Sondag 1 Mei 2005 Bid vir groter bewustheid van gebed Vandag is ...

Sondag 1 Mei 2005
Bid vir groter bewustheid van gebed
Vandag is die begin van ’n besondere maand in die geskiedenis van wêreldwye gebed.
Loof die Here vir die verspreiding van die evangelie onder die nasies. Bid dat Hy oor die
volgende 14 dae groot deurbrake sal bring, sodat mense uit elke volk en stam, taal en
nasie sal kan saam bid op die Wêrelddag van Gebed op 15 Mei vir die redding van
verlore mense (Wêrelddag van Gebed, tel.: 021-907 1300, webtuiste:
www.globaldayofprayer.com, e-pos: info@globaldayofprayer.com).
Huwelike tussen persone van dieselfde geslag?
Daar is ’n Christelike organisasie wat die staat se regspan bystaan wanneer die appèl
oor homoseksuele huwelike op die 17 de van hierdie maand voor die konstitusionele hof
dien. Die saak gaan daaroor dat die konstitusionele hof die uitspraak van die Appèlhof
tersyde moet stel waardeur homoseksuele huwelike gewettig is. Bid vir hierdie span wat
besig is om ’n dokument op te stel waarin hulle die wetenskaplike, mediese en
sielkundige aspekte, asook die sentrale fokus op morele (insluitende Bybelse) waardes
van Suid-Afrikaners wil uitspel (tel.: 033-347 1911, faks: 033-347 1915, e-pos:
spillay@ae.org.za).
Maandag 2 Mei 2005
Bid vir groter bewustheid van gebed (vervolg)
Daar is nog deurbrake nodig wat betref die uitsaai van die Wêrelddag van Gebed op TV,
radio, Internet, ens. Bid asseblief vir elektroniese ingenieurs vir insig en genade om die
nodige skakelings reg te kry vir die uitsaai van die Dag van Gebed en die koppeling
tussen die vergaderplekke en die uitsaaistasies op daardie dag. Bid dat die Here guns
sal gee by elke moontlike instansie wat hierdie gebeurtenisse kan uitsaai, en dat waar
dit enigsins moontlik is, dit selfs gratis gedoen sal word.
Verkiesing in Engeland
Ten tye van ter perse gaan, was die datum van Engeland se verkiesing nog nie bekend
nie. Omdat hierdie land soveel invloed het, veral op die wêreld se ekonomie, laat ons bid
dat hulle ’n vreedsame verkiesing sal hê. Bid vir elkeen wat verkies of herkies sal word
vir ’n persoonlike ontmoeting met die Here Jesus. Bid vir hulle redding, sodat hulle
toegewyde lewens sal lei en dat hulle die Here se doelwitte sal ken en daarvoor sal werk
in die nuwe termyn wat vir hulle voorlê.
Dinsdag 3 Mei 2005
Fokus op die Wêrelddag van Gebed : 15 Mei 2005
Oordenking: die Geheim van my verhouding met die Here eerste
Jesus antwoord hom: “Jy moet die Here jou God liefhê met jou hele hart en met jou hele
siel en met jou hele verstand” (Matt.22:37-38). Die Heilige Gees is absoluut daarop
ingestel om hierdie eerste gebod die belangrikste plek in ons lewe te gee. Kom ons dink
na oor waar ons identiteit eintlik lê. Wat sou gebeur as ek en jy vandag skielik
weggeneem sou word uit die werk wat ons vir die Here doen? Wat sou gebeur as jy
skielik jou stem sou verloor en nie meer kon sing nie, of nie meer kon skryf of praat nie?
Nog erger, wat sou gebeur as jy skielik die begeerte sou verloor om vir die Here te
werk? Dis nie verkeerd om dit te geniet om mense te bedien nie, maar dit kan gebeur
dat dit vir ons meer vervulling bring as die waarde van die liefde wat Hy vir ons en ons
vir Hom het. Leer die geheim aan om in die eerste plek vir Hom lief te wees en dan sal
Hy jou lamp op ’n staander sit as Hy dit so wil hê (Secrets of the secret place, Bob
Sorge).

Vader, ek erken vandag dat my motiewe in die werk wat ek vir U doen, nie altyd suiwer
is nie. Ek het nodig om my identiteit nog dieper in U te vind. Ek is nie altyd seker hoe om
dit te doen nie. Gee my asseblief hierdie week genade en lei my oor hoe my identiteit
nog vaster aan U gebind kan word.
Praktiese wenk: Skryf Matt.22:37 volledig op ’n stukkie papier neer. Omsirkel telkens
die woord HELE. Skryf dan onder dit die woorde neer wat die woord HELE volg: hart,
siel, verstand. Maak nou aantekeninge van die dinge in jou hart, siel en verstand waar
liefde vir Jesus kortkom. Dit sal jou help om Sy wil af te bid oor die aspekte van jou lewe
waar jy nog worstel. Oorweeg dit om dit later saam met jou huweliksmaat, omgeegroep
of ’n vertroueling te doen.
Intersessie: Wêrelddag van Gebed
Daar is nog lande waar behoorlike kontak nie gemaak kon word met Christene om deel
te neem aan die Dag van Gebed op 15 Mei nie. Sal jy onderneem om te bid en, as die
Here jou lei, om te vas, sodat daar betyds deurbrake in hierdie lande sal kom. Dit is ook
deel van die Here se belofte oor Sy wederkoms dat elke volk en taal en nasie Hom voor
Sy troon sal kom vereer. Dit is nou ’n tyd van geweldige moontlikhede vir die Koninkryk
van God. Volhard saam met duisende Christene wat dag en nag bid hiervoor.
Woensdag 4 Mei 2005
Bid vir groter bewustheid van gebed (vervolg)
Môre begin een van die merkwaardigste Christelike gebeurtenisse in die geskiedenis,
wanneer die hele wêreld sal begin met gebed en vas vir 10 dae lank. Dank die Here vir
so ’n geleentheid in ons leeftyd. Bid vir deurbrake in elke land om die Christene te
mobiliseer om regoor die aarde te bid op 15 Mei. Bid vir genoeg fondse vir elke
beplande byeenkoms en dat gelowiges nêrens verhinder sal word om te bid nie.
Watse ding is hierdie silwer ring?
The Silwer Ring Thing is die beweging onder jongmense wat hulle verbind tot
onthouding voor die huwelik. Dit trek veral die aandag van tieners om hulle te help
beskerm teen die aanslag van ons seksbehepte kultuur. As deel daarvan neem kinders
’n eed om hulleself rein te hou tot hulle trou. As herinnering vir hulleself en ’n standpunt
teenoor hulle maats, dra hulle dan ’n silwer ring. Dank die Here vir so ’n gebaar in die
“taal” van die tieners wat hulle aanmoedig om hulle lewe rein te hou (tel.: 011-782 4222,
webtuiste: www.silverringthing.co.za, e-pos: srt@wtb.co.za of kyla@wtb.co.za).
Donderdag 5 Mei 2005
Uitreik na tronke
Die Andrew Murray Sentrum in Wellington het nou die geleentheid om sendingopleiding
te gee in tien Bolandse tronke. Hulle begin by ’n eerste vlak van Bybelstudie oor
Evangelisasie. Altesaam is daar elke week meer as 450 mense wat die kursus bywoon.
Daar het werklik ’n gees van vernuwing en gebed begin posvat onder die seuns en die
manne. Dank die Here vir hierdie en soortgelyke antwoorde op die gebede van baie jare.
Bid ook vir meer helpers om hierdie werk waarvoor die Here die deur oopgemaak het, te
ondersteun (Andrew Murray Sentrum, Wellington. Tel.: 021-979 0356 (n/u), e-pos:
dbliss@new.co.za).
“Talking Bibles” bereik ongeletterdes
Die ontwikkeling van die Talking Bible het ’n groot ommeswaai gebrink in die bereiking
van ongeletterdes. So ’n Bybel bestaan uit ’n klankopname van die hele Nuwe

Testament in ’n spesifieke taal. Dit lyk soos ’n Bybel, maar het ’n knoppie wat gedruk
word in plaas daarvan om ’n bladsy om te blaai. Geen kassetspelers is meer nodig nie
(webruimte www.audioscriptures.org). Dank die Here dat Hy Sy Woord bring aan die
ongeletterdes. Bid asseblief dat baie meer tale binnekort opgeneem sal word en op
hierdie wonderlike manier beskikbaar kan wees.
Vrydag 6 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG EEN
Die vernuwende krag van Christus: Die krag van Sy Koninkryk
Hy het…met hulle oor die dinge van die koninkryk van God gepraat. Terwyl Hy ’n keer
saam met hulle aan tafel was, het Hy hulle beveel: “Moenie van Jerusalem af weggaan
nie, maar bly wag op die gawe wat die Vader belowe het soos julle van My gehoor het”
(Hand.1:3-4).
Vir Sy kerk bid ons dat
• ons harte sal brand met liefde en toewyding aan Christus ons Koning.
• ons gedring sal word deur die visie wat Hy gee, dat ons alles sal najaag wat Hy
beloof het.
• almal wat aan die Here behoort deur Christus een sal word, al was ons ook verdeel
en uitmekaar.
Vir ons wêreld bid ons dat
• Christus gelowiges in stede sal oproep waar daar nog nie ’n deurbraak van Sy seën
was nie. Bid dat hulle geduldig sal volhard om God se belofte na te jaag, asook die
vestiging van Sy Koninkryk in moeilike dele.
• die massas in ons stede die wonderlike liefde van Christus ons Koning sal ervaar, en
dat groot dele van die samelewing nuut gemaak sal word.
Vir die jeug
Bid dag-en-nag gedurende hierdie 10 dae, en hou die vuur van intersessie aan die
brand oor die wêreld. Bestel jou Tien Dae Gebedsgids by www.jwipn.com, of bel ons by
012-365 3213 (Tersia of Coert) of e-pos na 24-7sa@jwipn.com.
(Vir meer inligting oor die Wêrelddag van Gebed, skakel 021-907 1300, besoek die
webtuiste: www.globaldayofprayer.com, of e-pos: info@globaldayofprayer.com.)
Saterdag 7 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG TWEE
Gesamentlike gebed: Dat Christene daarin sal volhard
Hulle het almal eensgesind volhard in die gebed (Hand.1:14).
Vir Sy kerk bid ons dat
• die Gees van God ons ’n gesindheid van verwagting en vertroue sal gee, terwyl ons
aanhou bid dat die beloftes oor Sy Koninkryk vervul sal word.
• die Here ons sal saambind in eensgesindheid en ons in staat sal stel om passievol te
bid dat Christus se heerlikheid en liefde aan die wêreld bekend sal word.
Vir ons wêreld bid ons dat

• die mense in ons gemeenskappe aangeraak sal word om tot die Here uit te roep om
in te gryp soos nog nooit tevore nie.
• die leiers in ons gemeenskappe die Here sal vertrou om hulle te lei en te help.
• die Here geëer sal word wanneer Hy die gebede van die armes, die jeug en hulle wat
swaarkry verhoor.
Sondag 8 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG DRIE
Die Gees van Christus: Dat God Sy Gees op ons almal sal uitstort
“So sal dit dan in die laaste dae wees,” sê God: “Ek sal my Gees uitstort op alle mense”
(Hand.2:17).
Vir Sy kerk bid ons dat
• die Gees van die Here lewenskragtig in Christene sal begin werk.
• die kerk deur die Gees bemagtig sal word om dienende getuies van Christus te wees.
Vir ons wêreld bid ons dat
• mense orals in ons gemeenskappe wakker sal word deur die werking van die Heilige
Gees, om God se stem te hoor en te sien wat Hy doen.
• die Here weer vanuit die hemel dinge sal doen wat deur alle mense gesien en gehoor
kan word (Hand.2:33).
(Vir meer inligting oor die Wêrelddag van Gebed, skakel 021-907 1300, besoek die
webtuiste: www.globaldayofprayer.com, of e-pos: info@globaldayofprayer.com.)
Maandag 9 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG VIER
Christus se vrede: Dat verhoudings nuut gemaak sal word
Al die gelowiges was eensgesind en het alles met mekaar gedeel. Hulle het hulle grond
en besittings verkoop en die geld aan almal uitgedeel volgens elkeen se behoefte. Hulle
het…van huis tot huis die gemeenskaplike maaltyd gehou, hulle kos met blydskap en in
alle eenvoud geëet, en God geprys. Die hele volk was hulle goedgesind (Hand.2:44-47).
Vir Sy kerk bid ons dat
• die verdeeldheid en vyandigheid tussen kerke sal verdwyn.
• Sy kinders nie gierig sal wees en vasklou aan aardse besittings nie, maar
mededeelsaam sal wees.
• liefde, vreugde en viendelikheid die harte van Sy kinders sal vul.
• gemeentes opnuut die respek en guns van die gemeenskap sal wen.
Vir ons wêreld bid ons dat
• die Here gebroke verhoudings in huisgesinne en in die samelewing sal herstel.
• die Here ’n einde sal maak aan terrorisme, asook oplossings vir oorloë.
• die ongelykheid in rykdom wat baie armoede tot gevolg het, verander sal word, sodat
mense nie honger sal ly nie.
• die Here Sy vrede sal vestig deur die veranderde lewe van Sy kinders oral oor die
wêreld.

Dinsdag 10 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG VYF
Die nuwe geslag: Vir God se doel met gesinne en kinders.
Wat God belowe het, is vir julle en julle kinders (Hand.2:39).
Vir Sy kerk bid ons dat
• huweliks- en gesinsbande deur Christus versterk sal word.
• kinders en jongmense vroeg in hulle lewens vir Christus sal begin volg en liefhê met
werklike toewyding.
Vir ons wêreld bid ons
• vir die 130 miljoen kinders oor die wêreld wat nie toegang tot skole het nie.
• vir al die kinders wat wees gelaat of benadeel is deur oorlog of MIV/VIGS. Teen 2010
sal ’n beraamde 25 miljoen kinders op aarde een of albei ouers as gevolg van hierdie
siekte verloor het.
• dat die Here die opkomende geslag sal wakker skud om Sy beloftes te vervul deur
die krag van die Heilige Gees.
Woensdag 11 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG SES
God se roepstem: Dat die volke Sy stem sal hoor
...vir almal wat daar ver is, vir almal wat die Here ons God na Hom sal roep (Hand.2:39).
Vir Sy kerk bid ons dat
• Christene vervul sal word met die Heilige Gees om die Woord van God met insig en
sonder vrees te deel.
• die Woord van God aan elke volk en stam en nasie verkondig sal word (Hand.1:8).
Vir ons wêreld bid ons dat
• mense oor die wêreld in hulle eie taal sal hoor van die “magtige dinge wat God
gedoen het,” sodat hulle dit in hulle eie kultuur sal verstaan (Hand.2:11).
• die Bybel vertaal sal word vir die 3 000 mensegroepe wat nog geen deel van die Skrif
in hulle eie taal het nie.
• mense tot geloof in Christus sal kom uit die onbereikte groepe waar daar nog nie
lewende, groeiende gemeentes is nie.
• die Here baie mense sal aanneem (Hand.2: 39) wat Hom sal aanroep om gered te
word (Hand.2:21).
Donderdag 12 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG SEWE
Die Goddelike grootheid van Jesus: Vir die moed en krag van Sy mense
...bly dat hulle bevoorreg was om ter wille van die Naam van Jesus vernedering te ly
(Hand.5:41).
Vir Sy kerk bid ons
• vir dié mense wat teenstand kry omdat hulle in Jesus glo, dat hulle die vriendelike
maar vreeslose karakter van Jesus sal kan uitleef (Hand.4:13).

• vir Christene wat ly ter wille van Christus, dat hulle sterk sal staan in hulle vertroue op
Hom, en Sy vreugde sal ervaar.
• dat die Here die eer sal kry vir Sy groot dade, ook daar waar Hy eers teengestaan is
(Hand.4:21).
Vir ons wêreld bid ons dat
• ons leiers en regerings die Here se seën sal ontvang.
• dié leiers wat “die Here weerstaan het,” sal wysheid kry om hulle te bekeer en deur
Hom geseën te word (Hand.5:39).
Vir die jeug
Vrydag 13 Mei 2005 kan dalk net die dag wees wat jou skool kan verander. Die 13/30
beteken dat jy vir 30 sekondes iewers in jou skool sal kniel om vir die skool te bid. Vir
nog 30 minute iewers deur die dag kan jy vir jou skool en onderwysers bid. Besoek die
webwerf www.30kd.org, kontak vir Tersia of Coert by 012-365 3213, of e-pos 24-
7sa@jwipn.com.
Vrydag 13 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG AGT
Die genesing van Christus: Dat Christus genesing sal bring
Laat u hand genesing bring en laat daar tekens en wonders plaasvind deur die naam
van u Dienaar, Jesus (Hand.4:30).
Vir Sy kerk bid ons dat
• die Here siekes wonderbaarlik sal genees (Hand.5:14-16).
• Christene met deursettingsvermoë en passie sal optree in hulle taak om siektes te
bekamp.
• Christene betrokke sal raak by die voorsiening van gesondheidsorg in omgewings
waar die nood groot is.
Vir ons wêreld bid ons dat
• MIV/VIGS in ons leeftyd tot ’n einde sal kom. Tans word 250 000 jongmense elke
maand met die virus besmet.
• basiese gesondheidsorg gelewer sal word aan elkeen wat dit nodig het. Meer as
30 000 kinders sterf daagliks wêreldwyd aan siektes wat voorkom kon word.
Saterdag 14 Mei 2005
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG NEGE
Die seën van Christus: Dat God dit aan almal sal meedeel
Hy het vir Abraham gesê: “Jou nakomeling sal vir al die volke van die aarde tot seën
wees” (Hand.3:25).
Vir Sy kerk bid ons dat
• Christus gelowiges sal seën deur hulle te laat wegdraai van hulle sondige gewoontes
en paaie (Hand.3:26).
• gelowiges “tye van verkwikking” sal ervaar wat hulle ook sal aanmoedig om die
teenwoordigheid van die Here in hulle gemeenskappe te sien (Hand.3:19-20).

Vir ons wêreld bid ons dat
• die Here die volke sal seën met voorspoed en lewe in oorvloed.
• die vrede en redding van God deur elke bevolkingsgroep ervaar sal word.
Vir die jeug
Maak vannag saam met miljoene jongmense oor die hele wêreld gereed om ’n Hele nag
vir die Hele wêreld te hou. Vir meer inligting, besoek die webwerf www.wholenight.com,
kontak Tersia of Coert by 012-365 3213 of e-pos 24-7sa@jwipn.com.
Sondag 15 Mei 2005
Wêrelddag van Gebed
Hemelse Vader, vandag roep ons uit na U dat U U kerk sal aanraak oor die hele aarde
soos wat U op Pinksterdag gedoen het. Maak ons U getuies tot aan die verste uithoeke
van die aarde (Hand.1:8). Laat U hand genesing bring en laat daar tekens en wonders
plaasvind deur die Naam van Jesus (Hand.4:29-30). Bevestig asseblief die werke van
ons hande met tekens en die gawes van U Gees wat uitgedeel word soos U wil
(Heb.2:4). Bring ’n begeerte in die kerk om die oorblyfsel van die nasies in U koninkryk
te sien inkom. Ons dank U vir soveel volke en tale en nasies wat vandag saam gebind is
in die gebed.
WÊRELDWYE GEBEDSAKSIE
TIEN DAE VAN DAG-EN-NAG GEBED: DAG TIEN
Die vooruitsig wat Christus gee: Dat God se beloftes vervul sal word
...en Hy sal Jesus stuur wat vooraf vir julle as Christus aangewys is. Hy moet in die
hemel bly totdat God alles nuut gemaak het. Dit het God reeds lank gelede deur sy
heilige profete gesê (Hand.3:20-21).
Vir Sy kerk bid ons dat
• Christene sal lewe met die verwagting dat die Here die belofte van transformasie nog
sal vervul in hulle leeftyd.
• gemeentes en kerke in eenheid sal saamwerk soos God Sy beloftes vervul om
lewens, maar ook hele stede en volke te verander.
Vir ons wereld bid ons dat
• die eerlikheid en integriteit van die Here die handel en politiek sal verander.
• die vrede van Christus se ryk die beheer oor stede en nasies sal verander.
• die vreugde wat Christus gee ons gemeenskappe sal verander.
(Vir meer inligting oor die Wêrelddag van Gebed, skakel 021-907 1300, besoek die
webtuiste: www.globaldayofprayer.com, of e-pos: info@globaldayofprayer.com.)
Maandag 16 Mei 2005
Negentig Dae van Seën
Vir die volgende 90 dae word Christene aangemoedig om op ’n praktiese manier uit te
reik na die behoeftiges en armes in hulle gemeenskap (Jerigo Mure Internasionaal, tel.:
012-365 3213, faks: 012-365 3214, webtuiste: www.jwipn.com, e-pos: info@jwipn.com).
Dank die Here vir elkeen wat kon deelneem aan gister se Dag van Gebed. Bid veral vir
die beskerming van Christene in geslote lande. Maak vandag tyd om vir ander mense
vriendelikheid, liefde en goedhartigheid te betoon op ’n praktiese manier.

Miljoen Ure van Lofprysing
Miljoen Ure van Lofprysing roep Christene wêreldwyd op om soveel ure moontlik in
lofprysing deur te bring dat dit altesaam ’n miljoen ure sal wees. Dit kom daarop neer dat
elke gelowige onderneem om een uur aan lofprysing te wy wat soos ’n geskenk aan
Jesus sal wees. Hierdie inisiatief loop uit op die Wêrelddag van Lofprysing op 25 Junie
vanjaar. Bid asseblief saam dat baie mense sal deelneem aan hierdie projek, want die
Woord sê in Ps.22:4 dat die Here onder die lofsange van sy mense bly (webtuiste vir
meer inligting: www.millionhoursofpraise.com/).
Tuesday 17 May 2005
Oos-Kaap “slaan die drom” in 2005
Die film Beat the Drum sal vanjaar in ongeveer 2 000 skole in die Oos-Kaap gewys word
aan kinders as deel van ’n projek om kinders aan te moedig tot ’n leefstyl van
onthouding tot en met die huwelik. Die film word opgevolg met opleiding oor MIV/VIGS.
Dank die Here vir programme soos hierdie. Bid vir elke lid van hierdie spanne wat uitreik
in die projek en bid ook dat die hart van elke kind sal oop wees om die boodskap van
Jesus se liefde te aanvaar (om betrokke te raak, skakel Wilbur by 082-575 7433).
Noodtoestand in Nepal
Daar is reeds sedert 1996 politieke onrus in Nepal. Op 1 Februarie vanjaar het ’n
onverwagte wending gekom toe koning Gyanendra die regering oorgeneem het deur die
Eerste Minister Sher Bahadur Deuba saam met sy hele kabinet te ontslaan. Die koning
het ’n noodtoestand afgekondig. Bid asseblief vir vrede in Nepal. Bid ook vir die koning
vir wysheid in sy besluitneming. Tree in by die Here vir die kerk in Nepal dat hulle sal
kan voortgaan om in vryheid hulle Christelike geloof uit te leef.
Woensdag 18 Mei 2005
African Enterprise se Foxfire Jeugspanne
Jongmense word opgelei om in spanne uit te reik na hulle eie ouderdomsgroepe. Bid
asseblief vir hierdie Foxfire Spanne wat oor die land uitreik na jongmense in skole,
tronke, jeuggroepe en waar hulle ook al uitgenooi word. Bid vir hulle emosionele en
geestelike beskerming en dat hulle ook veilig sal reis op die paaie (African Enterprise,
tel.: 033-347 1911, faks: 033-347 1915, e-pos: spillay@ae.org.za).
Bid vir Oos-Asië: Sjina
Die Tatars van die Xinjiang Provinsie woon in klein groepies. Altesaam is daar 7 miljoen
Tatars in verskeie lande van Sentraal-Asië en net meer as 6 000 van hulle is in Xinjiang.
Hulle is almal Sunni Moslems. Die Tatars van Sjina verstaan egter nie die dialek van
hulpmiddels vir evangelisasie wat Tatars in ander lande gebruik nie, en daar is sover
bekend geen Christene onder hulle nie. Bid dat gemeentes die Tatars van Sjina sal
aanneem in gebed. Bid ook vir die beskikbaarstelling van die evangelie in hulle eie taal
(Global Prayer Digest, 6-02-2005).
Donderdag 19 Mei 2005
90 Dae van seën
Roep die Here aan vir die jeug
Mag ons seuns wees soos plante wat hoog groei in hulle jeug, ons dogters soos
hoekpilare, uitgebeitel vir ’n paleis…Gelukkig is die volk met wie dit so gaan (Ps.144:12,
15).
Bid die Here se seën oor hulle, dat

• tieners hulle lewens geheel en al aan Christus sal oorgee.
• hulle die moed sal hê om beginselvaste morele besluite te neem.
• daar geskikte mentors vir hulle sal wees.
• hulle gesonde vriendskappe sal hê met maats wat vir Jesus volg.
• hulle eerlik met hulle ouers sal kommunikeer.
• die Here se wil vir hulle geheel en al sal uitwerk.
Seën jongmense op praktiese maniere:
• Gaan na ’n winkelsentrum of ander plek waar jongmense uithang en bid daar vir
hulle op jou eie.
• As die Here jou die geleentheid gee, reik uit na hulle, maar dan met liefde, nie
veroordelend of beskuldigend nie.
Skryf ’n paar dinge neer wat jy hierdie week kan doen om liefde aan jongmense te
bewys.
Bid vir Suidoos-Asië
Hou aan bid vir die nasies wat so erg deur die tsoenami ramp getref is. Die aantal
Christen slagoffers is onbekend, hoewel hele dorpies met Christene verwoes is. Kom
ons bid vir die oorlewendes se fisieke en emosionele behoeftes. Bid ook vir hulle
geestelike nood, dat hulle vir Jesus Christus sal leer ken. Bid vir wysheid vir die
regerings wat hulp moet verleen, ook vir nooddienswerkers wat Christene is, dat hulle
gesond sal bly en die regte soort hulp sal kan gee (Window International Network,
Posbus 49127, Colorado Springs, CO 80949-9127, VSA. Webtuiste: www.win1040.com,
e-pos: win@win1040.com).
Vrydag 20 Mei 2005
Evangelisasie uitreik: “Jesus die Geneser”
Hierdie groot uitreik word gehou van 20-22 Mei in die Oos-Rand, Ekurhuleni (Boksburg,
Benoni en Springs). Bid dat die voorbereidings betyds gemaak sal word, dat al die koste
gedek sal word, vir die veiligheid van die span en almal wat dit sal bywoon. Vra die Here
dat baie mense sal kan kom, dat hulle harte aangeraak sal word deur die liefde van
Jesus en dat baie van hulle hulle lewe sal oorgee aan Jesus Christus as hulle Redder
(Shalom ministries, tel.: 033-417 1695, webtuiste: www.shalomtrust.co.za, e-pos:
shalom@futuregtn.co.za).
Bid vir Sentraal-Asië
In hierdie deel is daar lande wat heeltemal gesluit is vir die evangelie en waar Christene
vervolg word vir hulle geloof. Bid vir die kerk wat nou tot stand kom in hierdie lande, dat
hulle suiwer en Christus gesentreerd sal wees, gewortel en gegrond in die liefde van die
Here. Bid veral vir Afganistan se nuut verkose regering, dat hulle wyse besluite sal neem
oor die nuwe landswette. Bid ook vir die boere dat hulle ander oeste sal plant as dié wat
skadelik kan wees vir mense, en vra vir genoeg reën (tel.: 012-809 2025, e-pos:
huibertp@absamail.co.za).
Saterdag 21 Mei 2005
Selfmoord en selfbesering
Ongeveer 815 000 mense pleeg jaarliks wêreldwyd selfmoord, dit wil sê omtrent een
elke 40 sekondes. Vir mense tussen 15-44 jaar oud, is selfbesering die vierde hoogste
oorsaak vir dood. Ondersoek bewys dat vir elke selfmoord wat slaag, daar omtrent 20

pogings is wat nie slaag nie (Global Campaign for Violence Prevention, webtuiste:
www.who.int/violence_injury_prevention). Bid gedurig dat die Here mense wat selfmoord
oorweeg sal bemoedig met Sy liefde. As jy weet van mense wat selfmoord oorweeg, bid
vir hulle om Jesus se onvoorwaardelike liefde vir hulle te verstaan.
’n Ander soort Tsoenami?
Dit word bereken dat sedert die VIGS pandemie ongeveer 20 jaar gelede begin het,
meer as 30 miljoen mense oor die wêreld reeds hieraan dood is, terwyl ’n verdere 38
miljoen die virus dra of reeds siek is. Daar is nou ’n gebedsketting wat Christene bewus
maak van hoe om vir MIV/VIGS siekes te bid. Dank die Here vir gebedsondernemings
soos hierdie. Bid baie ernstig dat almal wat dit onderlede het, ten minste een kans in
hulle lewe sal kry om te hoor van Jesus se liefde vir hulle (webtuiste:
www.gappartnership.org/gapp/ of www.wvi.org/wvi/aids/global_aids.htm).
Sondag 22 Mei 2005
Uitreik met die evangelie in Suid-Afrika
Gedurende 2004 het Every Home for Christ in South Africa (EHCSA)
150 697 evangelisasie boekies met die titel The Way to God in huise, hospitale, skole en
tronke dwarsoor die land geplaas. Ongeveer 34 433 het hulle lewe aan Jesus Christus
oor gegee (EHCSA, Posbus 7256, Centurion, 0046. Tel.: 012-663 4587, faks: 012-
663 4589, e-pos: ehcsa@netactive.co.za). Dank die Here vir die getroue volharding
waarmee EHCSA in ons land uitreik. Vra dat gemeentes die nuwe gelowiges sal
aanvaar en geestelik ondersteun, totdat hulle versterk is in hulle vertroue in Jesus
Christus en dit uitleef.
Handel met mense moet gestop word
Die berugte plek waar Myanmar, Thailand en Sjina se grense bymekaar kom, staan
bekend as die “Goue Driehoek” waar mense handel floreer. Soms sal selfs jong Christen
mans of vroue hulleself verkoop vir ekstra geld vir klere of alkohol. Sommige van hulle
tree op as agente om jong meisies te nooi om ’n ekstra inkomste te verdien. Eindelik
word hulle verkoop vir prostitusie of as seksslawe. Bid dat leiers gewillig sal wees om
hierdie sake openlik te bespreek, en bid dat jongmense wat gevaar staan om so verkoop
te word, sal vrykom (Pray for Myanmar, e-pos: pray.for.myanmar@ntlworld.com).
Monday 23 May 2005
90 Dae van seën
Roep die Here aan vir huwelike
Die huwelik moet deur almal eerbaar gehou word (Heb.13:4).
Bid die Here se seën oor huwelike:
• Noem voor die Here dié huwelike waarvan jy weet wat sterk staan en iets van Sy
getrouheid en liefde weerspieël.
• Bid spesifiek vir huwelike wat onder druk of naby breekpunt is en dié wat reeds
verbrokkel het, dat die Here nuwe hoop en lewe sal bring vir gebroke lewes en gebroke
gesinne.
Seën huwelike op praktiese maniere:
• Bid by jouself in die omgewing van huise waar die Here se herstel van die gesin
nodig is.

• Vra die Here hoe jy by jou werk of by die skool iemand kan bedien wat die
verwerping en pyn van ’n gebroke huwelik ervaar.
Skryf dinge neer wat jy hierdie week kan doen om huwelike te seën.
Kinderpornografie vermeerder op die Internet
Verlede jaar het die gevalle van kinderpornografie wat aangemeld is vermeerder met
40% tot 106 000. Sedert die tagtigerjare het die getal webtuistes wat kinderpornografie
op die Internet aanbied, gegroei met 1 500% soos die Internet self ook uitgebrei het.
Daar is sommige webblaaie wat tot 100 000 pornografiese fotos bevat (webtuistes:
www.family.org en www.Internetweek.com). Bid asseblief vir mense wat kinders so
misbruik en uitbuit, asook vir hulle wat reeds aan kinderpornografie verslaaf is.
Dinsdag 24 Mei 2005
Aborsie eis steeds onskuldige lewens
Vandat aborsie gewettig is in Februarie 1997, is ongeveer 400 000 babas geaborteer in
Ballito (KwaZulu-Natal). Dit is net die een stad se statistieke (Christians for Truth, 30-01-
2005, e-pos:mail@cft.org.za). Roep die Here aan vir hierdie saak in ons land. Bid vir die
oortuiging van die Heilige Gees in die harte van swanger moeders wat aborsie oorweeg,
dat Hy hulle sal oortuig dat daar vir hulle en hulle kinders ’n vooruitsig is by Jesus
Christus. Bid ook onophoudelik dat die wet wat dit goedkeur herroep sal word.
FEBC Radio in Indonesië
“Ek groet julle in die Naam van ons Here Jesus Christus…Vantevore was ek sonder
God, en ’n misdadiger. Maar nou het ek dit laat staan, omdat ek Jesus Christus
aangeneem het…Ek het nie ’n Bybel nie. Kan julle asseblief vir my een stuur?” Dit is ’n
luisteraar van FEBC se versoek uit Oos-Kalimantan. FEBC kan potensieël meer as twee
biljoen mense oor die wêreld bereik deur hulle radiouitsendings. Bid vir geestelike
onderskeidingsvermoë vir hulle programopstellers wat die boodskappe opstel vir die
volke van Indonesië (Global Prayer Digest, 27-12-2004, e-pos: hub@xc.org).
Woensdag 25 Mei 2005
Reën vir die Wes-Kaap
Ten tye van hierdie publikasie het een van die prominente damme in die Wes-Kaap nog
slegs 65 dae se water reserwe oor gehad. Neem asseblief tyd om saam met vriende te
bid vir die watertekort in die Wes-Kaap en ander provinsies in ons land. Vra die Here om
aan ons genade te bewys deur reën te stuur uit genade. Dank Hom ook vir elke keer wat
Hy in die verlede reën gestuur het.
Deurbraak in Benin vir Christelike radiosender
Na baie gebed en onderhandelings is ’n mediumgolf lisensie toegestaan aan
Transwêreld Radio om in Benin uit te saai, wat dan ook ander dele van Wes-Afrika kan
bereik. Prys die Here vir Sy getrouheid om gebede te beantwoord. Bid vir die personeel
wat reeds in Februarie 2005 in Benin begin het om ’n gebou vir die sender op te sit. Bid
dat daar genoeg voorsiening sal wees om die projek te voltooi (TWR-SA. P/sak 987,
Pretoria, 0001. Tel.: 012-348 9448, faks: 012-348 5538, webtuiste: www.twr.org.za.
Luister na ons programme in suidelike Afrika op DSTV radiokanaal 55).
Donderdag 26 Mei 2005
90 Dae van seën
Roep die Here aan vir mense wat werkloos is

Dat die mens kan eet en drink en onder al sy arbeid nog die goeie kan geniet, ook dit is
’n gawe van God (Pred.3:13).
Bid die Here se seën oor hulle:
• Bid dat die Here sal voorsien in die behoeftes van mense sonder werk.
• Bid dat elkeen van hulle iets sal kry om te doen wat sinvol is en die Here
daarvoor sal dank.
• Vra dat die Here die deur sal oopmaak vir regverdige handel.
Seën werklose mense op praktiese maniere:
• Bid vir mense in jou omgewing wat onlangs hulle werk verloor het of wat probeer
om werk te kry .
• Besoek iemand wat sonder werk is of bel die persoon en bied aan om vir
hom/haar te bid en moedig hom/haar aan om nie vertroue in die Here te verloor nie.
Skryf ’n paar dinge neer wat jy in die week kan doen om mense sonder werk te help.
Die dreigende gevaar van klimaatsverandering
Binne die volgende 10 jaar sal aardverwarming by die kritiese keerpunt verby wees, en
sal wydverspreide droogtes, mislukte oeste en watertekorte aan die orde van die dag
wees. Die aarde se gemiddelde temperatuur sal 2% hoër wees as in 1750 toe die
industriële rewolusie begin het. Volgens ’n verslag sal so ’n styging in temperatuur meer
siektes tot gevolg hê, die seevlak sal styg en beboste dele sal verdwyn (Sapa-AFP, 24-
01-2005). Hou asseblief hierdie situasie voor die Here en vra Hom hoe om hiervoor te
bid. Hou aan om die heerskappy van Jesus Christus oor die aarde en die hemel uit te
roep, sodat Sy wil sal seëvier.
Vrydag 27 Mei 2005
Jerigo Mure Internasionaal
Prys die Here vir alles wat Hy in die afgelope 5 maande gedoen het wat betref die
Wêrelddag van Gebed. Dank Hom vir elke gebed wat Hy verhoor het, elke stukkie
literatuur wat gedruk kon word, elke rekening wat betaal is, vir elke personeellid wat Hy
bewaar het en al die liefde wat Hy aan ons bewys het. Bid vandag vir elkeen wat by
Jerigo Mure Internasionaal werk vir deurbrake in sy/haar persoonlike lewe, vir goeie
gesondheid en vir eenheid tussen almal. Vra ook dat elke uitstaande rekening vir
drukwerk, reis of kommunikasie betaal sal kan word in die komende week en die
maande wat kom (P/sak X22, Lynnwoodrif, 0040. Tel.: 012-365 3213, faks: 012-
365 3214, webtuiste: www.jwipn.com, e-pos: info@jwipn.com).
Bid vir Afrika: Niger
Niger is 90% Moslem, wat die toelating van ’n Christelike radiosender ’n uitdaging maak.
Daar is steeds heelwat geleenthede om die evangelie oor die meer as 70
gemeenskapsenders uit te saai. Bid dat personeel hiervoor opgelei sal word en dat
fasiliteite vir opnames gebou sal word. Bid dat Christelike programme in Hausa en in
Frans voltooi sal wees teen die einde van die jaar en dat die gemeenskapsenders
gunstig sal reageer wanneer daar ’n aanbod kom om Christelike programme tot hulle
beskikking te stel (webtuiste: mnn.gospelcom.net/article/6966, e-pos:
mnn@mnnonline.org).
Saterdag 28 Mei 2005

Transformation Africa bring eer aan Jesus
In die afgelope 4 jaar het die Here hierdie bediening gebruik om deel te hê aan die visie
om die hele aarde met gebed te dek. Prys Hom dat Hy mense gewillig gemaak het en in
staat gestel het om hierdie werk te doen. Bid vir almal wat by die kantore van
Transformation Africa werk, dat die Here hulle sal seën en bewaar, en in elke behoefte
sal voorsien. Bid veral vir hulle veiligheid, en vir uitstaande kostes om gedek te word
(Posbus 92611, Mooikloof, 0059. Tel.: 012-997 0579, faks: 012-997 1760, webtuiste:
www.transformationafrica.com, e-pos: info@transformationafrica.com).
Bid vir Afrika: Deurbrake in Soedan
Sendelinge in Soedan vertel van ’n wonderwerk wat tans plaasvind. Soldate is besig om
terug te keer na die Noorde vanuit die Suide. Dit is ’n teken van die Here se ingrype om
die langste burgeroorlog in Afrika na 21 jaar te beëindig. Twee miljoen mense het
gesterf in die oorlog en 5 miljoen het uit hulle woongebiede padgegee. Volhard in gebed
vir hierdie vredesproses wat op 9 Januarie begin het toe ’n vredesverdrag onderteken is
deur verteenwoordigers van die regering in die Noorde en groepe in die Suide (tel.: 012-
460 7877, faks: 012-406 5135, e-pos: ssnet@iafrica.com).
Sondag 29 Mei 2005
Fokus op kerkleierskap
Die Here het soveel eenheid oor kerk en denominasiegrense heen bewerk oor die
afgelope maande. Prys Hom dat Hy besig is om in Sy kerk te werk. Bid ook vir
versoening oor al die grense heen in die kerk, in die sakewêreld en die politieke front.
Bid vir die beskerming van Christenleiers van al die groepe, vir hulle huwelike en hulle
gesinslewe, sodat die Here ook daardeur die eer sal kry. Vra dat almal van hulle wat in
moeilike omstandighede verkeer verligting en bevryding sal kry en ook in hierdie
situasies die Here sal eer.
Kinderarbeid vererger in Afrika
Teen die huidige tempo waarteen kinderarbeid toeneem, sal meer as 100 miljoen
kinders in 2015 hiervan deel vorm. Afrika het die hoogste persentasie van kinders wat
werk van al die kontinente. Omtrent 41% van kinders tussen 5-14 jaar is betrokke in een
of ander tipe van vaste werk (webtuiste: www.wsws.org/news/1998/feb1998/ilo.shtml).
Bid vir kinders wat as dwangarbeiders gebruik word. Vra dat hulle vrygelaat sal word en
die kans kan kry om skool toe te gaan en ’n normale lewe te lei.
Maandag 30 Mei 2005
90 Dae van seën
Roep die Here aan vir die siekes
(Jesus) het die groot menigte mense daar gesien. Hy het hulle innig jammer gekry en
die siekes onder hulle gesond gemaak (Matt.14:14).
Bid die Here se seën oor hulle:
• Bid vir die Here se genesende aanraking oor die siekes van jou omgewing.
• Bid dat hulle deur hulle siekte ook nader aan die Here sal groei.
• Bid dat die Here in hulle geldelike behoeftes sal voorsien.
• Bid dat baie van hulle tot nuwe vertroue in Christus sal kom en Hom sal volg,
selfs in hulle siekte.
Seën siekes op praktiese maniere:

• Wanneer jy beweeg in jou omgewing, dink aan mense wat chroniese probleme of
pyn het en bid vir hulle genesing.
• Maak tyd om ten minste een siek mens te gaan besoek en met hom/haar te praat
en vir hom/haar te bid.
Skryf dinge neer wat jy in die week kan doen om siekes te help.
Tatarstan
Die Republiek van Tatarstan is in die middel van die Volga-kom in Rusland en is
hoofsaaklik Moslem. ’n Klein gemeente is onlangs gedreig om hulle aktiwiteite te staak
en pad te gee uit die stad Aznakayevo. Hulle het ’n kerkgebou gehuur en evangelisasie
films vertoon. Bid dat die Here die geloof van hierdie Christene sal versterk en dat die
omstredenheid oor die Christelike geloof die Moslems sal beweeg om meer uit te vind
oor Jesus. Vra ook dat die plaaslike owerhede sal toelaat dat klein byeenkomste van
gelowiges sal kan voortgaan (The Voice of the Martyrs, 01-2005, epos:
thevoice@persecution.com).
Dinsdag 31 Mei 2005
Meegevoel met mense wat depressief is
Selfmoord kom deur uiterste desperaatheid en is gewoonlik die finale uitroep om hulp
wanneer dit reeds te laat is. Daar mag mense om ons wees wat dit oorweeg om ’n einde
te maak aan hulle eie lewe. Soms wil hulle dit nie meer oorweeg om met die lewe aan te
gaan nie. Roep uit tot die Here om sulke mense aan te raak. Vra dat Hy iemand sal
stuur om hulle pad te kruis wat hulle kan bemoedig. Vra die Here om jou die geleentheid
te wys om die liefde van Jesus te deel met iemand wat depressief is.
Every Home for Christ (EHC) in die Tsjeggiese Republiek
Hierdie is een van die mees ateïstiese lande in Europa. EHC kon hier deelneem in die
ProChrist 2006 evangelisasie veldtog in Maart. In een week is dit van Duitsland af per
satelliet uitgesaai na 16 lande van Europa (webtuiste: www.ehc.org). Prys die Here vir
hierdie kans om die evangelie te deel in hierdie land en ook ander lande in Europa. Bid
dat daar goeie opvolgwerk gedoen sal word. Bid ook vir nog geleenthede om
soortgelyke veldtogte in Europa te hou, en besonderlik in die Tsjeggiese Republiek. Bid
dat hulle harte meer ontvanklik sal wees vir die boodskap van Christus.
Woensdag 1 Junie 2005
Transwêreld Radio Suid-Afrika (TWR-SA)
TWR-SA fokus tans in hulle program aanbieding op arm en behoeftige mense. Bid
asseblief vir die program Reach Out, ’n gedramatiseerde program in Tswana wat die
jongmense help om te weet hoe om dinge te hanteer soos MIV/VIGS,
dwelmverslaafdheid, armoede, gesinswaardes en misdaad. Daar is ook ’n program
Nanti Ithemba in Zoeloe waar VIGSlyers van praktiese raad voorsien word, en gehelp
word om in ’n verhouding met Jesus Christus te kom (TWR-SA, P/sak 987, Pretoria,
0001. Tel.: 012-348 9448, faks: 012-348 5538. Luister ook na ons programme in Suider-
Afrika op DSTV, radiokanaal 55).
Bybelklubs vir kinders groei in Indië
Die groei van hierdie klubs in Indië is ’n saak van groot dankbaarheid. In een geval was
die toeloop so groot en die ruimte te klein sodat die gesinne in die dorpie die getalle
beperk het tot een kind per gesin wat dit kon bywoon. Hulle het hulleself dus tekort
gedoen sodat die program kon voortgaan (Storskiftesgatan 87, S-58334 Linkoping

Swede. E-pos: Intercessors.Network@Comhem.se). Prys die Here vir getuienisse van
deurbrake in die bediening aan kinders. Bid dat daar meer voorsiening sal wees vir
hierdie werk om voort te gaan.
Donderdag 2 Junie 2005
90 Dae van seën
Roep die Here aan vir weermag- en polisielede
Nadat Jesus in Kapernaum aangekom het, het ’n offisier by Hom kom hulp soek…Jesus
was verwonderd toe Hy dit hoor, en Hy sê vir die mense wat agter Hom aan gekom het:
“Dit verseker Ek julle: Ek het nog by niemand in Israel so ’n groot geloof teëgekom nie”
(Matt.8:5-13).
Bid die Here se seën oor hulle:
• Bid vir die lede van die Suid-Afrikaanse Nasionale Weermag (SANW) en die Polisie
(SAPD) dat elkeen van hulle ’n persoonlike ervaring sal hê met die liefde van die Here
Jesus.
• Heelwat van hiedie magte se lede het reeds MIV onderlede of is reeds sterwend as
gevolg van VIGS. Bid dat hulle die evangelie sal hoor en verstaan en Jesus sal toelaat
om die bevelvoerder van hulle lewe te word.
• Bid vir die kapelane en ander geestelike leiers.
• Bid dat die Here die gesinne sal help wat dikwels moet skuif of waar die
huweliksmaats lank van mekaar weg moet wees.
Seën weermag- en polisielede op praktiese maniere:
• Wanneer jy by ’n militêre basis of polisiekantoor verbygaan, bid dat die Here elkeen
wat daaraan verbonde is, sal aanraak.
• Oorweeg dit om hierdie maand jou naaste polisiestasie te besoek en vra vir die
offisiere waarvoor jy spesifiek kan bid.
Skryf ’n paar dinge neer wat jy in die week kan doen vir weermag- en polisielede.
Bid vir Afrika: Die lot van kinders
Statistieke wys watter stryd om lewe en dood kinders in Afrika mee te doen het. Na
raming sterf 19 000 kinders elke dag aan siektes wat behandel kon gewees het. Van alle
kinders onder 15 jaar oor die wêreld wat MIV positief is, is 80% in Afrika (Missions
Insider, 7-02-2005. e-pos: insider@christianaid.org). Roep die Here in gebed aan dat
daar meer gedoen sal word vir die kinders van Afrika om die liefde en sorg en hoop van
Jesus Christus na hulle toe te bring. Vra dat elkeen van hulle in hulle kort leeftyd ten
minste een kans sal kry om die boodskap oor Jesus Christus te hoor.
Vrydag 3 Junie 2005
Reën die Wes-Kaap
Bid asseblief dat die Wes-Kaap se winterreënvalstreek sagte deurdringende reën sal
kry. Vra dat die grond deurnat sal wees, die damme tot oorlopens toe vol sal wees en
dat die ondergrondse watertafel beduidend sal styg. Bid dat die oeste oorvloedig en in
seisoen sal inkom. Bid ook vir die veiligheid van mense wat in laagliggende dele bly wat
maklik oorstroom word. Prys die Here vir Sy goedheid oor die land.
Japannese Christene reik uit na die jeug

Christene in Japan probeer op ’n nuwe manier om hulle kinders en jongmense vir
Christus te bereik. Die prentverhale “manga” is ’n baie gewilde vorm van leesstof en
meer as 8 miljoen kopieë word elke week gedruk. Harvest Time Ministry gee nou 6 nuwe
prentverhale uit met Bybelse verhale, in ’n vorm wat gewoonlik vir stories ook seks,
geweld en opstand teen God gebruik word. Bid dat hierdie bediening sal slaag en dat
baie jongmense na Christus toe sal kom (webtuiste:
www.mnn.gospelcom.net/article/6866, e-pos: mnn@mnnonline.org).
Saterdag 4 Junie 2005
Politieke stabiliteit en buitelandse betrekkinge
Bid ernstig vir die politieke toestand in ons land. Bid dat die president wysheid sal
ontvang waar hy voorsitter is van die Afrika Unie en gevra word om vrede te probeer
bring in party van die Afrikastate waar daar burgeroorlog en gevegte is. Bid besonderlik
vir die leiers. Mag die wil van die Here die oorhand kry en mag Hy die harte van konings
en staatshoofde neig om sy pad te volg (Ps.33:13-15).
Verkiesing in die DRK en Iran
In hierdie maand vind die verkiesing in die Sentrale Republiek van die Kongo plaas, en
in Iran is daar ’n presidentsverkiesing (The Economist, Diary for 2005, bl.23). Vanjaar is
verkiesingsjaar in heelwat lande. Hou hierdie twee lande voor die Here op in gebed soos
die tyd vir hulle verkiesing naderkom. Bid dat daar vrede sal heers in elke land en in die
harte van die inwoners, dat politieke onrus nie vernietiging sal meebring nie. Hou die
nuus dop en bid vir die inligting wat hieroor beskikbaar raak.
Sondag 5 Junie 2005
Die gebedsnetwerk in Suid-Afrika groei
Sal God dan nie aan sy uitverkorenes, wat dag en nag tot Hom roep, goed doen
nie?…Ek sê vir julle: Hy sal hulle help, en gou ook (Luk.18:6-8).
Bid dat die Here meer wagters/bidders/intersessors sal roep om verantwoordelikheid te
neem vir die oprig van huise van gebed dwarsoor die land, sodat die geregtigheid van
die Here gesien kan word. Vra dat geboue, toerusting en finansies beskikbaar sal word
om so ’n huis van gebed op te rig in elke stad en dorp en voorstad in die land. Bid dat
dié huise wat reeds aan die gang is, sal aanhou groei (tel.: 012-365 3213, faks: 021-
365 3214, webtuiste: www.jwipn.com, e-pos: info@jwipn.com).
Projek Masedonië gaan voort
Vir die afgelope 10 jaar reeds stuur hierdie projek gebedspanne op korttermein uitreike
na geslote lande om te bid vir geestelike deurbrake. Bid dat hulle sal kan voortgaan om
sulke spanne te stuur na Noord-Afrika, die Arabiese Skiereiland, en Moslems in Europa.
Bid dat mense uit hierdie spanne, wanneer hulle terugkom, sal kan voortgaan om
betrokke te wees om hierdie volke te bereik. Bid vir elkeen wat voltyds werk om hierdie
gebedsuitreike te reël dat die Here ook vir hulle sal versterk en sal voorsien in elke
behoefte (Projek Masedonië, P/sak X07, Lynnwoodrif, 0040. Tel.: 012-348 6520, faks:
012-348 6329, e-pos: macsa@mweb.co.za).