Download pdf - Textualscholarship.nl

472
476
480
484
488
492
496
500
504
508
34 Questien van eenen goeden simpelen mensche 533
Ic zegghe: Alle vrucht die te vroech ripet es ombequame. Die te vroech
willen weten, spreken ende haers zelves wille ghebruken, die en mo -
ghen niet langhe ghedueren, si en werden beroeft van haren godliken
wille ende van gheesteliker oeffeninge. Si willen te vroech wesen Maria,
te hant contemplieren, ende dat en mach niet sijn. Men moet vele
arbeyden ende leyden eerst ver Maerten leven in heyligher oeffeninge,
wanneer men ontfaet van gode eenen goeden wille. Ende wilmen dien
behouden, soe moetmen in allen oetmoedighen dienst oeffenen een
heilich leven. Allen die leven naden gheeste, die heeten gheestelic; ende
die leven naden vleische, die sijn vleischelic ende waerlic, oec wat abyte
dat si dragen.
[37] Ic vraghe hoemen bekent die goede voer die quade, die soe ghelike
schinen van buten.
Ic zegge datmense kent bider vrucht van haren werken ende niet by horen
woerden. Want menich spre|ket heilighe woordt, die een bose leven
leit. Ende daer omme: bider vrucht van haren werken zalmense bekennen.
Die goede oeffent die doecht, die bose oeffent die boosheit ende
zoect lof ende eere ende es ydel van sinen werken. Ende daer omme en
sal hi anders gheen loon hebben dan hi zoect. Die goede mensche vlietet
lof der weerelt, op dat hi alleene gode behaghe ende hi zijn loon si.
Om ydel eere hevet menich dwaes mensche ziele ende lijf verloren.
[38] Ic vraghe: Wat es ydel eere?
Ic segghe dat anders niet en es ydel lof van dwasen tonghen, dat
wech wayt metten winde. Des mensche lof es ondurich ende ydelheit.
Ic rade allen goeden eenvoudighe luden die in gode willen rusten, dat
si hem ontrecken der waerelt ende bliven buten den luden als si meest
moghen ende bliven in haer eenicheit, want daer zullen si vinden meest
rusten. Aldus soe zullen si scouwen die ydel eere entie verganckelike
ghenoechte der waerelt, die den mensch al trecken van gode. Want
zoectmen solaes van vrouwen, soe wortmen becoort van oncuuscheyt;
soectmen ghenoechte in spise ende in dranke, soe wortmen becoort
van gulsicheit; soectmen voerdeel ende eere, soe wordtmen becoert
van hoverdicheden. Ende ist dat sij rust hebben ende vrede, soe zullen
si een yegheliken laten ghebruken tsine ende becommeren hem met
gode ende pinen hem dien te ghebrukene in harer zielen ende gheven
hem zelven onder allen menschen in gherechter oetmoedicheit ende in
alre doechtsamheit. Dat moet ons verleenen die in drien personen een
warachtich god es, ghebenendijt van eewen tot eewen zonder ende.
Amen.
Benedicamus domino. Deo gratias. |
K 494 dan: toevoeging op basis van Schweitzer, nr. 84, r. 3
108ra