans solo illa credidit. Amavit me
ille nondum visum, nullo meo merito, ego vicissim mutuum praestiti redamando, ac
teneris visceribus calamitati senis compatiendo. Doleo vero non esse vobis omnia
restituta, quae fasciculo satis magno inclusa Roverio in nundinas per bibliopolas
nostros miseram, suasu Danielis Heinsii vestri. Erant in eo fasciculo et tres tomuli
Latino carmine redditorum, tragoediae aliquot Euripidis ab Erasmo, Buchanano, et
Petreio Tiara Frisio medico. Item Homeri Ilias Latino carmine per Eobanum Hessum
cum numeris ad oram, et Odyssea per Simonem Lemnium, opinor. Verum quae
deesse scribis, si Nemauso haberi non poterunt, recuperari fragmenta Aeschyli et
Sophoclis possunt describenda ex tribus tragicis a Ioanne Meursio an. 1619 Lugduni
editis. Pauca sane desiderabuntur praeter laborem describendi. Nam Euripidis
pleraque, nisi apud illum verti solent medicum, sunt in Stobaei γνώμαις, quas tute
feliciter reddidisti carmine, quod suo quoque addi loco ut iubeas per ego te hanc
dexteram rogo atque obtestor. Obstetricari itaque ne graveris si typographum isthic
commodum reperies in tam opulenta et augusta republica urbeque Lutetiae. Hic
enim a Graecis typographi nostri nimium quantum abhorrent. Menandri, Diphili et
Philemonis, si amissa erint λείψανα, poterunt veluti naufragii tabulae colligi, si erit
usus, e Gulielmi Morelii Comicorum collectione fragmentorum Parisiis edita 2 ; quae
ad quinquaginta comicorum reliquias Iacob. Hertelius collegit an. 1560 ediditque
Basileae 3 . Hic per sententias digessit; ille ut quidque in manus venerat, ita digesserat:
neuter tamen auctores de more adiecit. Canterus vero per comoedias et tragoedias
singula ἀποσπάσματα bene digesserat, brevibus adiectis post singula scholiis, unde
desumpta fragmenta essent, vel qui eadem, ut fit saepius, laudassent. Ego vero de
meo nihil addendum duxi, cum quod ad Allobroges irent, quo nomen non mitto
meum, tum quia iusserat ὁ μαϰαρίτης in limine tantum affigi ‘Ex bibliotheca Theo.
Canteri’. Quod vero distrahi posse negarent, ut est ignavum hoc saeculum, nisi
Latina apponerentur, curavi Latina appendi; sed nunc malim tuam adiici metricam
interpretationem. Accedunt et ex Animadversis Casauboni summi viri in Athenaeum 4
quaedam. Putabam equidem fidi me amici functum officio, quod mihi iam sito
praestari exoptem. Quare, magne Groti, per ego te hanc dexteram iterum rogo
obtestorque, obstetricari ne una gravere si, ut spero, typographum isthic reperies
in augusta illa foetaque viris doctis urbe Lutetia, allaborante et doctissimo Salmasio,
quem saluto. Tribuite hoc boni viri manibus, patria exsulantis et in exsilio mortui
Leovardio. Vale in Domino nosque amare ne desine. Salutem tibi nunciari iusseram
per Iustum Rycquium Canonicum Gandavensem et poetam, Parisiis Romam
cogitantem. Dionysio Petavio et Iac. Syrmondo doctissimis sociis isthic, defuncto
iam Frontone Ducaeo, utere, si alloquium in malis est opus. Antverpiae, XVIII
Novembris CIƆIƆCXXIII.
Adres: Doctissmo viro Hugoni Grotio Iurisconsulto. En la rue de S. Jacques, Buon,
son logis.
1 Eurip., Orest. 725
2 Ex veterum Comicorum fabulis, quae integrae non extant, sententiae. Paris 1553.
3 Vetustissimorum sapient, comicorum L sententiae. Basilieae 1560.
4 Athenaeus, Deipnosophistae. Adiectae sunt Casauboni Animadversionum ll. XV. Heidelb.
1598.
Hugo de Groot, Briefwisseling van Hugo Grotius. Deel 2