You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
31<br />
Die volgende oggend slaap Justin weer laat. Hy het nooit<br />
geweet dat rum ’n mens so kan peper nie! Seker maar omdat<br />
hy net gewoond is aan bier. Half elf staan hy op en gaan<br />
stort. Die water is yskoud. Justin vloek vir Lukas, want<br />
Lukas het natuurlik nou weer vanoggend voordat hy werk toe<br />
is, gestort en al die warm water opgebruik. Idioot!<br />
Justin en Lukas kom die afgelope een of twee dae effens<br />
beter oor die weg. Kyk nou maar gister byvoorbeeld, toe<br />
hulle gaan wegneem-etes koop het. Dit was die eerste ruk<br />
in ’n lang tyd wat hulle iets saam gedoen het. Justin dink<br />
aan al hierdie dinge terwyl hy vinnig klaar stort. ’n Koue<br />
stort is darem wragtig nie lekker nie!<br />
Nadat hy gestort het, gaan eet hy ontbyt. Dit is Weet-Bix,<br />
soos gewoonlik. Weet-Bix en melk. Justin sit in die TVkamer<br />
en hy kyk ingedagte hoe die twee Weet-Bix blokkies<br />
die melk opsuig. Hy gooi nog ’n klein bietjie melk in en<br />
kyk hoe die blokkies dit weer opsuig. Hy druk-druk met sy<br />
lepel op die Weet-Bix blokkies, totdat dit plat is en dan<br />
maal hy dit deurmekaar met sy lepel. Die Weet-Bix wat die<br />
melk so vinnig opsuig, laat hom dink aan Deon se bloed wat<br />
oor die aarde gevloei het en opgesuig is deur die grond.<br />
Hy dink ook weer aan daardie een deel in die Bybel van Kain<br />
en Abel. Abel se bloed wat vloei en die grond waarop dit<br />
gevloei het, het vervloek geraak…<br />
Justin is skielik nie meer honger nie, maar hy eet maar<br />
langtand aan sy ontbyt.<br />
Na ontbyt, vat hy die telefoongids en kyk onder “S”, vir<br />
Strauss. Hy wil kyk of Pieter Strauss, oftewel Victim<br />
number 2, in die telefoongids is. Terwyl hy so in die<br />
telefoongids rondblaai, kry hy skielik ’n gedagte – die<br />
koerant. Daar sal seker nou al ’n berig oor Deon se dood<br />
wees.<br />
’n Paar minute later is Justin op sy fiets op pad na die<br />
kafee toe, waar hy en Lukas gister was. Hy ry fiets, want<br />
hy is nie lus vir loop nie. Hy loop eintlik net as hy op<br />
sy slagoffers spioeneer en op hulle toeslaan. By die kafee<br />
gekom, sluit hy eers sy fiets vas met ’n ketting en stap<br />
in. Vandag is dit ’n ander persoon wat by die geldlaai<br />
werk en nie die een wat gister vir Justin so oor die<br />
vingers getik het oor sy lawaaimakery nie. Justin loop na<br />
waar die koerante is. Hy tel die koerant op en sy oë word<br />
groot toe hy na die hoofopskrif kyk:<br />
Jongman se lyk in veld gekry