Geagte gebedsvriende

Geagte gebedsvriende
BIBLIA HAWESENDING
Posbus 47 Port Elizabeth
TEL no 041 5855483 Sel no 083 4697138
E-Pos seafarers @iburst.co.za
REIK OP VIR DIE UITREIK
AUGUSTUS 2011
EEN skip, ‘n verlore Chinese seeman, ‘n oliepyp wat gebars het – en ‘n
almagtige God. . .
Die pad wat die Here met mense loop, slaan soms jou asem weg!
Zhang Danfeng het ernstige brandwonde aan sy gesig opgedoen toe ‘n
oliepyp van die stoomketel aan boord van sy skip gebars het. Hy is in
‘n hospitaal in Port Elizabeth opgeneem. Terwyl hy daar gelê het,
toegewoel in verbande sodat net sy oë, neus en mond sigbaar was, was
die prognose nie baie goed nie: hy sou waarskynlik lelik geskend
wees.
Op dieselfde skip het Fang, ‘n ander Chinese seeman, vir Martin gesê
hoewel hy ‘n Christen is, was hy baie lanklaas in ‘n kerk. Hy het
iemand nodig om hom geestelik te begelei. Weens die taalprobleem
het Martin ‘n baie opgewonde Fang in aanraking gebring met ‘n
Chinese sendeling wat in P.E. werk en hierdie sendeling het ook die
baie siek Zang Danfeng in die hospitaal gaan besoek.
Daar, in die hospitaal, het Zang Dangfeng die Here aangeneem en hy
wil nou gedoop word. Die wonderlike ingryping van God in hierdie
man se lewe het sigbaar geword toe Zang Dangfeng se verbande
afgehaal is. Selfs die dokters was verstom: nie alleen het sy gesig
gestraal van vreugde nie, maar daar was geen teken van ernstige letsels
aan sy gesig nie! Zhang Dangfeng kon nie wag om die wonder-nuus te
gaan oordra aan sy ma in China, wat ‘n Christen is en deur die jare vir
hom gebid het.
Ook in die selfde tyd in die hospitaal was ‘n Filippynse seeman met
kopbeserings, twee gebreekte bene en gebreekte ribbes as gevolg van
`n fratsgolf van 10 meter hoog wat sy skip getref het. Toe Martin hom
besoek, het hy ook vir hom ‘n telefoonkaart geneem sodat hy sy familie
in die Filippyne kon bel. Die suster aan diens het Martin net 5 minute
besoektyd gegee, maar die man het hom gesmeek om langer te bly,
omdat hy nog geen besoekers gekry het nie en baie eensaam in ‘n
vreemde land was. Later kon Martin die evangelie met hom deel. Toe
die man die eerste keer weer kon loop, het hy vir Martin gebel om
dankie te sê vir die besoeke en gebede.
So word daar gereeld in die lief en leed van hierdie mense gedeel. Wat
`n wonderlike voorreg om dit hand-aan-hand met die verspreiding van
die Blye Boodskap te kan ervaar.
Simon Tikiau, ‘n seevaarder van Kiribati (‘n eiland in die Stille
Oseaan), het in ‘n e-pos aan Biblia geskryf: “Greetings to you, my
brother in Jesus Name. I like to thank you for your kind assistance
during my visit to your mission a few weeks ago. Thank you for your
kind hospitality. May Almighty God bless you all.” Op nog ‘n skip
kon die evangelie ook met 5 ander Filippyne gedeel word.
‘n Seeman wat Martin raad gevra het oor sy huweliksprobleme, het ‘n
paar weke later, toe sy skip weer in die hawe was, kom dankie sê vir
die goeie raad; sy huweliksbootjie is weer in rustige waters. Nog ‘n
seeman, van die Filippyne, het uit sy nate gebars van blydskap oor sy
baba se geboorte – veral toe hy via die internet ‘n foto van die baba kon
sien!

Biblia wil dankie sê vir almal se gebede. Die rekenaarstelsel is
opgegradeer. Ons moes ook 3 kwotasies vir ‘n (dringend
noodsaaklike!) bussie na ITF stuur. Bid asseblief daarvoor. Ons het
die Tagalog-Bybels gekry.Daar is n moontlikheid dat ons n heffing vir
Skeepsbesoekke kan kry van die agente - wat nog steeds gebed nodig
het.
GEBEDSVERSOEKE:
Bid vir Zhang Danfeng, wat na sy wonderbaarlike herstel met
‘n stralende gesig en met die Here in sy hart huis toe gaan;
Bid vir Fang, dat hy aan God sal bly vashou en meer
geleentheid kry om met Christene kontak te maak;
Bid vir Gerando, Glen, Rudy en Aldrin van die Filippyne, dat
die evangelie wat Martin met hulle gedeel het, in hul harte sal
groei;
‘n Ertsdraer met ‘n Chinese bemanning is deur Martin en
Benjamin Ho, ‘n Chinese sendeling, besoek. Bid vir die
bemanning. Vyftien DVD’s en 45 traktaatjies in die Chinese
taal is aan hulle gegee. Bid dat die Here elkeen sal ontmoet.
Bid vir die beskerming van seevaarders wanneer hulle verby die
kus van Somalië vaar. Dit lyk of die wêreld magteloos teen die
euwel van seerowery staan.
Bid ook vir die beskerming van seemanne in ‘n stormsee.
Bid asseblief ernstig dat die Here deure vir Biblia by die Coegahawe
sal oopmaak. Daar is nog baie struikelblokke in die pad,
en dit raak al hoe dringender om ook daar geriewe te kry om die
seevaarders te bedien.
Hoewel dit nie altyd so voel nie, is 2011 ook al amper op sy
rug. Kersfees is om die draai. Biblia gaan weer, soos in die
verlede, die Christus-boodskap tasbaar aan seemanne uitdra wat
die hawe in die feestyd besoek. Elke bemanningslid kry dan ‘n
klein geskenkie. Daarvoor het ons ongeveer R4 500.00 nodig.
Bid asseblief dat die Here sal voorsien.
Ons kan nie anders nie as om te jubel en te juig oor die lieflike,
welkome reën wat ons in die Ooskaap ontvang het. Ons is die Here
opreg dankbaar daarvoor.
Dit bly ‘n voorreg om by Biblia betrokke te wees. Die een dag is
nooit dieselfde as die vorige een nie. As ‘n mens so intens by die
lief en leed van die seemanne betrokke raak en later terugvoering
kry oor wat dit vir hulle beteken het, doen dit iets aan jou gees.
Ons dank die Here vir elke geleentheid.
Nog steeds gaan Biblia voort met die Bybels-vir-Seevaardersprojek.
Enigeen wat die projek wil ondersteun, kan bydraes in ons
rekening by Absa inbetaal. Die besonderhede is: Biblia –
rekeningnommer 4060566177. Merk die inbetaalstrokie asseblief:
Bybels vir Seevaarders.
Die Here seën u.
Martin en Sus (Biblia) en Keith (Mission to Seafarers).

Zhang Dangfeng in die hospitaal, nog met ernstige brandwonde
aan sy gesig.
Zhang Dangfeng nadat die Here hom aangeraak het. Die vreugde van
die Here straal uit hom uit.