WSKT 212 PAC

0 Algemene inligting
0.1 Verwelkoming
Baie welkom by hierdie module. Dit is die tweede van drie Tegniese Wiskunde-modules,
waarvan u een per jaar sal neem vir die eerste drie studiejare van die B.Ed. (VOO
Tegnologie)-program. Die inhoude van hierdie drie modules fokus op werklikheidsgetroue
toepassings van Wiskunde binne die tegniese vakgebied en die natuurwetenskap.
Aangesien u op Hoërskool met Wiskunde kennis gemaak het, sal sekere van die onderwerpe
wat ons gaan bestudeer vir u reeds bekend wees. Dit is egter so dat Hoërskoolwiskunde
baie wyd fokus en dat u baie dinge geleer het wat u waarskynlik nooit weer nodig gaan kry
nie – daardie kennis was as agtergrond vir u verdere studie bedoel.
Terselfdertyd het 'n onderwyser wat by die tegniese vakgebied of natuurwetenskap betrokke
is egter wel redelik gevorderde Wiskunde-kennis oor sekere onderwerpe nodig. Voorbeelde
van hierdie onderwerpe is:
• Meeteenhede en getalle
• Basiese algebraïese bewerkings
• Die oplos van verskillende soorte vergelykings (formules)
• Vektore en komplekse getalle
• Funksies en wiskundige voorstellinge van werklikheidsgetroue prosesse (wiskundige
modelle)
• Grafiese en meetkundige voorstellinge van inligting
• Driehoeksmeting
• Differensiaalrekene
• Integraalrekene
Skoolwiskunde het nie naasteby genoeg aandag aan al hierdie onderwerpe gegee om u
voldoende as tegniese vakonderwyser toe te rus nie. Sekere van hierdie onderwerpe is ook
nie eers op skool behandel nie, omdat slegs mense wat in die tegniese en
natuurwetenskaplike vakgebiede werk, daarmee te doen sou kry.
3