Download pdf - Textualscholarship.nl

456 Het Wiesbadense handschrift folio 91va-92r
1
4
8
12
16
20
24
28
32
[31 GEBED VAN SINT ANDREAS]
Doen die helighe apostel sinte Andries hinc dwaers anden cruce,
ontdaen met sinen armen ende met sinen voeten, doen sprac hi dit
ghebet, als ons sinte Augustinus scrijft.
O soete minnentlike, mijn uutvercoren alder liefste heere Jhesu Criste,
hore mi. Ic bidde u, laet mi niet levende vanden cruce, want het es
nu tijt dat ghijt bevelet der eerden te verteren minen lichame. Want ic
hebbe nu so langhe ghedraghen ende so langhen tijt ghewaket ende bewaert,
want ghijt mi bevolen hadt, dat ict alle tijt oefene soude ende arbeiden.
Hier omme mijn alre liefste heere, waert u wille, so woudic
gaer ne ghevrijt sijn van deser ghehoorsamheit ende berooft van desen
swaren rocke des swaren lichams. O soete heere Jhesu, | ic ghedencke
nu wel, hoe zwaer dat die lichame te draghen es, hoe cranc ende hoe
teeder dat hi te voeden es, ende hoe wreet dat hi mijnre sielen es. O du
minnentlike heere Jhesu, du weets wel hoe dicke ende hoe menich
werven mi mijn lichame ghetoghen heeft van aenscouwinghe dijnre
claerheit ende luterheit. Alle tijt pijndic hem mi te weckene waneer ic
ghenuechlic lach ende sliep in soete ruste dier ewicheit. Dicke hevet mi
mijn lichame bedroevet ende verdriet ghedaen. Want ic dan, o alder
goedertierenste vader, langhe tijt ghevochten hebbe jeghen minen lichame,
die alle tijt jeghen mi gheweest heeft, ende ic dine werken alle
tijt volbracht hebbe na mijnre armer macht, so en bevelic mi minen lichame
niet langher te bewaren. Maer alse icken afgheleit hebbe, so bevelic
te bewaren eenen andren dan mi. Ende ghehenghet mi niet lan -
gher metter vereninghe mijns lichames, maer ghevet der eerden te
bewaren toter tijt toe dat hi loon ontfanghen sal na sijnre verdienten.
Noch biddic u, lieve heere, en bevelet niement te bewaren dan der eerden,
op dat ic niet meer en derf waken noch sorghen voor minen lichame.
Aldus mach ic sonder hinder ende verdriet met rechter vriheit
varen op die fonteine des levens der ewicheit, na welker fonteynen mi
alle tijt ghedorst hevet. Maer leider te langhe heeft mi dat lichaem daer
af ghetoghen ende ghehindert dat icker niet af ghedroncken en hebbe.
Nu blivet hier neder sorghe ende anxt ende arbeit, pine ende verdriet.
Bi u en willic niet langher sijn. Hier es, mijn alre liefste heere ende mijn
behouder, die wille dijn. Amen.
[31]
91vb
P [31] 5/6 Opschrift beslaat de eerste vier regels en is qua schrift en kleur inkt niet te onderscheiden van de
tekst van het gebed.