© KOPIEREG VOORBEHOU

5
HOOFSTUK 2
Justin staan by sy werk in die stoorkamer en pak ’n paar
bokse op die rak. Hy kyk na die horlosie teen die muur –
dit is half vyf en amper tyd om huis toe te gaan. Hy pak
die twee laaste bokse op die rak en dan loop hy by die
agterdeur uit na die klein vierkant aan die agterkant van
die winkel – die rookplek. Hy gaan sit op ’n krat en steek
’n sigaret op. Terwyl hy rook, staar hy ingedagte voor hom
en die woord “duiwel” vorm op sy lippe.
“Duiwel”, sê hy hard.
Dit is wat die kinders op skool hom altyd genoem het.
Hulle het hom “duiwel” genoem en hy kon nie verstaan hoekom
hulle hom so noem nie. Hy het later agter gekom dat dit
blykbaar iets met sy oë te doen het, want die kyk in sy oë
het baie van die kinders, veral die meisies, op hulle
senuwees gemaak. Sy swart hare het blykbaar ook iets
daarmee te doen gehad, want hy het swart hare en donker oë
en dan het hy soms ’n diep kyk in sy oë gekry wat die
kinders baie bang gemaak het. Soos in enige skool, het
daar baie onware stories oor hom rondgeloop – dat hy een
aand van die skool se dak af gevlieg het met volmaan en dat
hy in ’n weerwolf verander en dat hy katte se lewer eet.
Justin was verbaas toe hy al daardie nonsens gehoor het,
maar toe hy die aand by die huis is en sy huiswerk doen,
het hy skielik hardop begin lag toe hy daaraan dink. Hy
kan nie glo dat mense so belaglik kan wees nie. Hy het
kliphard gelag en oom Lukas, wat op daardie oomblik besig
was om brood te smeer in die kombuis, het hom verbaas
aangekyk en kortaf gevra wat so snaaks is.
“Niks”, het hy geantwoord en toe maar verder stil gebly.
Justin rook die sigaret klaar en skiet die stompie weg. Hy
dink weer aan sy bynaam…“duiwel”. Hy weet nie hoekom die
naam nou juis in sy kop vashaak nie.
Teen vyfuur, teken Justin uit in die register. Daarna klim
hy op sy trapfiets en ry rustig huis toe. By die huis
gekom, bêre hy sy fiets in die garage en dan gaan hy by die
agterdeur in. Hy loer by die TV-kamer in na oom Lukas wat
voor die TV sit en ’n glas rum drink.
“Middag, Oom”, groet Justin.
“Middag”, brom oom Lukas terug.
Justin is nogal honger en nadat hy sy rugsak in sy kamer
neergesit het, gaan hy kombuis toe en smeer vir hom brood.
Hy is bly om te sien dat daar darem vars witbrood is. Oom