Kaapse Skiereilandse Universiteit van Tegnologie

vertel meer omtrent ʼn prent. ’n Leerder ontwikkel sy of haar eie leesboek. Die voordeel van hierdie
metode is dat die verband tussen lees en skryf onmiddellik vasgelê word. Die leerder maak ook
gebruik van taalskat, eie teks, leesstrategieë, leesbegrip. Sy selfbeeld word bevorder omdat die
pogings as waardevol beskou en die moeilikheidsgraad self bepaal word. Die nadeel van hierdie
metode is dat leerders wat nie gestimuleer is en oor ʼn goeie woordeskat beskik nie, nie tot hulle volle
potensiaal ontwikkel nie (Joubert et al., 2006: 95).
2.12.2.6 Die heeltaalmetode
Volgens Joubert et al. (2006: 96) is die heeltaalmetode deel van heeltaalbenadering. Volgens hierdie
benadering word die taal wyer betrek as die aanwending van leesstrategieë. Die klem val sterk op die
integrasie van luister, praat, lees en skryf binne ʼn tematiese benadering. Dit is duidelik dat lees nie ʼn
geïsoleerde proses is wat beperk kan word tot ʼn leesperiode en een bepaalde leesmetode nie. Dit is ʼn
geïntegreerde proses waar die klem op begrip en betekenis val. Die holistiese benadering ten opsigte
van geletterdheid het ontwikkel uit die besef dat geletterdheid nie net ʼn kognitiewe vaardigheid is nie,
maar dat geletterdheid eerder gesien moet word as ʼn komplekse sosio-psigologiese aktiwiteit waar
opvoeding, sosiale interaksie, ervaringe en omgewing ʼn belangrike rol speel (Pepler, 2004: 46).
Taalvaardighede kan nie as losstaande vaardighede ervaar word nie, maar die geheel en integrasie van
taalaktiwiteite word beklemtoon. Onderrig moet holisties benader word omdat alle taalaspekte,
naamlik luister, praat, lees en skryf, interafhanklik is, gesamentlik ontwikkel en die een aspek die
ander ondersteun. Die kurrikulum moet as ʼn geheel benader word, aangesien taal as
kommunikasiemiddel, ʼn boodskap- draende funksie het waar ʼn ontvanger en ʼn sender, betrokke is.
Die doel is dat kinders moet begryp dat kommunikasie ʼn proses is waarin luister, praat, skrifsimbole
en die lees van daardie simbole met mekaar verband hou en nie as aparte komponente aangeleer kan
word nie (Joubert et al., 2006: 96).
Die heeltaalbenadering- onderrigpraktyk is gebaseer op dit wat meer effektief werk om kinders te leer
om effektiewe, onafhanklike lesers en skrywers te word. In heeltaal-klaskamers is daar nie ’n skeiding
tussen lees en skryf nie, ook nie tussen lees en lees nie. Vaardighede en strategieë ontwikkel meer
effektief binne die konteks van outentieke geletterdheidsgeleenthede (Weaver, 1988: 167).
2.12.2.7 Die gebalanseerde benadering ten opsigte van Geletterdheids-
ontwikkeling
Die gebalanseerde benadering word deur die Departement van Onderwys (2002) voorgeskryf as die
metode wat toegepas behoort te word om lees aan te leer in die primêre skool. Dit begin met die
46