You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
Skriflesing: <strong>Mark</strong>us 5:21-<strong>43</strong><br />
Teksverse: <strong>Mark</strong>us 5:34 en 36<br />
Inleiding<br />
REEKS OOR GELOOF: PREEK 2<br />
Ons fokus vanaand op vertroue as een been van ware geloof, saam met kennis. In ons<br />
teksgedeelte vind ons ’n duidelike illustrasie van die feit dat daar geen geloof sonder vertroue is<br />
nie. Twee desperate mense kom na Jesus toe: Jaïrus wie dogtertjie op sterwe lê en die vrou wat<br />
al jare aan bloedvloeiing ly. Beide het sekerlik kennis van Jesus gehad – al was dit net gerugte<br />
oor hierdie man wat mense gesond maak. Maar selfs met beperkte kennis is hulle bereid om<br />
Hom te vertrou. En daarom Jesus se woorde: “...jou geloof het jou gered” en “Bly maar net glo!”<br />
<strong>Geloof</strong> is om te besef hoe afhanklik jy van God is en jou vertroue geheel en al op Hom te vestig.<br />
Jaïrus se vertroue<br />
Ons teksgedeelte bestaan uit twee episodes waarvan die eerste deur die tweede onderbreek<br />
word. Jesus het teruggekeer na die westelike oewer van die see van Galilea en omdat Hy daar<br />
goed bekend was, word Hy dadelik deur ’n groot menigte mense omring. Een persoon wat na<br />
Jesus toe kom is Jaïrus, een van die raadslede of leiers van die sinagoge. Hy het nie ’n amp<br />
beklee soos dit vandag ken nie, maar was verantwoordelik vir die administrasie en orde in die<br />
sinagoge. Hy was dus ’n gesiene man onder die Jode. En tog kom val hy op sy knieë voor Jesus<br />
neer. Hy is desperaat. Alle mense hulp het misluk en Jaïrus beskou moontlik vir Jesus as ’n<br />
laaste uitweg. Hy het gehoor dat Jesus Hom oor ellendige mense ontferm; dat Hy genesing kan<br />
bewerk. En hy soek desperaat na genesing vir sy dogtertjie wat op sterwe lê. As Jesus maar net<br />
sy hande op haar kan lê, sal Hy haar uit die mag van die dood kan red en sal sy bly lewe.<br />
Sonder om te dink gaan Jesus dan ook saam met die hartverskeurde Jaïrus met ’n groot skare<br />
mense agteraan – waarskynlik mense wat nuuskierig was of sensasie gesoek het, of dalk net<br />
gewag het vir Jesus om te misluk.<br />
JY VERTROU AS JY WERKLIK AFHANKLIK IS
Die tweede episode met die vrou wat aan bloedvloeiing gely het, vind nou eers plaas. Die<br />
oponthoud wat dit veroorsaak het, moes Jaïrus se geduld, en sy geloof, getoets het want hy het<br />
geweet daar is nie baie tyd nie. Toe Jesus vir die vrou as “dogter” aanspreek, moes dit deur<br />
Jaïrus se hart gesny het – sy eie dogter het dan op sterwe gelê! En dan die verskriklike woorde:<br />
“U dogter het gesterwe.” En mense wat sy versoek aan Jesus as tydmors afmaak – alle hoop is<br />
daarmee heen. Jesus was te laat. En tog gee Jesus nie hoop op nie: “Moet jou nie ontstel nie.<br />
Bly maar net glo!” Die geloof, die vertroue, wat Jaïrus in die eerste plek na Jesus laat gaan het,<br />
moes hom nou dwing om verder saam met Jesus huis toe te stap, al weet hy watter hartseer<br />
hom daar sal tref. Sy vertroue dat Jesus sy kind kan lewend maak, moet hom hoop gee want op<br />
grond van sy vertroue sal sy kind uit die dood gered word. Toe Jesus by die huis kom, neem Hy<br />
die drie wat Hy vertrou het saam met Hom: Petrus, Jakobus en Johannes. Mense het reeds<br />
begin om volgens gebruik verskriklik te huil en te kere te gaan – moontlik was daar al gehuurde<br />
roubeklaers. Maar Jesus berispe hulle: “...sy slaap net.” Hulle lag Hom in hulle ongeloof uit en<br />
Hy jaag hulle weg. En met Jaïrus en sy vrou en die drie dissipels gaan Jesus na die dogtertjie se<br />
kamer. Hy sê vir haar in Aramees: “Dogtertjie, Ek sê vir jou, staan op!” Hy praat met haar asof sy<br />
lewe want Hy is die Vors van die lewe, nie die dood nie. En sy staan uit die dood op en loop,<br />
genees van watter siekte haar ook al in sy greep gehad het. En as bewys dat sy lewe, sê Jesus<br />
dat die mense vir haar iets te ete moet gee.<br />
Die vrou met bloedvloeiing se vertroue<br />
Die wonderlike genesing van die twaalfjarige dogter van Jaïrus word onderbreek deur die vrou<br />
wat aan bloedvloeiing gely het. Sy het voortdurende menstruasie en gepaardgaande bloeding<br />
gehad. Waar ander vrouens vir sewe dae elke maand as onrein beskou is, en iemand wat aan<br />
haar raak ook vir daardie dag as onrein beskou is (Lev 15:19ev), was hierdie vrou altyd onrein<br />
en het sy dus ’n baie eensame en afgesonderde lewe gely – niemand kon aan haar raak sonder<br />
om self onrein te word nie. Om met haar toestand tot Jesus te nader, moes uiterste moed<br />
geverg het, en was gewoon ’n uiting van haar desperaatheid. Sy sou na geen rabbi gegaan het<br />
nie! Sy het al haar geld al aan dokters spandeer en het baie onder die behandelings gely – die<br />
mediese wetenskap soos ons dit ken was nog nie eers in sy beginstadium nie en behandelings<br />
was dikwels eerder toorkuns en uitbuiting as werklike mediese hulp. In haar desperaatheid kom<br />
sy dus na Jesus toe en die skare mense gee vir haar geleentheid om onopgemerk die soom van<br />
sy klere aan te raak.<br />
2
Onmiddellik gebeur twee dinge: sy besef dat sy genees is – haar bloeding het opgehou. Haar<br />
vertroue in Jesus se wondermag word ryklik beloon – die bron van haar probleem word in ’n<br />
oomblik weggeneem. En Jesus besef dat daar krag van Hom uitgegaan het. Dadelik vra Hy wie<br />
Hom aangeraak het – nie om die vrou in die verleentheid te stel nie, maar om die eer aan God<br />
te laat toekom en die Vader te loof en te dank. Die dissipels dink sy vraag is onbenullig want<br />
tussen so skare mense sou sommiges aan Hom geraak het. Dit is egter nie toevallig nie maar ’n<br />
geloofsdaad, ’n daad gedryf deur geloofsvertroue, wat die vrou berekend en bewustelik aan<br />
Jesus laat raak. Skielik is die vrou bang – wat as Jesus vir haar kwaad is omdat sy Hom deur<br />
haar aanraking onrein gemaak het? En daarom val sy voor Hom neer en vertel haar geskiedenis<br />
vir Hom. En Jesus antwoord: “Dogter, jou geloof het jou gered. Gaan in vrede. Wees vir goed<br />
van jou kwaal genees!” Sy het iets gehad wat die dissipels tydens die stormnag op die see<br />
(4:40) nie gehad het nie – ’n rotsvaste vertroue op die alvermoë van Jesus as die Seun van<br />
God.<br />
Weet hoe afhanklik jy van Jesus is!<br />
Die fokus van beide Jaïrus en die vrou se omgang met ons Here Jesus is hulle vertroue, hulle<br />
geloof. Natuurlik was daar ook sprake van kennis want sonder kennis van die wonderdade wat<br />
Jesus in Galilea gedoen het, sou hulle hulle nooit voor Hom neergegooi en hulself aan sy<br />
ontferming oorgelewer het nie. Dit is immers ook hoekom daar so groot skare mense saam met<br />
Hom beweeg het. 1:34 sê: “Hy het baie siekes wat allerhande kwale gehad het, gesond gemaak<br />
en baie bose geeste uitgedrywe.” Tog was daar in Jesus se tyd baie wat voorgegee het om<br />
wonderwerkers te wees. Jesus self sou later sê: “Baie sal onder my Naam kom en sê: ‘Ek is die<br />
Christus,’ en hulle sal baie mense mislei.” En tog het hierdie twee desperate mense van Jesus<br />
te hore gekom, gehoor wat Hy gepreek en gedoen het, van sy ontferming en liefde vir alle<br />
mense gehoor, en op grond van daardie kennis het hulle van Hom genesing verwag. Hulle het<br />
ervaar waarvan Paulus later sou skryf: “...ja, nog meer: ek beskou alles as waardeloos, want om<br />
Christus Jesus, my Here, te ken, oortref alles in waarde.” (Fil 3:8).<br />
Maar Jesus, broers en susters, fokus in sy woorde aan hierdie twee mense op hulle vertroue. In<br />
hulle desperaatheid het hulle lankal opgehou om dokters en boererate en tradisionele medisyne<br />
en wonderwerkers wat teen betaling wonders doen, te vertrou. Jaïrus het geweet dit sal nie sy<br />
dogtertjie red nie. Die vrou het geweet dit sal nie haar bloedvloeiing genees nie. Trouens,<br />
hierdie dinge het haar finansieel geruïneer. En daarom gaan hulle na die voete van Jesus as<br />
3
hulle enigste uitweg. In hulle desperaatheid het hulle besef dat hulle geheel en al van God<br />
afhanklik was. Matteus 5:3 sê: “Geseënd is dié wat weet hoe afhanklik hulle van God is, want<br />
aan hulle behoort die koninkryk van die hemel.” Jaïrus en hierdie vrou het daardie dag die<br />
koninkryk van die hemel ontvang want hulle het geweet hulle is arm van gees (OAV). Hulle<br />
geloof, hulle vertroue, het nie letterlik die dogtertjie opgewek en die vrou se kwaal genees nie –<br />
Jesus het dit deur sy wonderkrag gedoen. Maar hulle besef van hoe afhanklik hulle van God in<br />
Christus en deur sy Gees is, hulle rotsvaste vertroue dat uitkoms net by Jesus te vind is, het<br />
hulle vir sy wondermag oopgestel. Ons hoor die weerklanke van Rut se woorde aan Boas: “Ek is<br />
Rut, ek is van u afhanklik, en u is my losser...” (Rut 3:9). Ons hoor die weerklanke van elke<br />
gelowige se woorde aan Jesus Christus: “Ek is ’n sondaar, ek is geheel en al van U afhanklik,<br />
en U is my Verlosser!”<br />
Getuig jou geloof en vertroue, broer en suster, van jou algehele afhanklikheid van God? Is jy so<br />
desperaat vir uitkoms – geestelik en andersins – dat jy alle ander dinge waarop jy dalk mag<br />
vertrou weggooi en jou voor die voete van Jesus neergooi in die vertroue dat Hy Hom oor jou sal<br />
ontferm? Net soos in Jaïrus en die vrou se geval kom dit nie uit jouself nie: die Gees van God<br />
werk dit in jou, maar terwyl jy aan ander dinge vasklou, sal jy nooit arm van gees voor God wees<br />
nie, sal jy nooit besef, of wil aanvaar, hoe afhanklik jy van God is nie. Ware geloof is om,<br />
wanneer jy God in sy goedheid leer ken, vas te vertrou dat Hy op grond van die soenverdienste<br />
van Christus alles wat goed is aan jou gee. Hoe beter dit met ons as mense gaan, hoe moeiliker<br />
is dit om werklik in afhanklikheid van God te glo en te lewe. Maar as ons werklik in die geloof wil<br />
groei, moet ons groei in ons vertroue. Ons moet meer en meer besef hoe desperaat ons situasie<br />
is. Ons moet meer en meer besef hoe waardeloos die dinge is waaraan ons waarde heg, en hoe<br />
waardevol Jesus in ons lewens is. Ons moet meer en meer besef hoe afhanklik ons van God in<br />
Christus is, en dié dinge waarop ons eerder vertrou, al meer en meer aflê. Ons moet meer en<br />
meer op Jesus vertrou om sy wondermag in ons lewens ten toon te stel.<br />
Opsomming<br />
Broer en suster, meet vanaand jou vertroue aan dié van Jaïrus en die vrou wat aan<br />
bloedvloeiing gely het. Hulle het in hulle absolute desperaatheid besef hoe afhanklik hulle van<br />
God is; dat hulle enigste redding by Jesus te vind was. En hulle het voor sy voete neergeval,<br />
oorgelewer aan sy ontferming. Dit is ook die maatstaf van ons vertroue: is ons so desperaat, so<br />
afhanklik van God in Christus, so aangewese op sy wondermag, sy redding, sy uitkoms? Of<br />
4
vertrou ons op ander dinge? As ons so vertrou, sal Christus sy wonderkrag in ons lewens laat<br />
werk! Mag God ons deur sy Gees meer en meer laat groei in vertroue sodat Jesus ook ons<br />
geloof en vertroue sal prys!<br />
AMEN.<br />
–––oOo–––<br />
5
Change language