Download pdf - Textualscholarship.nl

1928
1932
1936
1940
1944
1948
1952
1956
1960
1964
26 Beda, Expositio Apocalypseos 419
Die beeste die du heves ghesien, die was ende es niet. Dat es die
viant die wilen eer prince was over die werelt, ende doe ons heere ghecruust
wert, uutgheworpen es. Maer int einde der werelt sal hi werden
ontbonden vander ghevancnissen sijns kerkers, ende sal vanden gheeste
des monts des heeren vervaren in ewicheit.
Hier es zin die etc. Dat es, inder bediedenissen harer ghedaente die
hierna volcht, so moghedise bekennen ende u daer voer hoeden.
vii hovede etc. Die hovede der beesten sijn die coninghen der werelt,
die overmids opdinghe der hoverdien sijn ghelijct den hoghen ber -
ghen.
Ende waneer hi comt etc. Want ons die heere hoverdich ende cranc
bekent, die daghe die sonderlinghe quaet sullen sijn, die seit hi ontfermelike
vercort te wordene. Quaet, op dat hi die hoverdie ververe; cort,
op dat hi die crancheit | trooste.
Die v sijn ghevallen etc. Want hi inden ghetale van vii bescrijft die
volheit ende dat alinghe wereltlike rike, ende dat leste deel es dat rike
Anticristi dat noch niet ghecomen en es, daer omme scrijft hi dat die v
voerleden sijn, dat es die voerledene tijt des wereltliken rijcs, ende dat
seste es nu jeghenwoerdich, ende dat zevende toecomende.
Die beeste die was ende niet en es, die es die achtende. Anticristi,
die int einde der werelt regneren sal, om die eenheit des lichams der
quadre daer hi thooft af es, so behoort hi toten riken der werelt; maer
om die sonderlinghe ghewout sijnre scalcheit, so wort hi ghehouden
inder erden sijnre eighender stede als die achtende.
Ende die x hoorne die du heves gesien, sijn x coninghen. Dat es,
die rike der werelt te vervolghene die helighe kerke, so en hebben si
noch niet volcomelike haer ghewout ghetoont: want al est dat si nu
vele overheren, dan sal wesen die scarper ghewout harer valscher glorien,
als si ooc met teekenen der vele bedrieghen. Ooc so machmen
verstaen biden x hoornen voerseit x coningen, die sijn sullen als die leste
persecucie ghenaket, ende die werelt dan onder hen deelen selen, als
sinte Daniels prophecie houdt, die seget vander vierder beeste: Ende si
hadde x hoorne. Ende sich, een ander cleine hoorneken es opgegaen
van haren middelte; ende iii vanden iersten hoornen sijn uutghewentelt
van sinen aensichte. Ende Anticristi van Babilonien gheboren, den
coninc van Egipten van Affriken ende Ethiopen sal hi overgaen, die
welke gedoot selen werden, so sullen hem ooc die vii ander als eenen
verwinre onderbughen.
B 1959/63 cf. Dan. 7:7-8
17:8
17:9
17:10
17:11
17:12
80va
V 1936 opdinghe: niet in MNW, vertaling van tumor: ‘zwelling; opgeblazenheid’ (Gryson, 469, r. 13)
1955 overheren: niet in MNW, vertaling van dominare: ‘overheersen’ (Gryson, 471, r. 35)