You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
9<br />
in sy bed met sy rug teen die muur en klou hy sy dagboek in<br />
sy arms vas en staar verward om hom rond. Hy staar<br />
gewoonlik skrikkerig in die donker na sy kas en dan voel<br />
dit asof die kasdeure enige tyd gaan oopgaan en daar een of<br />
ander bose gedierte gaan uitkom – ’n ding met lang<br />
slagtande…’n dier wat amper soos ’n tipe van ’n hond lyk,<br />
maar met ’n aaklige vel en uitpeul oë.<br />
Wanneer hy uiteindelik aan die slaap raak, droom hy<br />
gewoonlik van reuse spinnekoppe wat teen sy plafon loop en<br />
wat op hom val en hom toespin in ’n reuse web en hoe hy<br />
woel om uit die web te kom en hoe hy benoud raak van die<br />
reuk, want daar hang ’n dooie, vrot reuk in die lug en<br />
terwyl hy so worstel, kom daar ’n man met ’n lang toga en<br />
’n swart jas met ’n kappie wat sy gesig bedek en in sy een<br />
hand het hy dan ’n mes. Die mes lyk baie soos Justin s’n,<br />
maar hy is net groter. Sodra die man hom met die mes wil<br />
steek, skrik hy wakker. Hy ruk sommer so in sy bed en dan<br />
is hy gewoonlik natgesweet. Justin haat dit as hy daardie<br />
nagmerrie kry, maar dit het so deel van hom geword, dat hy<br />
daarmee saam leef – net soos wat ’n asmalyer maar saam met<br />
sy asma leef. Enigste verskil is dat Justin nie regtig<br />
weet hoe hy sý kwaal kan genees nie. Wat kan hy doen sodat<br />
hierdie nagmerrie verdwyn? Het sy wraakgedagtes dalk<br />
daarmee te doen? Hy weet nie, maar wraak neem, gáán hy<br />
wraak neem. Dit is tyd dat sy vyande moet boet!<br />
Nadat hy vir lank so gesit het en aan die nagmerries gedink<br />
het, besluit hy maar om te slaap. Hy sit die lig af en<br />
klim onder sy komberse in. Buite waai daar ’n effense wind<br />
en die takke van die een boom wat langs die huis staan,<br />
skuur-skuur teen die dak. Justin lê lank in die donker en<br />
luister na die geluid en dan kyk hy weer vir sy kas. In<br />
die donker lyk sy kas regtig skrikwekkend en iets laat hom<br />
ongemaklik voel. Hy draai op sy een sy, sodat sy rug na<br />
die kas toe is.<br />
“Hoooooeeeee”, waai die wind buitekant en dit word al<br />
sterker. Behalwe vir die wind, is dit stil buite en Justin<br />
lê doodstil.<br />
Toe hy uiteindelik aan die slaap raak, droom hy van ’n<br />
motor. Dit is ’n blou Opel Kadett en dit behoort aan Deon<br />
Lombard – een van die boelies wat die lewe vir hom so<br />
moeilik gemaak het. Justin droom hy loop na Deon se blou<br />
Opel toe en sit ’n bom binne die motor. Toe Deon ’n paar<br />
minute later in die motor klim, ontplof die bom met ’n<br />
vreeslike slag en Deon Lombard en sy motor is geskiedenis.