Heilige Gees

1
A
L B E R TO N
L S
EW EN ENTRUM
GEMEENTE
BYBELSTUDIE VIR SELGROEPE
DIE HEILIGE GEES IN DIE CHRISTEN SE LEWE
INHOUDSOPGAWE
Lesing 1: Die Heilige Gees in die Bybel
Lesing 2: Die doping of vervulling met die Heilige Gees
Lesing 3: Die doel met die doping in die Heilige Gees
Lesing 4: Hoe om met die Gees vervul te word
Lesing 5: Diensbaarheid aan die Gees
Lesing 6: Die gawes van die Gees
In dié Woordskool, wat vir selfstudie in u binnekamer bedoel is, wil ons u voorstel aan die
Heilige Gees - wie Hy is, en wat sy werk in die gelowige se lewe is. Die studiestuk wil die Bybel
ontsluit sodat u sal verstaan hoekom die Here sy Gees in ons lewe uitstort - om ons sy
medewerkers te maak. Dit wil ook vir u insig gee in die wonderlike gawes wat Hy aan sy kinders
belowe. Want dit is deur sy Gees dat ons heeltemal vervul word met die volheid van God
(Efesiërs 3:19). Ons gebed is dat die Gees Jesus Christus aan u sal voorstel terwyl u die Bybel
bestudeer aan die hand van dié Woordskool. Belangrik is dat u elke Skrifgedeelte naslaan, en
moeite doen om by die Bybelse boodskap uit te kom.

2
Lesing 1: Die Heilige Gees in die Bybel
Voltooi asseblief al die vrae so volledig moontlik - op dié wyse sal die Woordskool vir u die meeste
nut hê.
Het die Heilige Gees op dieselfde wyse in gelowiges gewerk en gewoon in die tyd van die Ou
Testament as in die tyd waarin ons vandag leef? Hoekom sê u so?
Die Ou en Nuwe Testament verwys telkemale na die Heilige Gees. Daar is ook 'n duidelike verskil
in hoe die twee Testamente oor die Gees praat, en 'n duidelike ontwikkeling te bespeur. Ons gaan
eers hierna kyk.
1 In die Ou Testament word die Heilige Gees meer as 'n goddelike krag en invloed geken,
terwyl in die Nuwe Testament Hy as 'n spesifieke goddelike Persoon geken en ondervind
word.
2 In die Ou Testament het die Heilige Gees periodiek op 'n kenbare wyse oor sekere persone
gekom om deur hulle 'n openbaring aan die volk of man van die Here oor te dra, waarna
die Gees weer die persoon verlaat het. In die Nuwe Testament kom Hy op kenbare wyse in
die lwens van mense en word Hy nou voortdurend geken en ondervind. Die Here stort sy
Gees nou in mense se lewens uit om in hul lewe teenwoordig te wees.
Waarna verwys die nuwe verbond in Jeremia 31:31-37, en wat is die besondere van die inhou van
die nuwe verbond (kyk veral na vers 33)?
3 In die Ou Testament het die Heilige Gees net oor sekere uitverkore werktuie met die oog
op 'n besondere dienswerk vaardig geword, soos om te profeteer. In die Nuwe Testament
kom Hy om alle gelowiges te vul en toe te rus.
4 Die openbaring van die Heilige Gees in die Ou Testament was veral met die doel om God,
sy wil, leiding, heil en oordeel na mense te bring. In die Nuwe Testament kom die Gees
om Jesus Christus te verheerlik en voor te hou as Redder, om die gemeente van gelowiges
op te bou en die koninkryk uit te brei, spesifiek deur die gawes van die Gees.
Wat leer Romeine 8:13-17 oor die werking en doel van die Gees in 'n gelowige se lewe?
Waarteenoor word dit gestel?

Opsommend: die bedeling van die Kerk, wat begin met die uitstorting van die Gees op
Pinksterdag, sien 'n nuwe taak wat aan die Heilige Gees toegeskryf word, wat met die volgende
begrippe in die Nuwe Testament saam gevat word - die doping of vervulling met die Heilige Gees,
en die gawes van die Gees. Deur die vervulling met die Gees kom woon die HERE in al sy
heerlikheid in die gelowige se lewe, en die sy gawes word die gelowige 'n gawe aan medegelowiges
en die wêreld om die genade en liefde van God te demonstreer.
3

4
Lesing 2: Die doping of vervulling met die Heilige Gees
Wat, meen u, is die verskil tussen die doping met die Gees, en die vervulling met die Gees?
Is daar 'n verskil tussen die ervaring van wedergeboorte, en die doping met die Gees? Vergelyk
Handelinge 19:1-6 voordat u antwoord.
Enkele opmerkings oor die onderskeid wat die Nuwe Testament tussen die ervaring van
wedergeboorte en dié van die doping met die Gees tref, is nodig. Lees dit aandagtig deur. Stem u
saam hiermee?
1 Wedergeboorte veronderstel 'n geestelike geboorte naas 'n natuurlike geboorte. Die
wedergeboorte gebeur volgens Johannes 3:5 deur die Gees.
Wat bedoel Johannes 3:5 met "uit water en Gees"?
En Johannes 3:8 - hoekom word dié wat uit die Gees gebore is, met die wind vergelyk?
2 Bekering en wedergeboorte gaan hand aand hand. Deur dié besluit van die mens -
bekering, volg 'n daad van God se gees - wedergeboorte. En dit gee aan die mens, volgens
Johannes 1:12, die reg om 'n kind van God genoem te word.
3 By die ervaring van die vervulling met die Gees ontvang die gelowige krag om 'n getuie vir
Jesus Christus te wees - lees gerus Handelinge 1:8. Dit beteken nie dat die gelowige nie
reeds mag getuig na sy wedergeboorte en voor sy doping met die Gees nie. Dit beteken
slegs dat jy die volheid eers met die doping met die Gees ontvang.
Wat leer Efesiërs 1:23 en 3:19 asook Kolossense 2:10 oor die volheid van God?
4 Wedergeboorte is 'n stille, verborge werking in die hart van die mens. Die toeskouers het

nie gesien hoe die Gees die misdadiger aan die kruis langs Jesus wederbaar nie (Lukas
23:40-43), of hoe die Gees die hart van die sondige vrou verander het nie (Lukas 7:36-50).
Selfs filippus kon nie agterkom dat die Gees reeds van die heidense hofdienaar 'n gelowige
navolger van Jesus gemaak het nie - daarom eis hy dat die man eers openlik sy geloof moet
bely (Handelinge 8:36-37). Met die vervulling met die Gees is dit gans anders. Op
Pinksterdag kon die toeskouers dadelik sien en hoor dat die dissipels met die Gees vervul
is. So aanskoulik was die gebeurtenis dat duisende mense saam gestroom en verbaas
gestaan het. En Petrus se verklaring? sien Handelinge 2:33. Die aanskoulike en duidelike
waarneembare element in die doping met die Gees blyk ook uit die reaksie van Simon die
towenaar in Handelinge 8:17-19, asook Petrus en sy vriende se gevolgtrekking oort wat
met Kornelius gebeur het, volgens Handelinge 10:44-47.
5 Die wedergeboorte kom reeds in die Ou Testament voor, anders sou niemand in dié tyd
salig kon word en in 'n persoonlike verhouding met die HERE staan nie. Die term word nie
gebruik nie. Die vervulling met die Gees is 'n ondervinding wat eers as 'n belofte van Jesus
op Pinksterdag kom, en daarna telkemale voorkom. Petrus verklaar dan ook dat hier
gebeur wat Joël (2:28-32) belowe het. Vergelyk ook Johannes se opmerking in Johannes
7:37-39.
Wat bedoel Jesus met die vergelyking van die Gees met water wat 'n mens se dors les? Na watter
dors, dink u, word hier verwys?
6 Dit is duidelik uit die vertelling oor die gelowiges in die Nuwe testament dat hulle eers tot
bekering gekom het / wederbaar is deur die Gees (wat twee kante van een muntstuk is),
en daarna 'n duidelik onderskeie ervaring gehad het waar hulle met die Gees vervul is.
Vergelyk hiervoor Johannes 13:10 met Handelinge 2:1-4, asook Handelinge 8:5-17 en 19:1-
2.
7 Beteken dit dat die gelowige by sy bekering 'n mate van die Gees ontvang, en by die
doping met die Gees die volheid? Ons kan nooit aan die Heilige Gees in terme van
hoeveelheid dink soos aan vloeistof nie. Hy is 'n Persoon, God self. Die volheid van die
Gees, of om vervul te wees met die Gees sien op die toestand van die mens se kant, om in
daardie verhouding tot God te kom waar jy ten volle deur die Gees beheer te word. Dit is
om 'n Geesvervulde lewe te lei - waar jy sy stem elke oomblik kan hoor, waar jy sy leiding
volg. Die Bybel sê dat die Gees as 'n gawe aan die mens gegee is, maar eintlik is dit ons
wat deur die Gees in besit geneem word. Ons staan onder sy kontrole en beheer, soos wat
ons onsself aan die persoon wat ons doop oorgee ( die Gees is die gawe en Doper). Ons
ontvang die Gees juis omdat Hy ons in ontvangs neem.
8 Die doping in die Gees is te onderskei van wedergeboorte, maar kan nooit daarvan geskei
word nie. Ons kan die HERE en sy werk in ons lewe nooit in ons logiese redenasies vasvang
nie, omdat Hy die soewereine God is wat doen wat Hy wil, en soos Hy wil. Hy openbaar
Hom aan elkeen van ons op 'n unieke wyse.
9 Aan die einde van die dag is die vraag of 'n mens met die Gees vervul is, nie of die persoon
'n besondere ervaring met die Gees of openbaring van God ontvang het nie, maar of hy
onder beheer van die Gees lewe. Die definisie van 'n Geesvervulde mens is nie iemand
wat in tale praat of profeteer nie, maar iemand wat die leiding van die Gees met sy/haar
5

lewe volg, en op dié wyse 'n gawe aan ander mense word.
10 Die terme vervulling en doping met die Gees word as wisselterme gebruik - dit verwys na
dieselfde ervaring.
Is u wederbaar deur die Gees? Hoekom sê u so?
Is u gedoop in, of vervul met die Heilige Gees? Hoekom sê u so?
Kritiek word soms teen Pinkstermense ingebring, en met reg, dat die doping in die Gees bloot
gesien en gesoek word as 'n bepaalde soort geestesbelewing, iets subjektiefs sonder behoorlike
objektiewe begronding. So iets lei maklik tot geestesdrywery, outo-suggestie en onbegronde
emosionele uitbarstings. Daarenteen moet gelowiges verstaan dat die doping in die Gees nie slegs
'n ondervinding is nie, maar dat dit gebaseer is op wat in die Bybel gesê word hieroor. Dit is 'n
Bybelse ondervinding gevul met die volgende inhoud: die HERE openbaar Homself aan die mens.
Die ervaring (of ervarings) wat 'n mens het wanneer die Gees oor hom/haar vaardig word, is die
gevolg en uitwerking van die ontmoeting met Jesus Christus as die Doper met die Gees. Die mens
is nie die subjek nie; Jesus is die Subjek wat handel. En daarom is dit nie bloot 'n subjektiewe
ervaring nie, maar 'n ervaring gebaseer in die besluit van God om Hom aan die individu te
openbaar. Jy word bewus van God, met Hom het jy te doen en van Hom ontvang jy die besondere
seën. Die doping in die Gees bestaan uit 'n ontmoeting tussen God en mens.
Met doping in die Heilige Gees word in die Nuwe Testament bedoel:
< onderdompeling in die krag van die Gees, wat krag aan die mens meedeel, met die
spesifieke doel om so te leef dat die mens se lewe 'n getuienis is
< dat die mens onder beheer van die Gees kom, tot so 'n mate dat die Gees beheer van die
mens se hele lewe, selfs sy intellek kan oorneem, en waaruit voortvloei dat die mens in
bewustheid van die teenwoordigheid van God in sy lewe voortleef, om telken homself
onder die beheer en leiding van die Gees te stel
< dat Jesus Christus aan die mens op 'n unieke en individuele wyse openbaar word
< die genadedaad wat gebaseer is op Handelinge 1:5 en 8 waardeur God Homself op 'n
persoonlike, onmiddellike en blywende wyse aan die gelowige openbaar, deurdat Hy die
mens onder die beheer en in die volheid van die Gees stel. Hierdeur word die gelowige op
'n besondere wyse bewus gemaak van die verheerlikte Christus in sy lewe. Dit het tot
gevolg dat die mens toegerus word om 'n lewe te lei waarin hy/sy 'n groter getuie vir
Christus kan wees en ook 'n voller dimensie van aanbidding kan beoefen.
6

7
Lesing 3: Die doel met die doping in die Heilige Gees
"Laat ek dit reguit en duidelik stell dat ek meen dit is 'n dwaalleer om na die volgende as
manifestasies van die Heilige Gees te verwys - om te skud of te bewe, of hoendervleis te kry, of te
val of te ween, of te dans of te skree, of hande te klap en soortgelyke aksies. Dit is suiwer
menslike reaksies. Dit mag reaksies wees op die krag van die openbaring van die Heilige Gees.
Maar dit kan ook maklik struikelblikke word sodat mense nie die egte ervaring van die doping in
die Gees deelagtig word nie. Daar is gans en al te veel Christene wat tevrede is met emosionele
reaksies en nie groei in genade om kanale van God se liefde aan die mense in hul wêreld te word
nie. Die Heilige Gees wil jou vul met die volheid van God sodat jy 'n kanaal kan wees waardeur die
Gees sy geskenke aan mense kan gee - aan gelowiges en ongelowiges." Past Dawid du Plessis
Wat, meen u, bedoel Paulus met die woorde in 1 Korintiërs 14:26: "Sorg dat alles tot opbou van
die gemeente verloop?" En wat is u bydrae daarin?
Dit is belangrik dat ons baie goed sal verstaan hoekom die Here sy Gees in ons lewe uitstort, sodat
ons ook hierin sy medewerkers kan word. Dit gebeur nie sodat die gelowige 'n goeie tyd kan hê
nie, maar vir ten minste vyf belangrike redes:
1 Die eerste en belangrikste doel hoekom die Gees gekom het, is om Jesus op te tel en te
verheerlik, sodat ons Hom sal sien vir wie Hy is
Wat is die werk van die Heilige Gees, volgens Jesus se woorde in Johannes 14:18, 23, 25-26?
2 'n Tweede rede hoekom die Gees uitgestort word, is om ons toe te rus met gawes om uit
te deel aan ander mense. Dit is 'n toerusting met die oog op 'n kragtiger bediening, wat vir
elke gelowige belowe word. Daar bestaan 'n verskeidenheid van Geestesgawes wat verskil
van persoon tot persoon sodat ons as gelowiges ons afhanklikheid van mekaar sal begryp,
maar sodat ons ook elkeen in ooreenstemming met ons temperament en omstandighede
die werk van Christus kan doen.
Het u al gevoel: ek het te min krag om die wêreld waarin ek leef effektief vir die Here te wen? Het
dié gevoel van u dalk te doen met wat tot dusver oor die vervulling met die Gees gesê is? In
watter sin?

Wat bedoel Paulus met die beeld van gelowiges as 'n liggaam wat uit verskillende dele bestaan,
volgens 1 Korintiërs 12:12-31?
3 Die Geestegawes is nie slegs bedoel om gelowiges toe te rus sodat hulle in hul daaglikse
lewenstyl 'n verandering teweeg bring nie, maar dit help ook mee om die ongelowiges tot
oortuiging van die evangeliese waarheid te bring. Wanneer Geestesgawes die
verkondiging van die evangelie vergesel, bevestig dit die waarheid daarvan deur tekens en
wonders. Kyk wat sê Paulus hieroor in Romeine 15:18-19. Dit gebeur egter nie net in die
erediens dat die evangelie verkondig word nie. Die Here het ons geroep om dit met die
manier waarop ons lewe te doen. En daarvoor rus Hy ons ook toe met gawes sodat ons
die regte woord, onderskeiding, teken of mag sal hê om die ongelowige te oortuig van die
waarheid van die goeie nuus.
4 Die Geestesgawes is ook gegee met die oog op verkwikkende aanbidding. Deur die Gees
word Jesus Christus in die erediens teenwoordig gestel, sodat gelowiges in sy
teenwoordigheid nuwe krag en moed kry. Die gawes van die Gees is 'n uitstraling van die
teenwoordigheid van God. Wanneer die gemeente met 'n gawe bedien word, kom die
Here naby aan die gemeente, is sy Gees in hul middel. En net so in die binnekamer of in
die gelowige se daaglikse lewenswandel - hy/sy word deur die gawes van die Gees versterk
en bemoedig , en wanneer iemand anders met 'n gawe bedien word, beteken dit ook vir
die persoon wat instrument van die Gees is, baie. Die teenwoordigheid van die Gees word
nie slegs in die manifestasie van gawes openbaar nie. Die Here openbaar Hom ook aan
mense in die stilte, direk in die hart
Hoekom word die Gees die Trooster of Voorspraak genoem in Johannes 14:16 en 26 asook 15:26
en 16:7? Wat is die Gees as Voorspraak se take, volgens dié gedeeltes?
5 Die Gees word ook na ons gestuur, en gee aan ons geskenke, met die oog op die behoefte
van die mens. God se erbarmende liefde kenmerk al sy werke in mense se lewens. Mense
is vir die Here belangrik, en daarom het Hy sy Seun na ons wêreld gestuur, en stuur Hy
vandag sy Gees.
Wat is die nut van die gawes en tekens wat in 1 Korintiërs 12:8-10 en Markus 16:17-18 genoem
word in ons stukkende, sterwende wêreld?
DIE GAWES IS DIE LIEFDE-VAN-GOD IN AKSIE.
8

Noudat u verstaan hoekom die gawes van die Gees gegee is - om van ons beter slawe van Jesus
Christus te maak, sodat ons met ons lewenswyse die evangelie sal demonstreer, deur ons
doelbewus te onderwerp aan die leiding en beheer van die Gees - kan die volgende vraag gestel
word: hoe word ek met die Gees vervul?
Sien u kans daarvoor - om die beheer van u lewe aan die Here te oorhandig, om volgens Matteus
16:24-26 te sterwe sodat Hy in en deur u kan lewe?
9

10
Lesing 4: Hoe om met die Heilige Gees vervul te word
Elke Christen behoort sy verstand en hart met die waarhede van die vervulling met die Gees te vul,
want dit is deur sy Gees dat die Here in al sy volheid in ons woon (sien Efesiërs 3:19). Tog is die
belangrikste nog om met die Gees vervul te word en 'n Geesvervulde lewe te lei. Wanneer jy
eenmaal die Pinksterondervinding self deelagtig geword het, kan jy soos die Samaritane van ouds
(in Johannes 4:42) verklaar dat jy nie meer op die ondervinding van ander hoef te bou nie, maar
self weet dat alles so is. Dan sal jy self 'n lewende getuie wees dat die vervulling met die Gees,
soos in die Bybel beskryf, ook vir die gelowige van die moderne dag is.
Die Pinksterbeweging, wat aan die begin van die twintigste eeu ontstaan het, het sy bestaan te
danke aan dié waarheid wat herontdek is: dat die Here nie die uitstorting van sy Gees slegs tot
Pinksterdag of die vroegste CHristelike gemeente beperk het nie, maar vir al sy kinders deur alle
eeue bedoel het. Die A.G.S. van S.A. is deel van die Pinksterbeweging, omdat ons sien dat die
Here die belofte van Handelinge 2:38-39 ook in ons lewens waar maak.
Hoekom, meen u, leer baie kerke dat die uitstorting van die Gees slegs beperk was tot die eerste
eeu na Christus?
Die vraag wat gestel word, is: Hoe word 'n mens met die Heilige Gees vervul?
Dit is heeltemal onmoontlik om die Pinksterwonder te deurgrond of die misterie ten volle in die
taal van mense te omskryf. Daarom is dit nie die regte vraag as daar gesoek word na 'n metode
nie. Die vervulling met die Gees is NIE die resultaat van iets wat ons doen nie, van ons metode of
handelswysen. Dit is GOD, en Hy alleen wat met die Gees doop soos wat Hy wil, wie Hy wil en
wanneer Hy wil.
Daarmee saam moet 'n mens altyd sê: ons glo op grond van wat Hy in sy Woord sê dat die Here
begerig is om almal wat in Hom glo en van harte daarvoor bid, met sy Gees te vul. Verder glo ons
ook dat die Here die mens nie ten spyte van homself met die Gees vul nie, met ander woorde dat
Hy nie die mens as 'n willose instrument in sy hand beskou nie. Ons is eerder medewerkers van
die Here, wat beteken dat daar van ons kant toenadering moet wees voordat die Here sy Gees in
ons uitstort. Hy dring Homself nie aan mense op nie.
Wat beteken 1 Korintiërs 3:9 wat sê dat ons medewerkers van God is, in terme van die vervulling
met die Gees?
Dié toenadering van die mens se kant kan nie as 'n vaste vorm voorgeskryf word nie, omdat elkeen

van ons uniek is - ons temperament, geaardheid, sosiale en persoonlike omstandighede verskil te
veel. Die voorwaarde vir dié toenadering is: om in Gees en waarheid te aanbid (vergelyk Johannes
4:23-24). Die inkleding van die voorwaarde in individue se lewe sal uniek en baie intiem wees.
Deur 'n vaste vorm voor te skryf van hoe 'n mens met die Gees vervul word, veroorsaak dat mense
gelei word om dinge te doen wat vreemd aan hul temperament mag wees, wat agterna tot
vertwyfeling aanleiding mag gee. Die voorskrif van vaste vorms mag selfs ontaard in 'n kultus
waardeur 'n substituut van die werklike op meganiese wyse verkry word. Ons wil veel eerder die
ruimte laat dat elke mens op sy unieke wyse by die Here uitkom.
Wat is die implikasie hiervan vir die erediens: dat daar nie vir gelowiges voorgesê word HOE hulle
die Here moet aanbid nie (deur byvoorbeeld hande te klap, te lag of te dans), maar eerder hulle
aan te moedig OM die Here te aanbid?
Veel eerder is die antwoorde op die volgende drie vrae van waarde as daar gepraat word oor die
vervulling met die Heilige Gees, omdat dit te doen het met die mens se toenadering tot God, op
eie individuele wyse:
Wat moet ek verwag?
Wat is ware geloof?
Wat is volkome oorgawe?
WAT OM TE VERWAG?
Dit is belangrik dat die gelowige wat tot die Here nader met die versoek dat hy vervul word met
die Gees, die regte verwagtings sal koester. Dit sal hom / haar in staat stel om die regte geestelike
houding te hê, reg te glo en hom/haarself aan die Here oor te gee.
Dit gebeur dikwels dat verskillende emosies asoof psigiese en fisiese reaksies met dié ervaring
gepaard gaan. Ons reaksies is egter nie die vervulling met die Gees nie. Vervul met die Gees
beteken dat die Derde Persoon in die Godheid, die Heilige Gees, in jou binneste woon, en die
beheer van jou hart of gees oorneem. Of anders (en dalk meer korrek) gestel: dat die Here ons
opneem in Hom, sodat ons deel van Hom word. Die vervulling met die Gees mag nie verwar word
met die mens se fisiese of emosionele reaksie op die ervaring van 'n ontmoeting met God nie.
Alle gedrag word uit drange gebore, vanaf die eenvoudige en onwillekeurige liggaamlike refleks
tot die groot geestesbesluit wat volg op ure se nadenke. Die gedrag wat die mens in die geval van
die vervulling met die Gees openbaar, is nie op liggaamlike behoefte en drang gebaseer nie, maar
op iets wat in die mens se gees gebeur - God se Gees neem beheer oor. Wanneer die Here se
Gees in die mens se gees werk, kan verwag word dat dit sterk innerlike drange sal meebring, wat
op sy beurt weer emosionele reaksies tot gevolg sal hê.
Die doel hoekom die Here se Gees in ons lewe uitstort, is om Christus te verheerlik - Hy wil die
mens dinge laat dink, sê en doen waardeur die Naam van die Here groot gemaak word, sy
medemens opgebou en die koninkrylk uitgebrei kan word. Só word ons medewerkers van die
11

Here.
As u reeds die ervaring van die vervulling met die Gees deelagtig geword het, in watter mate leef u
Geesvervuld, volgens die definisie wat in die paragraaf bokant dié vraag gegee is? Wat verhinder
U om na die volle potensiaal wat die vervulling met die Gees inhou, te leef?
Die eerste wat die Gees gewoonlik doen wanneer Hy die mens vul met die heerlikheid van die
Here, is om iemand die Here in ander tale te laat verheerlik (lees weer Handelinge 2:11). Dit het
waarskynlik daarmee te doen dat die Here se Gees so volledig beheer oor die mens neem vir
enkele oomblikke dat selfs die spraakorgaan se funksie onder sy mag staan. Die spreke in tale dien
in die Pinksterbeweging as 'n teken van die vervulling met die Gees.
Dink u dat die spreke in tale die enigste teken van die doping met die Gees is?
Die Hebreeuse woord "profeteer" beteken letterlik: opborrel, wat van onder na bo gebring word,
die inspirasie van die Gees. Met dit in gedagte, wat beteken 2 Petrus 1:20-21 vir die manier
waarop ons as gelowiges die Bybel lees?
Die mens wat in geloof tot die Here nader met die versoek dat hy gevul word met die Gees, moet
verwag dat hy bewus sal word van 'n intense drang om die Here verheerlik - 'n spontane
opborreling wat nie sy ontstaan by die mens self het nie, net soos 'n fontein water voortbring -
lees gerus Johannes 7:37-39. Baie dikwels kom hierdie drang skielik en so oorweldigend dat,
voordat 'n mens nog besef wat gebeur, hy besig is om in 'n ander taal te praat soos die Gees aan
hom gee om uit te spreek - sien Handelinge 2:4. En dié ervaring word gedryf deur die
gewaarwording van die almag en gedugtheid van God, tesame met 'n gevoel van diepe ontsag en
blye verheerliking.
Dit is dan die ervaring van die vervulling met die Gees. Die volgende stap is om Geesvervuld te
leef, met ander woorde as 'n mens in wie die Here se Gees regeer of beheer uitoefen, te leef. Dit
impliseer dat die Geesvervulde mens elke oomblik doelbewus bewus sal wees van die
teenwoordigheid van die Here, en na sy leiding te soek, om agter Hom aan te loop.
Dit is belangrik dat die verskil tussen die eerste ervaring van die vervulling met die Gees, en die
ervaring van 'n Geesvervulde lewe duidelik onderskei word. Definieer dit hier vir u eie onthalwe.
12

WARE GELOOF
Geloof ontstaan wanneer die mens die Woord, dit is die openbaring van God hoor en dit
aanneem. Uit die saad van die Woord wat in goeie aarde val, ontkiem die geloof.
Daar is 'n paar kenmerke van ware geloof, dit is geloof wat 'n voorwaarde is om die belofte van die
vervulling met die Gees deelagtig te word.
Om waarlik te glo, beteken om met jou hele hart te glo, om die Here met jou lewe te vertrou - sien
Filippus se woorde aan die Etiopiër in Handelinge 8:37 (die Ou Vertaling; in die Griekse teks wat
gebruik is vir die Nuwe Afrikaanse Bybel kom vers 37 nie voor nie). Geloof is nie maar 'n wens of
blote hoop wat gekoester word nie, maar die besluit van 'n mens om met sy hele wese die
beloftes van God aan te gryp, hom daarmee te vereenselwig en sy lewe daarop te bou.
Gee Hebreërs 11:1 se definisie van geloof in u eie woorde weer.
Vie iemand wat glo, is dit 'n uitgemaakte saak dat God ook in sy geval sy belofte gestand sal doen.
En omdat Hy daardie oortuiging het, sal hy ook 'n vurige begeerte ondervind en 'n onwankelbare
vasberadenheid openbaare om dit wat hy glo, in besit te neem. So was dit die geval met die blinde
Bartimeus in Markus 10:46-52, die Kananese vrou volgens Matteus 15:21-23 en elkeen wat deur
geloof verkry het wat deur die Here belowe is. Wanneer iemand ten volle oortuig is dat die Here
hom met die Gees wil vervul, sal hy 'n onblusbare ywer en onwankelbare vasberadenheid aan die
dag lê om dit te verkry. So iemand sal in die woorde van Jakob bid: Ek sal U nie laat gaan tensy my
seën nie (Genesis 32:36).
Ware geloof is dus nie 'n passiewe houding nie, maar 'n besluit en ingesteldheid van die gelowige
mens.
In Jakbus 2:14-26 word geleer dat geloof sonder werke dood is, terwyl ware geloof uit werke
geken word. Wat sal die mens wat glo, doen wanneer hy bid vir die vervulling met die Gees?
Wat doen die mens wat bid vir die vervulling met die Gees? Hy soek die aangesig van die Here, hy
aanbid God met hart, siel en verstand. Hy dank Hom vir wat Hy is en doen. Hy sê wie God is en
wat Hy vir hom beteken. Iemand wat die Here in Gees en in waarheid aanbid, word in die
teenwoordigheid van die Here toegelaat. Hy sal met die Almagtige gemeenskap hê. En dit is die
plek waar die Here die mens met sy Gees vervul - waar daar gemeenskap tussen God en mens is.
As jy nie weet hoe om God te aanbid nie, lees die Psalms en gebruik die woorde wat daar
voorkom, as lofuitinge uit jou eie hart.
VOLKOME OORGAWE
'n Verdere voorwaarde vir die vervulling met die Gees, wat ten nouste met geloof saamhang, is die
13

mens se oorgawe aan die Here. Dié oorgawe is 'n vrywillige en blye handeling van die jant van die
mens.
Wat is volkome oorgawe? Hoe sou u dit beskryf?
Dalk meen sommige oorgawe beteken om passief voor die aangesig van die Here te lê en te sing:
my alles op die altaar. Dit is egter nog nie oorgawe nie, en in dieselfde houding mag selfs
eiewilligheid en innerlike verset skuil. As iemand gearresteer word, en geen weerstand bied, maar
ook geen samewerking gee nie, sodat die geregsdienaar die gearresteerde moet wegdra, is dit nie
oorgawe nie. Dit is eerder lydelike verset, en word gestraf as dwarsboming van die gereg.
Volkome oorgawe beteken om gewilliglik te doen wat die persoon aan wie jy jou oorgee, verlang
dat jy sal doen. Om volkome aan die leiding van die Gees oor te gee beteken om te doen wat die
Here van jou vra. En dit des te meer omdat die Here ons as sy medewerkers beskou. Vandaar die
voorskrifte wat ten opsigte van die werking van die Gees in ons lewe gegee word in 1 Korintiërs 12
en 14, en ander Skrifgedeeltes.
Wie het volgens Handelinge 2:4, 10:46 en 19:6 in tale gepraat - die Gees of die dissipels?
Die Gees werk die drang in die binneste, maar dit is die dissipels self wat uiting moet gee aan dit
wat in hulle gewerk het. Dit is steeds die mens se reg om te weier om gehoor te gee aan die drang
wat die Gees werk. Dit is nie die Gees wat deur 'n mens se spraakorgane spreek nie, soos wat ons
deur 'n mikrofoon praat nie. Wat die mens moet doen, is om uiting te gee aan die sterk, heerlike
drang om Christus te verheerlik.
Volkome oorgawe beteken ook om om jou eie "metode" oor te gee en te praat soos die Gees dit
in die mens se hart werk. Die Gees kan ook gebind word deurdat ons sy werking by ons manier wil
inpas. Aan die ander kant kan die Gees se werking ook aan bande gelê word deurdat ons namens
Hom wil praat en doen. Dan probeer die mens vreemde geluide vorm.
Veel eerder moet ons wag op die Here wat op sy eie tyd en manier die begeerte in die mens se
hart sal werk om Jesus te veheerlik. Die belangrikste is: kom in kontak met die Here.
Dikwels vind die mens dat hoe langer en meer gereeld hy in die teenwoordigheid van die Here
vertoef, die drang om Christus te verheerlik al sterker word. Dan vind die mens later dat sy
woorde nie meer 'n goeie instrument is om te sê wat in sy hart opkom nie. En dit is ook 'n
definisie van die spreke in tale: om die Here te verheerlik en te aanbid, verby die verstand se
beperkte vermoëns. Want dit is 'n feit dat ons woorde te beperkend is om iets oor die mens se
Skepper te sê. Sy grootheid kan nie na behore besing word met menslike tale nie. Veel eerder sal
die ebgele se tale, wat Johannes telkemale in sy visioene op Patmos hoor wanneer hy die troon
sien, gebruik kan word - lees ook 1 Korintiërs 13:1.
14

Dalk kom die drang om die Here te aanbid, so skielik en oorweldigend, tydens 'n erediens of
biduur of in die binnekamer, dat die mens in daardie selfde oomblik vind dat jy besig is om die
Here te verheerlik op 'n wyse wat jy nooit vroeër ondervind het nie.
As u in die Gees gedoop is, hoe het dit met u gebeur - skielik of na lang afsondering?
Wanneer 'n mens besef dat jy besig is om die Here te aanbid in gedagtes en woorde wat jy nooit
vroeër gedink het nie, maar wat spontaan uit jou binneste opborrel, dan weet jy dat die
Pinksterbelofte ook in jou lewe waar geword het. En dit lei tot groot blydskap - God het immers
by jou intrek geneem!
STRUIKELBLOKKE IN DIE WEG
Wat verhinder soms dat gelowiges sukkel om met die Gees vervul te word? Dit is reeds genoem,
maar opsommend word die sake genoem wat kan veroorsaak dat ons nie die volle seën ontvang
wat die Here vir ons bedoel en belowe het nie.
< Ongeloof - die belofte is nie vir my, of vir ons dag bedoel nie
< Selfgenoemsaamheid - ek het dit nie nodig nie
< Vrees - vir "Pinkster", of 'n valse ondervinding, vir snaakse en onbetaamlike gedrag of vir
mense en wat hulle sal sê
< Negatiewe ervarings van die verlede - toe iemand dalk vir u gebid het en niks gebeur het
nie
< 'n Verkeerde opvatting - dat die vervulling met die Gees die kroon op heiliging is, eerder as
'n toerusting sodat ons die pad van heiliging kan loop
< Verkeerde verwagtings - ek gaan van my voete afgevee word, en neerslaan of begin dans.
As u nog nie gedoop is met die Gees nie, is een van dié struikelblokke dalk op u van toepassing?
Wat meen u staan in die pad om die Here in al sy volheid in u lewe te ontvang?
Die Here gee vir ons sy Gees, nie omdat ons sy teenwoordigheid in ons lewe waardig is nie nie,
maar omdat ons sy Gees so nodig het om waardig sy teenwoordigheid in ons lewe te wandel!
15

16
Lesing 5 : Diensbaarheid aan die Heilige Gees
Pinkster beteken om deur die Gees te wandel (Galasiërs 5:16). Ongelukkig is daar baie wat getuig
dat hulle met die Gees vervul is, terwyl hul lewe 'n ander deuntjie sing. Die Heilige Gees word aan
ons geskenk as toerusting vir 'n lewe van diensbaarheid. Dit is moontlik om met die toerusting te
sit, maar niks daarmee te doen nie. So 'n mens het die Gees ontvang, maar daar het dit opgehou.
Dit plaas nie 'n vraagteken agter die egtheid van die ondervinding met die Heilige Gees nie, maar
beteken slegs dat so 'n mens nog nie geleer het wat dit beteken om diensbaar aan die Gees (en
Christus se saak op aarde) te wees nie.
1.'N MIDDEL TOT 'N DOEL
Die Here verwag dat 'n mens nie slegs sal soek na die eenmalige ervaring met die Heilige Gees (die
doop of vervulling) nie, maar daagliks 'n Pinksterervaring sal hê en 'n Pinksterlewe sal lei. Die doel
van die vervulling met die Gees is nie bloot om die mens 'n wonderlike, ekstatiese ervaring te laat
hê nie. Die Gees neem intrek in die mens met die doel om so iemand tot 'n magtiger en heiliger
lewe in die Here te lei.
Lees gerus Johannes 15:26.-27. Wat sê dit vir u oor die Geesvervulde lewe?
Die Pinksterondervinding is die deurgang tot 'n geestelike lewe waarin 'n mens 'n kragtige
(bekragtig deur die Gees) getuie van Christus kan wees.
Welsiwaar is die Pinksterervaring 'n wonderlike openbaring van die heerlikheid van God aan die
mens, maar daar wag nog talle ander wonderlike openbarings vir diegene wat nie by 'n enkele
ondervinding stilstaan nie, maar doelbewus hul Pinkstertoerusting tot eer van God aanwend.
Dit is moontlik om met die Gees vervul te wees maar nie daardie mate van diensbaarheid te bereik
waardeur die Geestesgawes deur 'n mens openbaar word nie. Die vervulling met die Gees is nie
die einddoel nie, maar 'n middel tot 'n doel, naamlik die volle openbaring van Christus in en deur
die mens.
Wat word bedoel daarmee om te sê die Gees wil Christus in en deur ons openbaar?
Die Heilige Gees neem nie intrek in die mens sonder om iets te wil doen nie. Die Gees is nooit
passief nie, maar is die magtigste werkende krag van alle ewigheid af. Daarom wil Hy nie alleen
die gelowige beseël as kind van God nie, maar begeer Hy om van die gelowige 'n magtige
medewerker van God en getuie van Christus te maak. God wil groot dinge doen, maar Hy soek

mense wat dit vir Hom doen, mense wat hul lewe gebruik om sy wil te doen.
Lees Romeine 6:13 en Handelinge 1:8. Waarvoor roep die Here u?
Wetenskaplikes leer dat die atoomkrag wat in die liggaam van een mens opgesluit is, gelyk staan
aan miljoene perdekrag. Dog, prakties gesproke, beteken daardie krag niks, omdat dit nooit tot
openbaring kom nie. Eers wanneer iemand gewillig is om sy liggaam op te offer en elke atoom
daarvan gesplits sou word, sal die wêreld baat hierby kan vind. Oneindig kragtiger en heerliker is
die krag wat in 'n Geesvervulde lewe is - die Gees van God woon immers in so 'n mens se liggaam
en gees. Waar God teenwoordig is, beteken dit dat al die skeppingsmag in die heelal
gekonsentreer is. En die Heilige Gees stel God in ons lewe teenwoordig. Dog hoe word daardie
mag nie in ons lewe gebind nie! God wil baie meer doen as wat ons ooit kan dink of verwag of bid,
maar as gevolg van geestelike louheid, of onwilligheid, of onverskilligheid is ons nutteloos in sy
hand. Wat nodig is, is dat ons onsself soos Paulus sal dood ag, om onsself daaglike heelhartig en
selfopofferend aan die Gees diensbaar te stel, sodat God se almag deur ons lewe sal werk om ons
wêreld ten goede te verander.
2.DIE MENS AS MEDEWERKER VAN DIE HEILIGE GEES
Die Heilige Gees gebruik die mens nie as willose instrument nie. Die mens kan egter ook nie die
Gees manipuleer en gebruik nie. By die werking van die Gees in die lewe van die mens verloor nie
een van die partye sy identiteit nie, maar tree hulle op as medewerkers, as vennote (1 Korintiërs
3:9). Daarom bevat elke openbaring van die Gees in die lewe van 'n mens 'n goddelike sowel as 'n
menslike bydrae.
Die bydrae van die Gees is volmaak en nooit aan kritiek onderworpe nie. Vanweë die
onvolmaaktheid van die mens is sy bydrae ook onvolmaak en aan kritiek onderworpe. Dit verklaar
waarom openbarings van die Gees soms waardeloos (1 Kor 13:1-2), onvanpas (1 Kor 14:16-20) en
onordelik (1 Kor 14:23) kan wees. En dit verduidelik ook hoekom die openbaring beoordeel moet
word sodat, as die skoen nie pas nie, dit agter gelaat kan word. Vir dié rede kan ons nie alles vir
soet koek opeet wat volg op die woorde: so spreek die Here nie. Trouens, ek is van mening dat dit
dalk goeie maniere is om nie die woorde SO SPREEK DIE HERE te gebruik wanneer ons meen die
Here deur ons spreek nie, omdat dit die gewete van mense bind sodat hulle nie kan beoordeel of
die woord werklik van die Here gekom het nie. Gelowiges met die gawe van beoordeling van
geeste is 'n Godsgawe aan die gemeente om die gemeente teen dwalinge te bewaar wat in die
vorm van "Geestesopenbaring" kom. In die beoordeling, volgens 1 Kor 14:29, val die soeklig nie
op die openbaring van waarheid deur die Gees nie, maar op die menslike reproduksie van die
waarheid.
Om dit te illustreer, dink aan 'n foto. Dieselfde beeld kan op twee foto's baie verskil, afhangende
van die kwaliteit van die kamera en film, en die behendigheid van die fotograaf. Net so kan
iemand 'n goeie reproduksie van die oorspronklike wat deur God in sy hart gewerk het, bied,
terwyl 'n ander mens weer 'n swakker reproduksie kan bied.
17

Wat maak die verskil? In die mate wat die mens as geheiligde, toegewyde en oorgegewe
medewerker optree, in dié mate sal die openbaring suiwer wees.
Hoe dink u behoort ons op te tree teenoor iemand wat die woord van die Here wil bring, maar ons
onderskei dat dit nie 'n egte openbaring is nie, of ons sien raak dat dit slegs 'n dowwe
weerspieëling van die gedagte van die Here is?
3.DIE WOORD EN DIE GEES
'n Mens lees die Bybel en dan word jy bewus dat die woorde lewend word, dat dit toegepas word
op jou lewensituasie. Dit is die werk van die Gees wat daardie Woord lewend en kragtig maak,
skerper as 'n swaard wat na albei kante toe weg- en regsny. Grondige kennis van die Bybel, gebou
op daaglikse omgang met die Woord is 'n voorvereiste vir die mens wat 'n medewerker van God
wil wees. Die Gees sal die waardhede van die Woord kragtig in jou lewe openbaar, en so jou tot
getuie maak.
Hoe gereeld lees u Bybel? Hoeveel tyd spandeer u aan die lees van die Bybel? En hoe lees u Bybel
- tel u spoelgoud op die oppervlak op, of delf u dieper in om die groot waarhede te ontdek?
Die Gees se werk is ook om ons aan alles te herinner wat Jesus gesê het, en Hy doen dit op die
regte tyd - sien Johannes 14:26) Dit is selde dat die Gees iets in die lewe van die mens werk wat
die mens nie vooraf geken en geglo het nie. Ondervinding leer dat die mens wat magtig in die
Woord is, ook magtig in die Gees is.
Wat leer die opdrag van Kolossense 3:16 u?
Volgens die Bybel sal 'n mens wat diensbaar aan die Gees is,
< lewe ooreenkomstig die Woord van God
< uitmunt tot opbouing van die gemeente
< heilig lewe, dit is afgesonderd vir God
< hom beywer om deur die Gees gebruik te word (1 Kor 12:31).
Die doel van die gawes is:
< om Jesus Christus te openbaar en te verheerlik
18

as toerusting van die gelowige in sy bediening as 'n getuie van Jesus Christus
< as tekens om die teenwoordigheid van God en die waarheid van die evangelie te bevestig,
veral met die oog op die bereiking van nie-Christene
< tot stigting van die gemeente as geheel en in 'n beperkte sin ook van die individuele
gelowige in sy private aanbidding
< om die erbarmende liefde van die Here met die mens in sy veelvuldige behoeftes te
demonstreer.
VERVUL met die Gees, DIENSBAAR aan die Gees en KRAGTIG in die Gees - dit is jou erfenis. Neem
dit vandag nog in besit tot jou eie geestelike opbouing, tot heil van ander en tot eer van God!
19

20
Lesing 6: Die gawes van die Heilige Gees
Hoeveel gawes is daar? En wat beteken elkeen van hulle? Hier wil ons kortliks die gawes wat in
die Nuwe Testament aangestip word, uitwys, om by elkeen verklarende aantekeninge te gee.
Skrifgedeeltes wat geraadpleeg kan word, is Romeine 12, 1 Korintiërs 12, Efesiërs 4 en 1 Petrus 4.
Hoeveel gawes van die Gees word in die Nuwe Testament genoem?
Meen u dat die gawes van die Gees beperk is tot dié wat in die Nuwe Testament genoem word, of
kan die Gees ook ander gawes in ons dag skenk na behoefte?
1.Spreke in tale
Seker die bekendste is die spreke in tale, omdat dit gewoonlik in verband met die vervulling met
die Gees gebring word. Daarmee word bedoel dat die mens 'n nuwe taal ontvang waarmee hy
direk, sonder bemiddeling ( en die beperkinge!) van die moedertaal met God kommunikeer. Dit is
'n taal van lof en aanbidding, juis omdat ons eie taal so gebrekkig is aan woordeskat vir dié doel.
Dit hoort gewoonlik in die binnekamer, en bestaan daaruit dat 'n mens met God intieme
gemeenskap hou. Dit kan egter ook by uitsondering in die erediens plaasvind, maar omdat dit
daar nie gaan om die opbouing van die individu nie, moet dit met uitleg gepaard gaan. As daar nie
uitleg is nie, moet die talespreker stilbly en in sy binneste God loof.
2.Die uitleg van tale
Waar talespraak in die erediens voorkom, moet daar 'n uitleg wees. Dit kan dieselfde persoon
wees wat in tale gepraat het wat dit ook uitlê (hy moet bid vir die uitloeg), of iemand anders. Die
"uitleg" is eerder 'n interpretasie van wat die persoon meen die gedagte van die Here is, en kan
daarom in lengte verskil van die talespraak. Omdat talespraak gesprek met God is, kan die uitleg
in gebedsvorm wees.
Is talespraak se uitleg nie dalk dikwels eerder profesie nie?
Watter nut het die spreke in tale in u lewe gehad tot nou toe?

3.Profesie
Dit is 'n woord van God wat bemoedig of waarsku. Dit kan baie vorms aanneem, en kan dikwels
ook van die kansel af kom, in die vorm van die verkondiging.
Hoe weet 'n mens dat die Here jou wil gebruik om 'n woord tot sy gemeente te spreek?
4.Gawes van gesondmaking
Wanneer vir siekes (oor die hele spektrum van siektetoestande) gebid word, vind genesing plaas
omdat die Gees genees. Dan is dit nie die geloofsgeneser se gebed (gebedsgenesing) wat genesing
bring nie, maar die Here wat 'n gawe skenk om die genesingswerk tot stand te bring (goddelike
genesing).
Het u geloof om vir 'n ernstige siek mens te bid? Sal u geloof hê as u onthou dat u aandeel is om
te vra, en die Here se aandeel is om die werk te doen?
5.Onderskeidinge van geeste
Dit is die gawe om te onderskei of 'n openbaring die werk van die Gees is, of 'n ander gees, hetsy
'n bose of menslike gees.
6.Geloof
Dit is meer as geloof in God tot saligheid; dit dui eerder op 'n sterk geloof wat deur die Gees
gewek word dat God iets groots, 'n wonderwerk gaan doen.
7.Werkinge van kragte
Dit word gewoonlik in verband met die uitdrywing van demoniese magte gebring, waar kragte
gebind en weggestuur word.
Die bespreking van die gawes illustreer hoe nodig ons die Gees in ons daaglikse lewe het sodat ons
getuies vir Christus kan wees. Op watter terrein van u persoonlike toerusting as getuie meen u
het u die Gees die nodigste?
8.Woord van wysheid
Dit is die wysheid hoe om in 'n spesifieke situasie op te tree, soos deur die Gees openbaar.
9.Woord van kennis
Dit is 'n brokkie noodsaaklike maar ontbrekende kennis wat 'n mens in staat stel om die regte
21

esluit te neem of op die regte wyse op te tree, nadat dit deur die Gees geopenbaar is.
Hoe kan u in u daaglikse lewe 'n woord van wysheid of kennis benut? En het u al daarvoor gebid?
Die volgende vyf gawes, wat in Efesiërs 4:11 genoem word, is mense, individue wat deur die Here
vir 'n spesifieke taak toegerus word. Wat is die doel van die Here om dié gawes aan sy gemeente
te gee? Raadpleeg Efesiërs 4:12 vir die antwoord.
10.Apostels
Dit dui op die gawe aan die vroeë Kerk (en ook in ons dag) van mense wat oor kontinente en
denominasionele grense heen leiding neem om die Kerk te versterk en op te bou, en opnuut op
God se pad te lei.
11.Profete
Dit dui dalk op mense wat 'n reputasie begin opbou het dat hulle woorde dikwels 'n goeie
reproduksie van God se gedagte is, en wat vertrou kan word om leiding te gee.
12.Leraars
Dit dui op mense wat die gemeente kan onderrig in die waarhede van die Woord.
13.Evangeliste
Dit dui op mense wat deur God geroep en toegerus is om die evangelie op groter skaal uit te dra
aan onbereiktes (wat dikwels in ons midde leef).
14.Herders
Herders is die wagters wat die gemeente oppas en beskerm teen diewe en wilde diere.
Is u dalk 'n gawe aan die gemeente, as herder van 'n SELGROEP, leraar in die Sondagskool, of
evangelis? Besef u watter groot verantwoordelikheid op u skouers rus - God het u geroep? Hoe
kan u met groter oorgawe dié verantwoordelikheid uitleef?
15.Dien
Dit beteken waarskynlik om die gemeente of koninkryk te dien, wat gesien moet word as 'n
genadegawe omdat dit vir God gedoen word en in die krag wat Hy verleen. Lees 1 Petrus 4:11.
Dalk is u gawe om te dien. Maak dit u dienswerk van minder waarde, omdat daar nie veel kalklig
aan dit verbonde is nie?
22

16.Preek / verkondig
Dit dui op die taak van toerusting van die gemeente in en deur sy eredienste, asook die
SELGROEPE.
17.Onderrig gee
Dit is die genadegawe om die waarhede van die Woord en evangelie aan mense op so 'n wyse
voor te hou dat hulle dit snap en geloof in hul harte gewerk word om God te vertrou.
18.Bemoedig
Dit dui op die genadegawe om mense met dit wat ons sê, te bemoedig op die geloofspad. Lees
Hebreërs 3:12 en 10:24.
Dit is moontlik die genadegawe wat elke Christen die meeste kan gebruik. Het u al u lewe in die lig
van dié gawe beskou?
19.Gee
Om te gee is ook 'n genadegawe omdat alles wat ons ontvang het, van die Here af kom, maar ook
omdat die Here eers 'n mens se hart moet oopmaak en jou van selfsug moet bevry voordat jy kan
gee. Die Here gee ook aan sommiges die vermoë om sy werk te kan dra deurdat hulle baie het.
20.Leiding gee
In die gemeente en in evangelisasie-aksies moet dikwels leiding geneem word om die belange van
die gemeente en koninkryk te dien, en ook dit is 'n genadegawe wat die Here aan mense wil gee
wat van Hom en sy leiding afhanklik leef.
Wat meen u is die voorwaarde dat 'n talent, soos om leiding te gee of te help, of 'n aangeleerde
deug soos om onderrig te gee, 'n Geestesgawe sal word?
21.Help
Om ander te help word 'n gawe wanneer jy die leiding van die Gees volg in jou hulp aan ander.
Die persepsie bestaan dikwels dat die Geestesgawes iets bonatuurliks is. Soms is dit, veral
wanneer die openbaring van die Gees in die erediens plaasvind. Maar die Here het bedoel dat
ONS LEWE 'n genadegawe aan ander mense sal word, deurdat ons volledig in sy diens staan. Dit
sal gebeur wanneer ek sy gedagtes begin dink en sy wil met my lewe doen.
23