TOTALE KNIEVERVANGING - orthoclinic.co.za

WAT IS 'N TOTALE KNIEVERVANGING?
In u knie het die normale gewrigsoppervlakte
heeltemal weggeslyt; u loop dus been op been. Met
'n knievervanging word hierdie oppervlaktes met 'n
kunsmateriaal vervang; by die bobeen met 'n metaal,
gewoonlik chroomkobalt, en by die onderbeen en
die knieskyf met 'n tipe plastiek, poliëtileen. Hierdie
oppervlakke is ongeveer 8 mm dik en met die
vervanging word dieselfde hoeveelheid been vanaf
die bobeen, die onderbeen en die knieskyf verwyder.
Die prosteses word dan aan die been vasgegom met
'n spesiale tipe gom. Dit is belangrik om te besef dat
slegs 8 mm van die verslete gewrigsoppervlaktes
vervang word; u basiese knie word behou. Eintlik kan
ons sê die knie word "versool". Die lewensduur van so
'n vervangde gewrig is ongeveer 15-20 jaar en dit is
wel moontlik om, as daar probleme sou ontstaan,
die prosedure te herhaal. Die prostese kan selfs
langer as 20 jaar hou.
INDIKASIES VIR 'N KNIEVERVANGING
Die enigste rede om die knie te vervang, is pyn en
verlies aan funksie. U as die pasiënt is in die beste
posisie om die mate van pyn en funksieverlies te
bepaal. In 'n knie waarvan die oppervlakke weggeslyt
het, sou 'n mens verwag dat die ongemak stadig met
tyd sal vererger. Indien die ongemak in u knie u
lewenskwaliteit beïnvloed, moet 'n vervanging
oorweeg word. So 'n prosedure is egter
nooit dringend nie.
DIE PROSTESE
Ons sal een van 3 verskillende tipes knie-prosteses
gebruik om u knie te vervang. Al drie hierdie prosteses
word internasionaal gebruik en is van die beste
prosteses beskikbaar ter wêreld.
MOONTLIKE KOMPLIKASIES
Soos met alle chirurgie is daar ongelukkig ook met
'n knievervanging die moontlikheid van probleme.
Algemene komplikasies, veral kardiovaskulêr,
is 'n klein moontlikheid. Wat die knie self betref kan
swelling en beperkte bewegingsomvang voorkom,
maar dit is gewoonlik tydelik en klaar vanself op.
Infeksie is die komplikasie wat ons die meeste
bekommer; die voorkoms van hierdie komplikasie in
ons praktyk is minder as 0,3%. Diepveentrombose
is 'n ander moontlike komplikasie.
TOTALE KNIEVERVANGING
PRE-OPERATIEF
Om die moontlikheid van komplikasies tot 'n minimum
te beperk, reël ons met 'n patoloog om 'n aantal
spesiale ondersoeke te doen, spesifiek om die klein
moontlikheid uit te sluit dat daar 'n laegraadse
onderliggende infeksie êrens in die liggaam is.
Gewoonlik sou ons reël dat die narkotiseur u twee
weke pre-operatief ondersoek en indien hy dit nodig
ag, moontlik ‘n internis or kardioloog.
MEDIKASIE
Anti-inflammatoriese middels soos Voltaren, Brufen,
ens. verhoog die risiko van postoperatiewe bloeding.
Dit is dus belangrik dat u die gebruik van hierdie
middels vir ten minste 3 dae voor die operasie staak.
Plaatjie-inhibeerders soos Disprin, Plavix, ens. moet
10 dae voor die operasie gestaak word. Indien u
Warfarin gebruik, moet u dit 4 dae voor die
operasie staak en met heparien vervang. Vroue op
hormoonterapie moet dit verkieslik vir 'n week
voor en 2 weke na die operasie nie gebruik nie.
Indien u gereeld 'n drankie gebruik, wil ons graag hê
dat u in die hospitaal daarmee voortgaan; dit sal u
herstel bespoedig. Die hospitaal verskaf egter nie
drank nie; bring asseblief u eie.
Beplan u tuiskoms. Dink daaraan
dat u nie sal kan hurk nie en met
'n kruk sal moet stap. U sal kan
stort, maar sal vir ses weke nie
kan bad nie. Alhoewel u met
ontslag uit die hospitaal onafhanklik
sal wees, is dit verkieslik
dat u nie in die eerste paar weke
alleen bly nie.
DIE OPERASIE
U word om 14:00 die dag voor
die operasie tot die hospitaal toegelaat. U sal 'n
RT-skandering van die knie
ondergaan wat ons benodig vir die beplanning van
die prosedure. Die aand voor die operasie begin ons
u behandel teen die moontlikheid van 'n trombose.
Ons maak gebruik van heparien wat onder die vel
ingespuit word en hou gewoonlik met hierdie terapie
aan vir ongeveer een week na ontslag. PAGE 1 / 2

Die operasie word meestal onder 'n spinale narkose
gedoen. Dit beteken dat u in die rug ingespuit word
wat alle gevoel in die bene wegneem. Bykomend
gee ons gewoonlik 'n baie ligte narkose sodat u nie
bewus is van al die bedrywighede in die teater nie.
Na die operasie sal die narkotiseur ook 'n femorale
senuweeblok uitvoer. Dit sal help met goeie
pynbeheer postoperatief, maar sal veroorsaak dat
u kwadriseps-spier vir ongeveer 24 - 36 uur verlam
sal wees. Dit beteken dat u nie sal kan loop tot en
met die tweede dag na die operasie nie.
'n Enkel-knievervanging duur ongeveer 1 uur terwyl
'n bilaterale vervanging ongeveer 1½ uur duur.
Vir die eerste 24 uur na die operasie sal u in 'n
hoësorgeenheid verpleeg word. U behoort gemaklik
te voel en baie min pyn te verduur.
POSTOPERATIEF
Die eerste dag na die operasie sal u 'n binneaarse
drup aan die arm hê waardeur ons antibiotika en 'n
pynstiller toedien. Daar sal ook dreineringsbuise in
die knie wees. Ons maak gebruik van medikasie wat
bloeding baie verminder en wat 'n bloedoortapping
onwaarskynlik maak na 'n enkel-knievervanging.
Die kans vir 'n bloedoortapping na 'n bilaterale
knievervanging is ongeveer 5%. Die binneaarse
drip en dreineringsbuise word gewoonlik na die
eerste dag verwyder.
Die fisioterapeut sal u daagliks besoek vanaf die dag
na die operasie. Die rehabilitasie-oefeninge lyk dalk
eenvoudig en maklik, maar dit is van die uiterste
belang dat u dit gereeld en op die regte manier doen
ten einde vinnige en volledige funksie te herwin. Vanaf
die tweede dag na die operasie kan u begin stap en elke
dag hierna behoort u in staat te wees om beter te loop.
Tipies sal u vir 'n enkel-knievervanging ongeveer
4 - 5 dae in die hospitaal wees en vir 'n bilaterale
vervanging ongeveer 5 - 7 dae.
EERSTE PAAR WEKE TUIS
U sal 'n voorraad medisyne ontvang by ontslag uit
die hospitaal. Dit sluit in pynmedikasie, antibiotika
en middels om bloedklonte te voorkom. Vir die eerste
4 weke verkies ons dat u met een of twee krukke stap
alhoewel u volle gewig op die geopereerde bene mag
plaas. Teen die tyd dat u ontslaan word, behoort u in
staat te wees om u self goed te kan help. U mag stort
vanaf die derde dag na die operasie. Die steke is
oplosbaar en onder die vel en hoef nie verwyder te
word nie. Die buig van die knie vorder gewoonlik
stadig en dit is belangrik dat u tuis konsensieus
voortgaan met die oefeninge soos deur
die fisioterapeut voorgeskryf. Probeer minstens elke
dag 'n kort entjie stap, verkieslik buite. U kan motor
begin bestuur sodra u voel u kan dit veilig doen,
normaalweg ongeveer 4 weke na die operasie.
OOR DIE LANGTERMYN
Ons sou verwag dat u binne drie maande na die
operasie goed sal kan stap. Dit is egter ook belangrik
om te besef dat daar tot 'n jaar na die operasie nog
altyd 'n progressiewe verbetering in die funksie van
die knie sal wees. Ons wil nie hê dat u aan enige
hardloop- of springaktiwiteite deelneem nie.
U moet ook nie op u hurke probeer sit nie. Daar is
geen beperking op sporte soos rolbal, gholf en
ontspanningstennis (dubbelspel) nie. Stap, swem en
fietsry sou ook nie die knie benadeel nie. Dit is
normaal dat daar met tye 'n "klik"-geluid in die knie is.
Dit word veroorsaak deur die beweging van die
metaaloppervlak teen die plastiek. U sal ook vind dat
die vel langs die wond effens dood voel. Dit is as
gevolg van die fyn senuwees in die vel wat deurgesny
word wanneer ons die knie opereer. Die sensasie
behoort stadig te verbeter, maar u kan moontlik
permanent 'n effense dooie gevoel behou.
U word aangeraai om nie enige langafstand-
(internasionale) vlugte te onderneem binne die eerste
3 maande na die operasie nie weens die risiko van
trombose. Binnelandse vlugte is geen probleem nie.
Die knieprostese sal metaalklikkers aktiveer by die
kontrolepunte by die lughawe. Dit is 'n goeie idee om
lospassende klere te dra sodat u littekens maklik
ontbloot kan word indien nodig.
Sou u enige ander chirurgiese prosedure benodig,
selfs aan u tande, bring die feit dat u 'n
knievervanging gehad het onder die aandag van
u geneesheer/ tandarts wat vir u profilaktiese
(voorkomende) antibiotika moet voorskryf.
Ons stel een van die volgende voor:
Indien u nie allergies vir penisillien is nie:
kefaleksien (bv. Keflex), kefradien (bv. Cefril),
of amoksisilien (bv. Amoxil). Die dosis is 2 g
per mond een uur voor die prosedure.
Indien u allergies is vir penisillien: klindamisien
(bv. Dalacin-C) 600 mg een uur voor die prosedure.
LET WEL: Onder GEEN omstandighede moet
enigiemand, behalwe 'n ortopediese chirurg,
'n naald in u vervangde knie steek nie, hetsy as
'n inspuiting of aspirasie (vloeistofonttrekking).
U opvolgbesoek by ons spreekkamer is gewoonlik vier
tot ses weke na die operasie. Indien moontlik sou ons
u graag 18-maandeliks wil opvolg of
vroeër indien enigiets miskien sou pla.
PAGE 2 / 2