Kaapse Skiereilandse Universiteit van Tegnologie

Hoofstuk 4
Die intervensieprogram
4.1. Inleiding
In hierdie navorsingstudie word daar gebruik gemaak van aksienavorsing in ʼn graad 1-klas. Leerders
uit ʼn taalarm omgewing met geen graad R-onderrig nie word vir hierdie studie gebruik. Die ouderdom
van hierdie leerders wissel vanaf vyf jaar en ses maande tot vyf jaar en nege maande. Dertien leerders
uit ʼn klas van veertig word vir twintig minute op ʼn Dinsdag, Woensdag en Donderdag onttrek, om die
aksienavorsing te onderneem.
Die volgende metode word in die aanbieding van die lesse toegepas: In die eerste ses weke word daar
klem gelê op die fonologiese ontwikkeling. Verskillende leerstyle en onderrigstrategieë word gebruik
om die begrip van fonologiese bewustheid te ontwikkel (sien 2.7.4). ʼn Voortoets word afgeneem
waarin die leerders se begrip van fonologiese bewustheid vasgestel word.
Na aanleiding van die uitvalle in die voortoets word die volgende lesse beplan om aangebied te word
om die fonologiese bewustheid te ontwikkel.
In die Geletterdheids- leerarea van die NKV word uitkoms een, naamlik die LUISTER-komponent,
beklemtoon. Die assesseringstandaarde vir hierdie komponent in graad R en graad 1 word behandel
met die klem op assesseringstandaard vier by graad R en assesseringstandaard ses by graad 1. (sien
4.2).
Refleksie op lesaanbieding word telkens verskaf.
4.2 Fase Een: fonologiese bewustheid
4.2.1 Voortoets vir fonologiese bewustheid
ʼn Voortoets (sien Bylaag B) is mondelings deur proefpersone uitgevoer.
4.2.2 Intervensie om fonologiese bewustheid te ontwikkel
Die volgende lesse word aangebied, volgens riglyne van bestaande programme (sien 2.7.4). Die lesse
word deur die navorser aangebied (sien 3.4.2).
61