Ut de 2 Doarpen April 2013

Ut de 2 Doarpen April 2013
Wat wiene wy Nederlânders tûk eartiids,
soms hiene wy de gek mei de Belgen. Dat is
neffens my no oarsom. It gefal wol dat der
nije helikopters oanskaft binne troch Definsje,
mar dy kringen doge net. En no soene wy
der ek noch krekt mei efter de piraten oan.
Lokkich mei wy no in pear âlde tastellen fan
België liene. Mei de nije Fyra treinen is it al
krekt sa. Se ride foar gjin meter en de stikken
blik fleane der nei. No mar wer mei de
âldsjes nei Brussel. Yn 2005 heake it ek al
mar troch dwarsens fan de ambtners kaam
de minister der net efter. Hy wist fan neat! No
rekke ek noch in topman fan Fyra fertocht fan
fraude. In tsjustere saak tinkt my .
Sjochst wol ris nei it programma "Droomhuis
gezocht"? Wat behelpe wy ús dan oan de
Tsjerkewei. Ik moat sizze foar 150 tûzen ha
jo in knap hûs yn it bûtenlân. Mar dan giet
bygelyks de doar nei de âldersliepkeamer
iepen en sjogge wy in opperflakte sa grut as
in skoallelokaal en wat seit mefrou: De kamer
"masterbedroom" is niet echt groot! Tsjonge,
jonge, jonge. Wat libje wy lyts yn ús
keamerke.
De SNS bank soe omfalle mar lokkich hat ús
regear der mei rêdt. Mei boargerjild komme
jo in hiel ein, is't net sa. Rutte hat der
foartendaliks ek mar in nije direkteur tsjin oan
smiten foar 5,5 ton om it spul wer op gong te
bringen. Foar minder kin de minister-presidint
gjin goeie lieders fiene seit er. No wit ik ek
wêrom as it sa no en dan heaket yn ús
regear. Rutte krijt nammentlik mar foech 1,5
ton yn it jier. Neffens in oare minister kinne
bankmeiwurkers wol mei wat minder lean ta.
It is net te filmjen.
Lokkich is der no ek yn It Fean neiskoalse
deibehândeling foar oerstjoere "pubers". Wat
ha ik wat misse moaten yn myn jonge jierren.
Foar, tusken, nei en pjutteropfang wisten wy
net fan. Sels in beukerskoale wie der net.
Hoe binne wy grut wurden tink ik wol ris.
Mids febrewaris hâlde Omrop Fryslân yn de
Trynwâlden ta. De fytsmakker wie al ris yn
byld en no skarrelen se mei in pear
keakeljende froulju de Lange Strjitwei del op
nei de Mûnein. Hoe soe it ek oars sy
bedarren by in 70 jierige ynwenner fan it
doarp dy 't drok dwaande wie mei it feien fan
snie dat noch falle moast. Hy hie wol efkes
tiid. It petear gie al gau wer oer keakeljen en
hintsjes. Op it stuit ferhipte syn plomfee it,
mar de hintsjes fan syn soanen wiene net fan
'e lêch. Lokkich sit er no net sûnder aaien. Ja
filmen ek yn it hinnehok mar it binne gjin
"plofkippen" sa te sjen. Dat witte wy dan mar
wer en ek dat froulju twa dingen tagelyk
kinne: ôfwaskje en kofje sette. Ik tink fan wol
trije want se prate der ek noch by. Do silst
mar H of F hjitte. HEA! hea.
Wittenskippers oan de universiteit te North
Carolina binne der efter dat hoe grutter de
hântekening fan in topman, hoe grutter de
kâns dat syn bedriuw omfalt. Dus tink al
efkes nei by it tekenjen fan dit of dat.
Yn Grinslân lizze de minsken te skuodzjen
op 'e koai. No ha wy in probleem, want it gas
ha wy ferkocht oan de Dútsers. Ik bin benijd
hoe as ús regear hjir de kont wer út draait. Jo
sil der mar wenje. Moai dat de ynwenners
wol foarljochting krije. En de NAM, hij boorde
voort bij Veendam.
No hiel war oars. Altemets rinne de reëen hjir
yn de greide foar hûs te weidzjen. Der binne
in stik as acht, en dan ek noch in pearke
haskes. Wat is de natoer moai as jo it mar
sjen wolle. De bisten binne wol skril foar
minsken mar dat is te begrypen want dat bin
wy ek sa stadichoan.
De bou fan in super te Starum wie stil lein om
't der in wetterspitsmûs om skarrele. No nei
in pear moanne hat it mûske de kuierlatten
nommen en kin de timmerman wer los. Wa
betellet de man syn skea, Mariane?
Keunstskilder Paul Bos hat nei twa jier syn
projekt ûlen yn Galerie Feankleaster te
hingjen. Om 't ik regelmjittich wurk fan him yn
de famylje tsjin kom en it eltse kear wer
bewûnderje soe ik sizze: Dat moat jim net
misse !
By in brân te Blije is astbest frij kommen. Mar
dat spul kin op it stuit net opromme wurde
want der sit winter yn de groun. De Hege Dyk
is ôfset en de bewenners moatte troch de
efterdoar nei bûten. Dat it mar gau teiwaar
wurde mei dan is it hiem wer wiet en
smoarch. Snappe jo it noch?
Yn Nederlân snije de boeren ûnder. Se ha
gjin departemint en prioriteit mear, en falle no
ûnder economyske saken. Der sit noch mar
ien boer yn de Twadde Keamer. Mar sa seit
men, boeren en túnders fertsjinje de romte
om te ûndernimmen. Mooi sein! Biste
wolwêzen is no it stopwurd. Earder wie ús
lân in suvellân mar no in soarte fan nasjonaal
park. Der emigrearje ferskate boeren en dat
hâld yn wer minder wurk yn de meganisaasje
en stâlbou. It is net te kearen en dus hâld ik
no ek mar wer op mei myn ge-eamel.
Ut de 2 Doarpen 13 Mûnein/Readtsjerk