Kaapse Skiereilandse Universiteit van Tegnologie

dit opgelos word. Die nadele verbonde aan die observasieproses is dat dit tydrowend is, aangesien ʼn
navorsingsprojek oor ʼn aantal maande of jare kan strek. Die proses is afhanklik van die navorser en
kan veeleisend wees (De Vos, 1999: 291).
3.3 Oorsig oor die navorsingsontwerp
De Vos, Strydom, Fouché en Delport (2002: 105) beskryf ʼn navorsingsontwerp as ʼn bloudruk
waarvolgens ʼn studie uitgevoer word. Die navorsingsontwerp dui die plan en struktuur van die
ondersoek aan en dit bepaal hoe die data ingesamel gaan word, asook hoe dit statisties verwerk gaan
word ten einde navorsingsvrae te beantwoord (sien 1.5).
3.3.1 Insameling van data
Aan die proefgroep is ʼn voortoets, wat saamgestel is deur Weskus-Wynland Onderwys Bestuur en
Ontwikkeling Sentrum (OBOS) en vir hierdie studie aangepas is, gegee. ʼn Intervensieprogram (sien
4.2.2) vir graad 1 leerders is ontwikkel en aangebied. Na afloop van die intervensieprogram is ʼn
natoets soortgelyk aan die voortoets aan proefgroep gegee. Veldnotas, ʼn video-opname en observasie
is gedoen tydens die intervensieprogram. ʼn Tweede fase waarin fonemiese bewustheid en letter-
klankkorrespondering toegepas is, is gevolg. ʼn Voortoets, intervensieprogram en natoets is gedoen
(sien 4.3). ʼn Vertaalde Yopp-Singertoets (sien Bylaag C) vir die toetsing van fonemiese bewustheid is
deur leerders afgelê.
Verskeie bestaande geletterdheidsprogramme in Suid-Afrika en die buiteland is ondersoek. Grové et
al. (1992: 27) se werk wat as riglyn dien in die voorskoolse kurrikulum in Suid-Afrika en die program
deur Pepler (2005) is vir hierdie studie gebruik, omdat dit aan die kriteria van fonologiese en
fonemiese bewustheid voldoen. In Amerika het die navorser die "Head Start- program” van (Cooke,
1977: 1) wat fokus op 4- en 5-jariges uit lae sosio-ekonomiese gesinne onder die loep geneem. Hierdie
program fokus op kinders wat swak gesondheid ervaar en ʼn gebrek aan selfvertroue het wanneer hul
die formele skoolfase moet aanpak. Die “Hippy-program” (Home Instruction Program for Preschool
Youngsters) is ʼn voorskoolse program wat in die Verenigde State van Amerika geïmplimenteer is en
op taal, probleemoplossings- en diskriminasievaardighede fokus (Westheimer, 1997: 248). Hierdie
programme is ondersoek maar nie vir die studie gebruik nie, aangesien dit nie geskik gevind is nie.
3.3.2.1 Betroubaarheid
Betroubaarheid van navorsing is sinoniem met stabiliteit, konsekwentheid en voorspelbaarheid.
Kerlinger (1986: 405) verwys weer na geloofwaardigheid, toepaslikheid en konsekwentheid.
54