Graansorghum Cover - Pannar Seed

D) OESINSAMELING
-17-
Word hoofsaaklik gedoen met behulp van meganiese stropers.
E) GRADERING EN BEMARKING
Graansorghum word volgens hul mout, voer en looisuurgehalte (tannieninhoud)
gegradeer en teen verskillende pryse bemark.
In die volgende tabel word die klasindeling weergee:
Gradering
Klas Beskrywing
GM Voerklas (Goed mout)
GL 1 Voerklas (Swak mout)
GL 2 Voerklas (Swak mout / graan defekte)
GH 1 Hoë tannien (Moutklas)
GH 2 Hoë tannien (Swak moutklas)
Faktore van belang by verskillende klasse van graansorghums:
a. Kultivars wat ʼn donkerbruin onderhuidlaag het, het ʼn bitter smaak, en is
gevolglik meer voëlbestand. Die bitter smaak word deur tannien
(pollifenole) veroorsaak en het ook ʼn lae voedingswaarde vir
enkelmaagdiere tot gevolg. Sommige van die kultivars met ʼn donker
onderhuidlaag beskik oor ʼn goeie moutgehalte, mits die tannien deur die
behandeling met formaldehied, geneutraliseer word. Tannien het ʼn
invloed op die opname van proteïene deur enkelmaagdiere, soos varke
en pluimvee, vandaar die swakker voedingswaarde.
b. Kultivars wat oor goeie moutkwaliteite beskik, word gekenmerk deur die
volgende:
Die sorghumgraan het ʼn rooi kleur en meelagtige endosperm. In die
moutproses word ensieme gevorm wat die stysel na suikers afbreek.
Hierdie kultivars beskik oor ʼn goeie diastase waarde.
c. ʼn Verdere aspek van graankwaliteit wat in die toekoms moontlik meer
aandag by basterontwikkeling gaan geniet, is ʼn goed ontwikkelde geel
endosperm. Geel endosperms verskaf nie alleenlik vitamien A aan
diere nie, maar verskaf ook ʼn geel vet en donker eiergeel en is gevolglik
baie gewild in die pluimveebedryf.
Graansorghum beskik oor die algemeen oor min of meer dieselfde
voedingswaarde, vir alle tipe plaasdiere, as mielies. Die enigste uitsondering
is die sorghumtipes met ʼn bruin onderhuidlaag (voëlbestande bittertipe).
Laasgenoemde tipes is nie geskik as veevoer vir enkelmaag diere nie.
Sorghum produksiehandleidingreeks Kopiereg 8 Pannar Saad (Edms.) Bpk.