Gr R Inligtingstuk - Laerskool Hennopspark

GRAAD R TOELATINGSBELEID
GRAAD R
Graad R maak slegs voorsiening vir leerders van 5 tot 6 jaar. Leerders is skoolpligtig die jaar
waarin hulle 7 word.
TYE
Aankoms: Vanaf 06:45 – 07:55
Formele onderrig begin stiptelik om 8 : 00
Vertrektye : Maandae tot Vrydae: Vanaf 12 : 45 – 13 : 30
NASKOOL
Aanvang : 13 : 30
Sluitingstyd : 17 : 30
Leerders wat teen 13 : 30 nog nie afgehaal is nie, sal outomaties by die
naskool inskakel, teen vasgestelde fooie.
‘n Naskool word op die Graad R-terrein bedryf, slegs vir Graad R-leerders van die skool. Die
naskool sal deur die vakansie ook beskikbaar wees, teen ‘n addisionele fooi. Middagete en
verversings sal daagliks voorsien word. Tariewe en inligting sal op navraag by die sentrum
beskikbaar wees.
BUITE KURRIKULêRE AKTIWITEITE
Die skool maak voorsiening vir ‘n aantal aktiwiteite wat deur die ouers self befonds word. ‘n
Aparte inligtingstuk in verband hiermee sal jaarliks by die Graad R–sentrum beskikbaar
wees. Die skoolfonds sluit outomatiese deelname aan rekenaarklasse in.
DISSIPLINE
Dissipline het die ontwikkeling van selfstandigheid, intrinsieke motivering en ‘n positiewe
selfbeeld ten doel. Geen vernederende praktyke of gesamentlike straf word toegepas nie.
Gesonde dissipline is geleë in die konsekwente toepassing van reëls en roetine en die
individuele begeleiding van elke leerder met die ouers as vennote.
FINANSIëLE ASPEKTE
SKOOLFONDS
• Skoolfonds word jaarliks deur die Beheerraad vasgestel en aan die ouers voorgelê
tydens die jaarlikse Begrotingsvergadering.
• ‘n Jaarlikse registrasiefooi is betaalbaar met inskrywing.
• Skoolfooie is oor 10 maande betaalbaar en verskeie betaalopsies is beskikbaar.
Navraag by Finanskantoor.
• Bankbesonderhede: Bank : ABSA
Takkode: 630445
Rekeningnommer: 2890490002
Verwysingsnommer: Leerdernommer moet by
Finanskantoor gekry word.
• Navrae: Me Nonnie Koch Tel: 012 660 0270

ALLE ANDER GELDE
2
Enige ander gelde moet in ‘n koevert met die besonderhede daarop, by die kantoor inbetaal
word. GEEN kontant word in ontvangs geneem, as dit nie in ‘n koevert geplaas word nie. Vir
u gerief, sal koeverte in elke klas beskikbaar wees in geval van nood. Snoepiegeld kan
kontant by klasonderwysers inbetaal word.
IN- EN UITSTAPPIES
In- en uitstappies word gereël om die inhoude van die kurrikulum te versterk en toe te lig.
Tydens instappies besoek kundiges die skool. Tydens uitstappies, word van openbare
vervoer gebruik gemaak indien die perseel ver geleë is. Met uitstappies na nabygeleë plekke
kan daar van ouervervoer gebruik gemaak word. ‘n Vervoerbeleid wat voorsiening sal maak
vir die streng toepassing van veiligheidsmaatreëls sal gehandhaaf word. Ouertoestemming
word te alle tye verkry, alvorens leerders uitstappies mag meemaak.
KLEREDRAG
Gemaklike, ou klere wat maklik los – en vasgemaak kan word tydens toiletroetine. Vrydae sal
Hennops T-hemde gedra word. Tydens uitstappies, of spesiale geleenthede, sal die hempies
ook gedra word. Die hemde sal te koop aangebied word by die klerewinkel op die terrein.
ALLE KLERE MOET GEMERK WORD. Onopgeëiste, verlore klere sal na ‘n maand aan ‘n
kindersorg-instansie geskenk word.
KLEUTERBENODIGDHEDE
‘n Lys word jaarliks voorsien, gewoonlik met die opsie van vooraf bestelling en aflewering.
Tasse met leerders se name daarop sal jaarliks bestel kan word. T-hemde wat tydens
spesifieke geleenthede gedra gaan word, sal by die klerewinkel te koop wees.
KURRIKULUM
Gebaseer op die Nasionale Kurrikulum Verklaring met die Christelike leer as basis. Die
emosionele-, kognitiewe-, motoriese- en konatiewe aspekte van die leerders word op
geïntegreerde wyse ontwikkel. Progressiewe leer vind plaas. Daar word veral gefokus op
Ontluikende Lees en Skryf, asook die aanleer van Basiese Wiskundige Vaardighede en die
Ontwikkeling van Kreatiwiteit. Reeds vanaf hierdie ouderdom word leerders georiënteer om
leiers te wees, wat eerder sal beïnvloed, as om beïnvloed te word.
OPVOEDINGSFILOSOFIE
• Die eerste sewe tot nege jaar is die belangrikste in die kind se lewe en vorm die basis
van alle verdere leer.
• Emosionele geborgenheid dien as basis vir leerervaring op skool.
• Leerders ontwikkel progressief van een fase van ontwikkeling na ‘n ander. ( Gebaseer
op die werk van Erikson en Piaget.)
• Leerders moet geleenthede gegun word wat as uitdaging dien vir ontwikkeling tot ‘n
hoër fase. (Gebaseer op die Vygotsky – beginsel).
• Die eendersheid van leerders word erken.
• Die uniekheid van alle leerders ten opsigte van persoonlikheidsamestellings,
leerstylvoorkeure, omgewingsvoorkeure, leermodaliteitsvoorkeure, breinvoorkeure, en
veelvuldige intelligensie word erken.
• Die kind in sy totaliteit word by die leerproses betrek.

3.
• Leerders van hierdie ouderdom leer senso – motories, dit wil sê deur ervaring met
liggaam en sintuie (perseptueel).
• Leerders is stimulusgebonde, voortdurende stimulasie is nodig vir optimale leer.
• Elke leerder ontwikkel volgens sy eie pas.
OUERBETROKKENHEID
Daar word van ouers as vennote in die opvoedingsproses verwag om voortdurend betrokke
te wees by alle aspekte van die kind se ontwikkeling. Oueraande maak voorsiening vir
gereelde kommunikasie, so ook persoonlike onderhoude.
Daar is egter ook verskeie geleenthede soos Inligtingsaande, Ouerleiding en
Fondsinsamelingsfunksies waarby ouers kan betrokke raak.
‘n Ouerkomitee sal jaarliks verkies word wat sal help met die bestuur van
fondsinsamelingsfunksies.
TERAPEUTIESE DIENSTE
Die skool funksioneer in samewerking met verskeie terapeute. Indien nodig, voorsien ons u
graag met die inligting.
VAKANSIETYD
Graad R volg dieselfde kwartaalrooster as ander Openbare Skole. Die oggendskool sal dus
gesluit wees gedurende die vakansie. Die naskool sal egter ‘n vakansieprogram volg
gedurende hierdie tyd. Leerders kan hierby inskakel teen ‘n addisionele fooi. Ingeskrewe
naskoolleerders betaal ‘n addisionele oggendfooi.
Die naskool sluit vanaf ongeveer die middel van Desember.
Die oggendskool en naskool is gesluit op Openbare Vakansiedae en Skoolvakansiedae soos
deur die GDO bepaal word.
VEILIGHEIDSBELEID
TERREIN
Die Graad R-terrein is omhein en heeltemal van die res van die skool afgesluit. Die hek wat
toegang verleen tot die Graad R-sentrum is van ‘n kamerastelsel en elektriese slot voorsien.
AFHAAL VAN LEERDERS
Streng maatreëls sal hier toegepas word:
• Geen persoon mag ‘n leerder kom afhaal sonder ‘n geldige sekuriteitskaart nie. Selfs
in die geval van ouers geld die reël, aangesien alle personeel nie noodwendig al die
ouers ken nie.
• Die kaart gee aan bepaalde persone toestemming om leerders te kom afhaal en sal
met ingang en/of uitgang gekontroleer word. Ouers van leerders besluit aan wie hulle
die kaarte wil toeken.
• Slegs die skool kan die kaarte uitreik en ‘n spesiale vorm hiervoor is by die Graad
R-sentrum beskikbaar. Die vorm maak voorsiening vir paspoortfoto’s van leerders.
Kopieë van paspoortfoto’s kan gebruik word.

Indien ‘n persoon wat ‘n leerder moet kom afhaal nie ‘n kaart in sy besit het nie, moet die
bepaalde persoon die ouer op sy/haar selfoon skakel in die teenwoordigheid van ‘n
personeellid, sodat die ouer telefonies kan toestemming gee aan die personeellid.
4.
GEEN leerder sal aan ENIGE persoon oorhandig word, sonder toestemming van ouers nie.
Waar ‘n persoon ‘n groep leerders vir ‘n partytjie kom afhaal, moet ‘n toestemmingsbrief van
elke betrokke ouer ingehandig word.
VERVERSINGS
• Leerders mag ontbyt skool toe bring en by ‘n tafel kom nuttig.
• ‘n Gemerkte kosblik met verversings word saamgebring vir ongeveer 10:00/10:30. Dit
mag slegs bestaan uit voedsame, gesonde kos en vrugtesap wat goed verseël is.
• Slegs gesonde kos word toegelaat.
• Kosblikke word daagliks met aankoms ingehandig.
• Nou en dan, wanneer vooraf gereël, mag leerders kospakkies met kos én lekkernye
saambring.
• Die naskool bedien ‘n volledige maaltyd en laatmiddag weer verversings.
• Op Vrydae kan leerders geld saambring vir snoepie. Die skool se snoepie sal sekere
verversings saambring en daar aan die leerders verkoop. ‘n Pryslys sal jaarliks aan
ouers voorsien word, sodat min of meer die regte bedrae saamgestuur kan word. Die
aankoop van verversings maak díe dae nie net spesiaal vir die leerders nie, maar leer
hulle ook sommer ‘n paar finansiële beginsels.
WEGWYSINGSRIGLYNE
Leerders mag in die volgende gevalle weggewys word:
• Die kleuter se siekte verhoed hom/haar om aan normale aktiwiteite deel te neem.
• Meer personeel word benodig om na leerder om te sien.
• Indien die leerder se toestand ‘n gesondheidsrisiko vir ander leerders inhou.
Wanneer leerder se toestand aan die volgende kriteria voldoen kan wegwysing ook
plaasvind:
• ‘n Buitengewone koors bo 38° C.
• Veluitslag.
• Diarree en naarheid: Meer as twee episodes tydens die verloop van ‘n uur.
• Erge gehoes en asemnood.
• Oë of vel wat geel vertoon.
• ‘n Stywe nek in kombinasie met ander simptome.
• Simptome van kindersiektes voorkom.
Laerskool Hennopspark wil graag alle voornemende Graad R-leerders uitnooi om deel te
word van die bruisende Blou Golf se uitnemende Graad R-onderrig. Hier word alle nuwe
Hennoppies gereedgemaak vir hulle laerskooljare. Ons sorg vir Optimale Stimulasie met
Maksimum Sorg en Liefde, sodat hulle klein spoortjies met verloop van tyd diep spore in die
geskiedenis van die laerskool kan word.