Briefwisseling van Hugo Grotius. Deel 2

298
841. 1623 Juni 27. Aan P. du Puy 1
.
Quanquam si satis me nosti, Vir Clarissime, nescire non potes vigere apud me tui
tuorumque officiorum memoriam, tamen testatum hoc et hac epistola volui, cuius
aliud argumentum non habeo. Vivo enim rerum omnium, tam quae apud nos, quam
quae apud vos geruntur, ignarus; et hanc ipsam ignorantiam in fructu rusticationis
meae deputo. Si, quid agam, scire vis: alternis et studeo et deambulo, imo studeo
etiam deambulando. Nec parum me recreat popularium meorum consuetudo 2 , quae
efficit, ne patriam desiderem. Interim et ad eos, qui Lutetiae bene mihi volunt,
cogitatione deferor, quos inter nisi te habeam principem, valde in te sim iniurius.
Neque Thuanus 3 mihi excidit, cuius quotidie libris utor; nescio an non nimis
familiariter. Si est in eius Bibliotheca Lusitanica Conestagii Historia 4 , velim eam
seponi; mittam qui petat. Occurrunt mihi saepe et Rigaltius et Salmasius et
apertissimum ingenium Christiani 5 . Quibus omnibus, praesertim vero tibi et optimo
fratri 6 , valetudinem precamur tam secundam, quam nos eam hucusque experimur.
Balagniaci. 27 Iunii, 1623.
842. 1623 Juli 12. Aan Willem de Groot 7
.
Binis simul, mi frater, literis tuis respondeo et gratias ago maximas pro ista diligentia
quam tanto maioris faciendam intelligo, quod non nescio quot te hoc tempore negotia
distrahant. Respondissem celerius iis, quas Iunii XXVI dederas, sed recepi eas
serius, quia Balagniaco Lutetiam abieram, unde huc iam redii, simulque tuas III Iulii
scriptas accepi. Primum igitur rogo pergas nos coniugi tuae insinuare, ut quae inter
nos semper fuit caritas ad illam quoque et si Deus dederit liberos propagetur. Qua
de causa quod nostri inter gaudia vestra memores estis maxime gaudeo. De Cysio 8
rectius vos edoctos dulce mihi est, qui popularibus omnibus bene volo. Si quid de
legatione Gallica 9 ne praetermitte ad nos scribere et siquid aliud quod ad pub(lic)am
privatamve causam pertineat. Stobaeum utinam acceperitis: de quo iudicium non
male nobis volentium - contemnendi enim sunt alii - intelligere aveo. Sententias
reorum Lugdunensium 10 legi: miror in republica quae ad popularitatem facta est non
placere nisi rigidissimas sententias. De Bonteballio 11 siquid expressius intelligas fac
sciam; et quomodo dimissus sit Kenenburgius 12 , absolute an ita ut repeti iudicium
possit; et siquid his simile.
1 o
Gedrukt Epistolae p. 70. Antwoord op n . 840.
2 Zie p. 295 n. 4.
3 Zie p. 297 n. 6.
4 Jeron. Conestaggio, Dell' unione del regno di Portogallo alla corona di Castiglia. 1585.
5 Chrestien, ook in de brieven van Maria genoemd; zie p. 213 n. 2.
6 Jacques du Puy.
7 Hs. U.B. Leiden, cod. B.P.L. 246. Gedrukt Epistolae p. 771.
8 Zie p. 296 n. 6.
9 Zie p. 296 n. 7.
10 Knuttel Pamflet 3460.
11 Klaas Michielsz. Bontebal, gewezen secretaris van Zevenhuizen, wegens deelneming aan
de samenzwering 3 Juli 1623 te Rotterdam geëxecuteerd; Pfl. Knuttel 3461.
12 Otto van Zevender, heer van Kenenburg, zwager van Oldenbarnevelt.
Hugo de Groot, Briefwisseling van Hugo Grotius. Deel 2