Download

Drent
Zuutwatervis hef teveul graot in het lief. Daor moej
van haolden. Ik haold der niet van, veur ie der weet
van hebt, stiet een graot joe dwars in het keelsgat. Ik
spreek uut ervaring, daor bin ik deskundig in. Spulen
met schoonmaakedik, dat helpt om de graot uut de
keel te kriegen, en de baord.
Een Drent is gien viseter. Wat stelt het open water
now veur in de pervincie? Niks.
De Hoogeveensche Vaort, de Verlengde
Hoogeveensche Vaort, asof e al niet lang genogt was.
Het Stieltieskanaal, het Oranjekanaal, de
Smildigervaort, de Willemsvaort, dan hej het wel zun
beetie had. Ja, toen ik kind was, toen waren der wieken
en sloten.
Die bint as warkverschaffing dichtgooid, now wordt
ze as warkverschaffing uutgraoven.
Snoek, braosem, voornties en paling. Dat was het wel.
In de oorlog, de tweede, kwamen de wieken en sloten
van pas. Toen zwienevlees op de bon was. In de
oorlog kiekt lu niet op een graot meer of minder.
Vis, ienmaol in de week op vrijdag. Roomsche visdag,
we muchten gien vlees eten as we in huus waren. Dat
was veurschrift uut Rome. Mien va zörgde der veur
om op vrijdag bij een protestant an taofel te eten.
Karbonade, runderlappie, kippepoot, maor gien visch.
Visch schreef ie in die tied nog met ch op het ende.
Bij oens in de kamer hung een brettie met de tekst:
Wilt in Uw huis aan Christus kruis een plaats van ere geven.
En menig kruis wordt uit Uw huis door Christus kruis
verdreven.
31