1 C. Verspreide literaire teksten van Jacob Revius ... - Enny de Bruijn

Ne sperne exiguam, Coclaee, Barrum;
Non est exigua aut pusilla Barrus,
Cui Vignerius ille scriptor ingens,
Cui denique doctus ille Popo
Vitae exordia luminisque debent;
Non est exigua aut pusilla Barrus,
Quae, Coclaee, tuo superbit ortu,
Et te, flos hominum eruditiorum,
Et te, flos hominum eloquentiorum,
Alumnum ante alios beata jactat;
Non est exigua aut pusilla Barrus,
Quae terris peperit Deam potentem,
Illam Pancharidem, Deam stupendam,
Cui componere nulla se Dearum
Ausit eximiae decore formae.
Quid tu jam patriam, Coclaee, Barrum
Ausis despicere & putare parvi?
Possunt divitiis tuam, Coclaee,
Urbes innumerae praeire Barrum:
Barrum nulla tuam praeire possit
Cultis ingeniis & eruditis,
Majorisque Deae potente formâ.
52