UNI-COMPARTMENTAL KNEE REPLACEMENT - orthoclinic.co.za

WAT IS 'N UNIKOMPARTMENTELE
VERVANGING?
Die kniegewrig kan in drie gedeeltes, wat elk as
'n afsonderlike eenheid funksioneer, verdeel word:
• Patello-femorale kompartement: tussen die
knieskyf en die voorkant van die bobeen.
• Mediale kompartement: die gedeelte tussen
die binneste helfte van die bobeen en onderbeen.
• Laterale kompartement: die gedeelte tussen die
buitenste helfte van die bobeen en onderbeen.
Net een van die drie kompartemente (mediaal,
lateraal of patello-femoraal) is uitgeslyt,
met die ander twee in 'n goeie toestand.
Met 'n unikompartementele vervanging word net
die oppervlakke van die beskadigde kompartement
vervang. In teenstelling hiermee word die oppervlakke
van al drie kompartemente tydens 'n algehele
knievervanging vervang.
VOOR- EN NADELE
UNI-COMPARTMENTAL KNEE REPLACEMENT
'n Unikompartementele vervanging vergelyk
as volg met 'n algehele vervanging:
VOORDELE
• Dit is 'n kleiner prosedure.
• Daar is 'n effens vinniger en makliker herstelperiode.
• Funksiegewys is die resultaat beter.
Die knie se buigbaarheid is beter en dit voel
soos 'n "gewone" knie.
• Dit kan maklik omskep word in 'n
algehele knievervanging.
NADELE
• Die onvervangde gedeelte van die knie kan
mettertyd ook verweer wat verdere
kniechirurgie kan noodsaak.
• Alhoewel 'n unikompartementele vervanging 'n
kleiner prosedure is, is dit tegnies moeiliker.
• Die lewensduur van 'n univervanging is effens korter
as dié van 'n algehele vervanging: ongeveer 10 - 15
jaar, teenoor die 15 - 20 jaar van 'n totale
vervanging. Dit kan egter maklik in 'n algehele
vervanging omskep word, indien nodig.
(MEDIAL/LATERAL/PATELLO-FEMORAL)
MOONTLIKE KOMPLIKASIES
Soos met alle chirurgie is daar ongelukkig ook met
'n knievervanging die moontlikheid van probleme.
Algemene komplikasies, veral kardiovaskulêr, is 'n
klein moontlikheid. Ten opsigte van die knie self is
ons spesifiek bekommerd oor die moontlikheid van
infeksie. Statisties gesproke is die kans daarop in
ons praktyk egter gering (minder as 0,3%).
Diepveentrombose (bloedklonte) is nog 'n moontlike
komplikasie, met 'n voorkoms van ongeveer 2%.
PRE-OPERATIEF
Om die moontlikheid van komplikasies tot 'n minimum
te beperk, reël ons met 'n patoloog om 'n aantal
spesiale ondersoeke uit te voer om die geringe
moontlikheid uit te sluit dat daar êrens in die liggaam
'n laegraadse infeksie is. Dit is ook moontlik dat ons
sal reël dat die narkotiseur u pre-operatief sien.
As hy/sy dit nodig ag, sal u ook deur 'n kardioloog
of internis ondersoek word.
MEDIKASIE
Anti-inflammatoriese middels soos Voltaren, Brufen,
ens. verhoog die risiko van postoperatiewe bloeding.
Dit is dus belangrik dat u die gebruik van hierdie
middels ten minste 3 dae voor die operasie staak.
Plaatjie-inhibeerders soos Disprin, Plavix, ens. moet
10 dae voor die operasie gestaak word. Indien u
Warfarin gebruik moet u dit 4 dae voor die operasie
staak en met heparien vervang. Vroue wat hormoonterapie
ontvang, moet dit verkieslik in die week voor
en vir 2 weke na die operasie nie gebruik nie.
Indien u gereeld 'n drankie geniet, wil ons graag hê
dat u dit ook in die hospitaal doen; dit sal u herstel
bespoedig. Die hospitaal verskaf
egter nie drank nie; bring dus u eie.
Dit is belangrik dat u u tuiskoms
beplan. Dink daaraan dat u nie sal
kan hurk nie en met 'n kruk sal moet
stap. U sal kan stort, maar sal nie
kan bad vir 6 weke nie. Alhoewel u
met ontslag uit die hospitaal
selfstandig sal wees, is dit verkieslik
dat u nie in die eerste paar weke
alleen bly nie.
PAGE 1 / 2

DIE OPERASIE
U sal vroegmiddag op die dag voor die operasie
tot die hospitaal toegelaat word. Die aand voor die
operasie sal ons heparien begin toedien, om die
moontlikheid van 'n trombose te verminder. Hierdie
terapie word volgehou vir 'n week na ontslag.
Die operasie word in die meeste gevalle onder 'n
spinale narkose – 'n tipe lokale narkose – gedoen.
Lokale narkose verminder die moontlikheid van
trombose en infeksie, asook die lading op die
kardiovaskulêre stelsel. Dit beteken dat 'n bietjie lokale
verdowing in die rug ingespuit word wat alle sensasie
in die bene wegneem. Daarby dien die narkotiseur
ook gewoonlik 'n baie ligte narkose toe sodat u
onbewusisvanaldiebedrywighedeindieteater. Die
narkotiseur sal ook 'n femorale senuweeblok doen
wanneer ons klaar geopereer het. Dit gee goeie
postoperatiewe pynbeheer, maar sal ook veroorsaak
dat u kwadrisepsspier vir ongeveer 24 - 36 uur verlam
sal wees. Dit beteken dat u eers op die tweede dag
na die operasie sal kan loop.
'n Unikompartementele knievervanging duur ongeveer 1 uur.
Vir die eerste 24 uur na die operasie sal u in 'n
hoësorgeenheid verpleeg word. U behoort gemaklik
te voel en baie min pyn te verduur.
POSTOPERATIEF
Vir die eerste dag na die operasie het u 'n binneaarse
drup aan die arm waardeur ons antibiotika en 'n
pynstiller toedien. Daar sal ook dreineringsbuise in
u knie wees. Ons gebruik medikasie wat bloeding
aansienlik verminder en 'n bloedoortapping onwaarskynlik
maak. Die binneaarse drup en dreineringsbuise word
gewoonlik na die eerste dag verwyder.
Die fisioterapeut sal u vanaf die dag van die operasie
daagliks besoek. Die rehabilitasieoefeninge kan dalk
eenvoudig en maklik voorkom, maar dit is uiters
belangrik dat u dit gereeld en op die regte manier
doen. So sal u u knie se funksie vinnig en volledig
herwin. Vanaf die tweede dag na die operasie kan u
begin stap, en daarna behoort u elke dag beter te loop.
Vir 'n uniknievervanging sal u ongeveer 3 - 4 dae in
die hospitaal moet deurbring.
EERSTE PAAR WEKE TUIS
Met ontslag uit die hospitaal sal u 'n voorraad
medisyne ontvang, waaronder pynmedikasie, antibiotika
en middels om bloedklonte te voorkom. Vir die
eerste 4 weke verkies ons dat u met 1 of 2 krukke
stap, alhoewel u u volle gewig op die geopereerde
been kan plaas. Teen die tyd dat u ontslaan word,
behoort u in staat te wees om u self goed te kan help.
Sodra die wonde goed genees het, kan u stort –
gewoonlik op die derde dag na die operasie.
Die steke is oplosbaar en onder die vel en hoef nie
verwyder te word nie. Pasiënte ondervind in die eerste
paar weke na die operasie gewoonlik moeite om die
knie te buig; dit is dus belangrik dat u tuis konsensieus
voortgaan met die oefeninge soos deur die fisioterapeut
voorgeskryf. Sorg dat u elke dag 'n kort ent stap, verkieslik
buite. U kan motor begin bestuur sodra u voel u kan dit
veilig doen (gewoonlik so 2 - 4 weke na die operasie).
LANGTERMYNVERWAGTINGE
Ons verwag dat u binne 3 maande na die operasie goed
sal kan loop. Dit is egter ook belangrik om te besef dat
die knie se funksie tot 1 jaar na die operasie sal verbeter.
Ons wil nie hê dat u aan enige hardloop- of springaktiwiteite
deelneem nie. U moet ook nie op u hurke
probeer sit nie. Daar is geen beperking op sporte soos
rolbal, gholf en ontspanningstennis (dubbelspel) nie.
Stap, swem en fietsry is ook in orde. Dit is normaal
dat daar soms 'n "klik"-geluid in die knie gehoor word.
Dit word veroorsaak deur die beweging van die
metaaloppervlak teen die plastiek. U sal ook ervaar
dat die vel om die wond effens dood voel. Dit is as
gevolg van die fyn senuwees in die vel wat tydens
die operasie deurgesny word. Die sensasie behoort
stadigaan te verbeter, maar 'n effens dooie gevoel
kan dalk van blywende aard wees.
Dit is raadsaam om nie enige langafstand- (internasionale)
vlugte te onderneem binne die eerste 3 maande na
die operasie nie, weens die risiko van trombose.
Binnelandse vlugte is egter nie 'n probleem nie.
Wees net daarop bedag dat die knieprostese soms die
metaalverklikkers by veiligheids- kontrolepunte op die
lughawe laat afgaan. Dit is 'n goeie idee om
lospassende klere te dra sodat u, u littekens
maklik kan ontbloot indien nodig.
Indien u enige ander chirurgiese prosedure benodig,
selfs tandheelkundig, moet u u geneesheer/tandarts
inlig dat u 'n knievervanging ondergaan het en dat
hy/sy 'n profilaktiese (voorkomende) antibiotikum
moet voorskryf. Ons stel een van die volgende voor:
• Indien u nie allergies vir penisillien is nie:
kefaleksien (bv. Keflex), kefradien (bv. Cefril), of
amoksisilien (bv. Amoxil). Die dosis is 2 g per mond
een uur voor die prosedure.
• Indien u allergies is vir penisillien: klindamisien
(bv. Dalacin-C) 600 mg een uur voor die prosedure.
LET WEL: Onder GEEN omstandighede moet
enigiemand, behalwe 'n ortopediese chirurg,
'n naald in u vervangde knie steek nie, hetsy as
'n inspuiting of aspirasie (vloeistofonttrekking).
U opvolgbesoek aan ons kamers is gewoonlik
4 - 6 weke na die operasie. Indien moontlik,
wil ons u graag elke 18 maande opvolg
(of vroeër indien daar iets is wat u pla).
PAGE 2 / 2