Download pdf - Textualscholarship.nl

550 Het Wiesbadense handschrift folio 114ra-114vb
216
220
224
228
232
236
240
244
248
252
werc een quaet priester gelijc den goeden. Daer om seg ic dat die priester
om dat werc heilich no salich en is, want hi dat werc mach doen
ende een sondaer sijn.
Hi sprac: Hoerden dit vele papen, si souden u haten ende vermalendien.
Sij sprac: Si mochten my haten ende doden, maer si en hebben gheen
macht my te vermaledyene, want hen mach niement vermaledyen dan
die sonden.
Hi sprac: Oft u die paus verbiene ende al die heilige kerke om dat
ghi hen contrarie sprect.
Si sprac: Ic en spreke niet jegen dat gelove ons heren Jhesu Cristi,
maer die paus ende alle kerken sijn gekeert jegen dat gelove ons heren
Jhesu Cristi. Daer om souden si my haten ende daer omme selen noch
vele martelaren worden, oft de kerstine wet oft tgelove sal te nieute
gaen.
Hi sprac: My es leet dat ghi ons dus jegen sijt.
Si sprac: Ic en ben niet jegen die waerheit.
Hi sprac: Wie es die waerheit?
Sij sprac: Cristus es die wech, die waerheit ende dat leven. Niement
en comt ten vader dan dor hem. Ende wie teenre andre doren in wille
comen toten vader dan dore hem, dat sijn dieve ende mordenaren,
ende si sijn weert ende sculdich der ewiger doot. Ende dat sijn alle die
gene die geestelic goet vercopen om scat ende om ghiericheit ende om
die rijcheit deser werelt. Maer om dat ghi alle uwe goede schinende
werke doet om dese dinc, soe bedrieghdi alt volc, ende ten | lesten sal
die slach op u comen gelijc dat hi quam op Jherusalem. Maer eer dit
gesciet, sal tvolc van erderijc beruert sijn ende in bedruckenissen. Ende
dat een volc sal dat ander bederven. Ende om die overvloyende quaetheit
sal die minne vercouden in vele herten.
Hi sprac: Tijchdi dit ane den papen ende den geleerden?
Si sprac: Uut hem so comes vele, want si hebben den slotel der consten
ende si en loven noch en leeren niet die gerechticheit; daer mede
sluten si hemelrijc voer de liede ende si en comender selve niet in, noch
si en latender niement in comen.
Hi sprac: Die papen en verbieden niement goet te sine noch wel te
doene.
Si sprac: Si en wisen ocht en raden geen doget dan daer si aen winnen,
ende si gedogen vele ongeorloefder dingen om dat sire aen winnen,
ende si laten vele sonden regneren om dat sire aen winnen, want
B 234/5 Joh. 14:6 235/6 Joh. 10:1 241/3 Mar. 13:8 243/4 Mat. 24:12
V 246 uut hem ... comes: ‘uit hen komt voort’: ‘zij zijn er de oorzaak van’
114rb