Briefwisseling van Hugo Grotius. Deel 2

231
773. 1622 Juli 22. Aan B. Aubéry du Maurier 1
.
Vir Illustrissime.
Audio Hoofdium 2 , filium viri optimi consularis Amstelodamensis, cum in patriam
rediret, captum, nescio quo obtentu, sed eo maxime, quantum coniicere est,
proposito, ut literae, quas a me ad amicos ferebat, deprehenderentur. Invenient in
iis nihil quod accusari possit. Privata curo, negotiis eorum publicis me non admisceo.
Videntur metuere, qui haec agunt, ne prioribus iniuriis non satis me irritaverint. Ego
his omnibus opponam solidam veritatem, quae Latine intra dies paucos prodibit 3 ,
cum Regis privilegio.
Tuum huc adventum valde expeto. Res Protestantium non optimo sunt loco.
Desdiguierius ista senectute mutat religionis professionem, dignitatem aucturus,
non famam, cuius pridem satis negligens fuit. De Mansfeldio 4 magnus hic fuit metus:
sed nunc is elanguet, credito in Belgium detonituram nubem. Pacem sperant hic
multi, sed cum damno talis, qualem hactenus Protestantes habuerunt, securitatis:
cuius loco lex illis perpetua offertur pro libertate religionis, sancienda in pleno
Ordinum Galliae conventu, signanda a Rege et Principibus agnatis. Vale, Vir
Illustrissime, et nos ama. 22 Iulii, 1622.
Rogo literas has Iannini ad Pericardum 5 de Aldegondiano negotio transmittas, et
tua commendatione rem iuves. Scribit senex ita, ut non possit melius, et certum se
dicit de Regis voluntate, quem ipsum fuisse scripturum, si ad urbem fuisset.
774. 1622 Juli 27. Van Hendrik Hooft 6
.
Vir Clarissime.
Relictis Parisiis prospero itinere Antverpiam octavo die attigi, inde postero inimico
vento navigavi, post multum cum fluctibus conflictum in eminentiorem iuxta
propugnaculum Lillo ripam, qua aggestis molibus in flumen protenditur, expositus
quendam ex naucleris satis ut mihi videbatur capacem delegi qui meas uti imperiti
rerum locique res gereret, ac veniam - quam non difficulter impetraturum credebam
- mihi meaeque asportandae cistae maturandi causa peteret, simulque de
sollemnibus in subscribendis forte literis a Sua Excell. concessis observandis, nec
non pecuniis numerandis moneret, operiens interea dum reverteretur; nec diu haesit
quin ingratam properanti moram renuntiavit, velle nimirum praefectum propugnaculo 7
ut me ipsi sisterem; confestim pergo eodem hoc ad aedes praefecti ducente, ubi
plus quam vulgari congratulatione et nimia familiaris officii specie exceptus
requiescere paululum sollicitabar. Suspecta erant omnia nimia, et quod exolvere
posse desperarem molesta. Iubebat vina promerent,
1 Gedrukt Epistolae p. 68.
2 Zie p. 230 n. 2.
3 Apologeticus, zie p. 76 n. 1.
4 Zie p. 144 n. 6.
5 Pericardus is Pellicart, de Fransche gezant te Brussel; zie verder p. 209 n. 9 en 227 n. 6.
6 Hs. U.B. Amsterdam, cod. 11 M. Voor den inhoud zie p. 230 n. 2.
7 De commandeur Calcar; Rogge, Bijdr. Vaderl. Gesch. 3 e R. VII (1893) p. 110.
Hugo de Groot, Briefwisseling van Hugo Grotius. Deel 2