Preek 2 Geloof Mark 5v21-43 Vertroue

hulle enigste uitweg. In hulle desperaatheid het hulle besef dat hulle geheel en al van God
afhanklik was. Matteus 5:3 sê: “Geseënd is dié wat weet hoe afhanklik hulle van God is, want
aan hulle behoort die koninkryk van die hemel.” Jaïrus en hierdie vrou het daardie dag die
koninkryk van die hemel ontvang want hulle het geweet hulle is arm van gees (OAV). Hulle
geloof, hulle vertroue, het nie letterlik die dogtertjie opgewek en die vrou se kwaal genees nie –
Jesus het dit deur sy wonderkrag gedoen. Maar hulle besef van hoe afhanklik hulle van God in
Christus en deur sy Gees is, hulle rotsvaste vertroue dat uitkoms net by Jesus te vind is, het
hulle vir sy wondermag oopgestel. Ons hoor die weerklanke van Rut se woorde aan Boas: “Ek is
Rut, ek is van u afhanklik, en u is my losser...” (Rut 3:9). Ons hoor die weerklanke van elke
gelowige se woorde aan Jesus Christus: “Ek is ’n sondaar, ek is geheel en al van U afhanklik,
en U is my Verlosser!”
Getuig jou geloof en vertroue, broer en suster, van jou algehele afhanklikheid van God? Is jy so
desperaat vir uitkoms – geestelik en andersins – dat jy alle ander dinge waarop jy dalk mag
vertrou weggooi en jou voor die voete van Jesus neergooi in die vertroue dat Hy Hom oor jou sal
ontferm? Net soos in Jaïrus en die vrou se geval kom dit nie uit jouself nie: die Gees van God
werk dit in jou, maar terwyl jy aan ander dinge vasklou, sal jy nooit arm van gees voor God wees
nie, sal jy nooit besef, of wil aanvaar, hoe afhanklik jy van God is nie. Ware geloof is om,
wanneer jy God in sy goedheid leer ken, vas te vertrou dat Hy op grond van die soenverdienste
van Christus alles wat goed is aan jou gee. Hoe beter dit met ons as mense gaan, hoe moeiliker
is dit om werklik in afhanklikheid van God te glo en te lewe. Maar as ons werklik in die geloof wil
groei, moet ons groei in ons vertroue. Ons moet meer en meer besef hoe desperaat ons situasie
is. Ons moet meer en meer besef hoe waardeloos die dinge is waaraan ons waarde heg, en hoe
waardevol Jesus in ons lewens is. Ons moet meer en meer besef hoe afhanklik ons van God in
Christus is, en dié dinge waarop ons eerder vertrou, al meer en meer aflê. Ons moet meer en
meer op Jesus vertrou om sy wondermag in ons lewens ten toon te stel.
Opsomming
Broer en suster, meet vanaand jou vertroue aan dié van Jaïrus en die vrou wat aan
bloedvloeiing gely het. Hulle het in hulle absolute desperaatheid besef hoe afhanklik hulle van
God is; dat hulle enigste redding by Jesus te vind was. En hulle het voor sy voete neergeval,
oorgelewer aan sy ontferming. Dit is ook die maatstaf van ons vertroue: is ons so desperaat, so
afhanklik van God in Christus, so aangewese op sy wondermag, sy redding, sy uitkoms? Of
4