Aantekeningen van Arnoldus Buchelius over zijn ... - gahetNA

huyshouden. Ende sal andere ordre werden gestelt. Neefken bracht een brief van sijn vader
aen neef Van Wijckersloot, waerinne hij ons neffens meer vrinden dede groeten. Ende screef
dat sijn soon Henrick voor assistent om de noorden gevaren was. Dat hij niet langer bij hem
en diende, maer wat moste besuecken, dat hij redelicken in de spraecken was ervaren.
Sommige schepen tehuys comende, brachten een goet deel suickerkisten ende sijn hier over
de 700 gearriveert. Sijn noch
eenighe suyckeren achteren, daerbij waren noch ossenhuden, olifantstanden ende hardhout.
Den aenslach op Pariba was misluct, met verlies van veel van den onsen.
Uuyt Nieu-Nederlant ofte de Virginies, comen etlicke dusent beverenvellen ende vellen van
otters.
Jan van Voerst Cornelissoon, hebbende al de somer in Engelant met het schip, uuyt Nieu-
Nederlant ofte Virginea comende, gearresteert geweest, is in junio overgecomen. Bracht een
brief van sijn vader ende 2 aerntsclauwen met een zeespinne. Clusius cancrum marinum
vocavit, qualem ipse in suis exoticis expressit, a me sibi, a Wolfswinckel exoratum, missum.
Hij seyde daer op de strant veel daer te lopen van verscheyde groote, oeck geheel cleyn.
De officieren aldaer qualicken connende overeen comen, sijn alle weder gecomen, ende sal
daer ander ordre gemaect werden. Dat de nieuwe colonie, beeter gevordert ende onderhouden,
mogen aenwassen, die anders door haer discordie gants souden teniet lopen.
Alsoo de scepen seer lange buyten de gewoonen tijt achterbleven, hebben de coloniers aldaer
groot gebreck geleden van coorn ende andere nootwaren, die sij uuyt Hollant verwachten.
[00-5-1633]
In mayo 1633. Sijn 2 scepen van Guinea gecomen voor de West-Indische Compaignie, wel
voorsien met gout, elephantstanden ende grein.
Dese Compaignie solliciteert seer neerstich aen de Generaliteit, omme te becomen de
beloofde subsidiën, daer se qualicken toe connen geraecken.
Wert oeck verwacht van Pharnabuco den oversten Weerdenburch.
Tijdinge, dat Cornelis van Voorst, hebbende last van sijne meester … Pauw, van niemants
gebiet ofte heerschappie over sijne colonie te admitteren. Ende alsoe den nieuwen
(directeur), 128 gesonden van de West-Indische Compaignie, hadde de souverainiteyt ende
gerechticheden over de coloniën te bewaren, die daerover eenige placaten wilden in de
colonie Pauw doen publiceren ende affigeren. Soo hadde Van Voorst sich daertegens gestelt,
volgende sijnen last, ende alsulcke vercondighe verhindert, die, omme een corporaelschap
oversendende, Van Voorst in hechtenisse heeft genomen. Die sich met den last van sijnen
meester wilde defenderen. Hierover waren de beinthebberen besich, omme desen twist
terneder te leggen, waertoe Pauw oorsaecke hadde gegeven.
[00-6-1633]
Dese dagen in junio 1633. Hebben onse ende der vianden gecommitteerden in Den Haghe
vergadert over de handelinge van trêves, heftige discoursen gehadt over de West-Indische
saecken. Praesenteerende den coninc van Hispaniën de Compaignie een milioen ende acht
tonnen goudts, mits dat se haere handelinge aldaer soude afstaen. Sijn oeck eenighe van de
bewinthebberen bij de Staten in Den Haghe ontboden, op seeckere voorslagen, doch hebben
daerop niet connen resolveren, sonder communicatie met haere princepalen.
128 In de marge.
147