Download pdf - Textualscholarship.nl

554 Het Wiesbadense handschrift folio 115va-116rb
372
376
380
384
388
392
396
400
404
sijn dode dinc ende ongelove der werelt. Wet dat alle die nu die beelden
oefenen ende aenbeden ende daer aen geloven, dat sijn jongeren al
der gheender die de martelaren daden doden ende die de heiligen versmaedden
ende bienen uter synagogen, gelijc dat sij noch versmaden
ende haten alle gerechtege liede ende arme, afgescheidene menscen
daer si niet ane en winnen. Maer sondaren ende ongelovige ende rike
lieden daer si maeltiden of giften af hebben, die minnensi ende eerense.
Ende leckerers ende oncuyscheren der werelt, die nemen exempel
ane prelaten | ende ane geleerde.
Hi sprac: Sij sijn geset over tvolc alse herden over haer scape.
Si sprac: Die getrouwe herde set sine siele voer sijn scape, maer die
huerlinc vliet als hi den wolf comen siet. Het es menich goet scaep verloren
bij quaden herden, want die huurlinc en soect niet dan melc ende
wolle, dat es gevoedt ende gecleet te sine. Maer der scape en roect hi
niet, want hi es een huurlinc ende die scape en bestaen hem niet. Al soe
wet dat sij alle huerlinge sijn die prelatien oft provenden gecrigen met
gelde ende met machte van heerscapien. Dese die soeken gevoedt ende
gecleet te sine ende groten staet te houdene, maer si en hoeden noch en
voeden haer scape niet, want si en leeren haer volc niet met woerden
noch met levene.
Hi sprac: Die prelate ende rike prochiane die setten andre in haer
stede die tvolc leeren ende cureren die sacramente.
Si sprac: Dat sijn al huerlinge, ende die huerlinge en roeken der scapen.
Ende dit scijnt ende sal schinen: het en waren noyt soe vele papen
ende leraren alse nu sijn, ende tvolc en leefde noyt soe sondelic. Si prediken
der heiligen leere ende haer leven, maer daer na en doen si selve
niet. Maer die meest dien navolgen dat si prediken, dien haten si ende
versmaden. Ende si sorgen dier menscen yet te wors te hebbene, om
dat dier menschen leven afgesceidenre es ende si den lieden betre beelden
voerdragen dan die geleerde.
Hi sprac: Het gaen dicke liede in heligen scine.
Si sprac: Dats waer. In allen state vintmen geveynsde liede: in herenhove,
in cloestere, in kerken, in vierscaren, in geslachten, in ge buer -
ten, in | beghinen ende in armen schine.
Hi sprac: Alsmen den lieden leert die gebode ende dewangelien
ende hem die ontbint, daer mede quijt hem die prochiaen wel ende die
lereren, want si en connen tvolc niet gedwingen.
B 370/3 cf. Joh. 12:42, Joh. 9:22 380/1 Joh. 10:11-12
115vb
116ra
V 373 bienen: ‘verjoegen, verbanden’; verl. tijd van bannen 384 bestaen hem niet: ‘behoren hem niet toe’
P 401 dats waer: door de kopiist boven de regel toegevoegd, met invoegteken op de regel.