WONDERS PER DOSYN. - Die Gereformeerde Kerk Bellville

√P
41
REDDING NET VAN DIE HERE
Jona 2 : 9
Lees 1 Kor 15
Onmiddellik lees ons:" Toe beveel die HERE die vis, en hy het vir
Jona op die vasteland uitgespoeg".
Dit was ook God se antwoord op Jona se belydenis :" hulp kom nét
van die HERE af... ".
Daar is ontsettend baie ellende in die wêreld. Daar is so baie verdriet
en rou hartseer dat ons as gelowiges dikwels verstom staan, ja met 'n
mond vol tande as die ongelowiges vir ons sê : nou toe nou en waar is
daardie God-van-liefde van julle wat al hierdie helse ellende
toelaat ?... Dan gebeur dit dat baie christene senuweeagtig rondskarrel
en God probeer verdedig deur te sê dat God die ellende nie laat kom
nie, maar dat dit die werk van Satan is.
Natuurlik steek daar iets in. Die terroriste wat moorddadig optree
word deur Satan beheers en so beheers Satan almal wat duiwelse leed
veroorsaak. Maar daarmee is nie alles gesê nie. God bring ook leed en
ellende en die kwaad soos ons lees in Amos 3 : 6 - "Sal daar 'n ramp
oor 'n stad kom as die Here dit nie gebring het nie?" Boonop laat God
toe wat Satan doen.
Hoekom? Een van die redes is dat Hy dit nie toelaat dat die mens van
Hom af wegdros nie. Daarom stuur Hy hartverskeurende hartseer
maar Hy doen dit in sy goedertierenheid om die wêreld sover te kry
dat Hy weer opgesoek word en daar weer geleef word in sy
ampsdiens. Agter al die verdriet lê God se liefde wat wil RED ! As
ons dit tog maar wil sien en op ons knieë wil gaan, dan is die redding
baie nader. Die Groot Jona, Jesus Christus is die lewende bewys : alle
redding kom nét van die HERE af.
Dit is ons taak, ons ampsplig om daardie boodskap uit te dra. Die
redding lê klaar reg in Jesus die Christus en Hy as Gekruisigde.
Ons moet dit in die Nineve van vandag , in die wêreld sê. Moeilike
swaar werk ? Ja, maar u Redder-God beloof u al sy hulp deur die
werk van die Heilige Gees.
Hy het ons uit die grootste nood gered, selfs uit die dood deur Jesus
Christus . En toe het dit Paasfees geword - deur Sy krag is ons
opgewek tot 'n nuwe lewe. 'n Nuwe lewe met Sy krag. Dit is genoeg
vir elke dag. Genoeg om dankbaarheidswerke voort te bring.