Kaapse Skiereilandse Universiteit van Tegnologie

Waarneming/Refleksie Les 9
Leerders toon ʼn goeie begrip ten opsigte van onderskeiding tussen [ɛ] en [e:]. Dit kan toegeskryf word
aan die ontwikkeling van fonologiese bewustheid wat die leerder in staat stel om assossiasies te maak
teenoor dit wat hy hoor en die letter-klankkorrespondering wat van toepassing is.
Leerders voltooi ʼn werkvel waar die letterklank weggelaat is en die leerder die letterklank invul om
die woord waar te maak. Dit dien ook as hersiening om vas te stel of leerders die letterklanke wat
aangeleer is, kan onthou en die assossiasie kan toepas, werkvel 10 (Bylaag E).
4.3.3 Natoets
Na afloop van die aanleer van die letterklanke, word die natoets (sien Bylaag C) van die Yopp-Singer-
toets vir fonemiese segmentasie deur leerders afgeneem om vas te stel of daar ontwikkeling
plaasgevind het en of die programme wat saamgestel en gebruik is, effektief was.
Die natoets is individueel in ʼn aparte lokaal afgelê onder die leiding van die navorser (sien 3.5.3).
4.4 Samevatting
Die voortoets, intervensieprogram en natoets van fonologiese en fonemiese bewustheid het aan die
navorser ʼn aanduiding verskaf van die ontwikkeling van die proefpersone. Daar is klem gelê op die
voortoets en natoets van fase een en fase twee wat dieselfde inhoud bevat. Die intervensieprogram in
fase een en fase twee toon ʼn waarneembare verandering in die ontwikkeling by die proefpersone. Die
waarneming tydens die intervensieprogram word ondersteun deur veldnotas. In hoofstuk 5 word daar
klem gelê op die resultate van die voortoets, natoets en die intervensie in fase een en twee van die
navorsing.
81