nuwe wyn-new wine vir kinders-for kids

Here Jesus, dankie dat U hierdie persoon aanvaar het as U kind. Dankie, vir die nuwe lewe wat U aan
hom/haar gegee het en dat hulle nou U kind kan wees. Maar Here Jesus, U is nie net die Verlosser en
Here nie, U is ook die Doper met die Gees. Kom nou en rus hierdie persoon toe met alles wat hy/sy
nodig het om U getuie te wees in hierdie wêreld. U weet hoe U hom/haar wil gebruik. Gee vir hulle
nou die gawes wat nodig is sodat U hulle kan gebruik soos U wil. Dankie, dat U dit gedoen het.
Amen.
Die rede waarom hulle dit doen, is omdat die Here Jesus belowe het, dat as Hy teruggaan na die
Vader, na Sy tyd op aarde, gaan Hy Sy Heilige Gees stuur om van nou af in al Sy mense te kom woon.
Hiervoor hoef Sy mense nie te vra nie. Dit is ’n persent wat Hy aan elke gelowige gee sonder dat
hulle vra. Sy Heilige Gees kom woon in hulle.
Hy kom woon in hulle liggame om elke dag by hulle te wees. So kan Hy hulle lei en hulle leer wat Sy
wil vir hulle lewens is. So kan Hy dan ook met hulle praat, want het Hy gesê: Hy wil hulle lei deur Sy
stem.
Maar dit is nie al wat Jesus vir elkeen van Sy volgelinge wil gee en doen nie.
In Hand. 1:8 hoor ons Hom die volgende sê: “Maar julle sal krag ontvang wanneer die Heilige Gees
oor julle kom, en julle sal my getuies wees in Jerusalem sowel as in die hele Judea en in Samaria en
tot in die uithoeke van die wêreld."
In 1 Kor. 12 verduidelik Paulus vir ons waaruit hierdie krag sal bestaan wat ons nodig het sodat God
ons kan gebruik om teenoor mense te getuig dat daar werklik ’n God is en dat Hy elke mens op aarde
liefhet.
Daar sê hy dat hierdie krag “gawes” of bonatuurlike vermoëns gaan wees wat Jesus aan elkeen van
Sy volgelinge wil gee sodat Hy deur hulle kan dinge doen of dinge sê wat ons nie gewoonlik kan doen
nie.
Van hierdie “gawes” is byvoorbeeld dat God dinge soos wonderwerke deur sekeres van ons wil
doen, of selfs mense deur ons wil gesond maak. Deur ander van ons wil Hy dinge vir mense sê oor
hulle lewens en oor God se plan in hulle lewens. Maar dit gaan dinge wees wat ons nie voor die tyd
geweet het nie. As God ons so wil gebruik, gaan ons hoor hoe die Heilige Gees vir ons hier binne sê
dat Hy ons wil gebruik om iets vir iemand spesifiek te sê. Die Heilige Gees gaan ons sê vir wie ons dit
moet sê en ook wat en wanneer ons dit moet sê.
Maar laat ek dadelik sê: Die Here gaan nie ons almal op dieselfde manier gebruik nie. Hy gaan ons op
verskillende maniere gebruik en daarom gee Hy aan ons verskillende gawes.
Hierdie “gee” van hierdie gawes noem die Bybel “doop met die Gees”.
Soos wat elke nuwe bekeerling gedoop is met water, so het die gelowiges in die vroeg-Christelike
gemeentes geglo dat God elkeen van Sy kinders wil toerus of doop met die gawes van die Gees.
Jesus het ook vir Sy dissipels daar in Lukas 11:9 tot 13 ’n baie belangrike ding geleer.