CLARENCE VERNON VISAGIE

183
HOOFSTUK SEWE - SINTESE EN INTERPRETASIES
7.0 Inleiding
Hierdie hoofstuk het ten doel om ’n sintese en interpretasie van my empiriese data in
hoofstukke vyf en ses aan te bied, waarvolgens ’n storielyn van die vier onderwysers in
my studie verduidelik en verstaan word. Die resultate van my empiriese studies moet ’n
in-diepte verduideliking en ’n begrip kan aanbied oor die identiteitsbasis waarvolgens
onderwysers ’n kurrikulum-vernuwing ontvang en implementeer. Op welke wyse het die
identiteitsbasis van hierdie vier onderwysers ’n impak gehad op hul professionele en
pedagogiese identiteite waarmee K2005 ontvang en geïmplementeer word?
My empiriese data soos opgeteken in hoofstukke vyf en ses, word vergelyk met teoretiese
raamwerke, perspektiewe en lense soos vergestalt in my literatuurstudies, wat insluit die
konseptuele literatuur (hoofstuk twee), metodologiese literatuur (hoofstuk drie) en
kontekstuele literatuur (hoofstuk vier). Daardeur word ’n epistemologiese verduideliking
aangebied van my empiriese bewyse. Dit behoort te kan aansluit by die kurrikulum-
teoretiese model van terugwerkende kartering, soos dit reeds in hoofstuk twee
breedvoerig bespreek is (sien hoofstuk twee, afdeling 2.1.2). Soos reeds in hoofstuk een
aangedui, is die oorhoofse doel met my studie om die gaping tussen ’n kurrikulumbeleid-
ontwerp en ’n kurrikulumbeleid-implementering te vernou. Die vertrekpunt van my
empiriese studies, was dus om empiriese bewyse oor die identiteitsbasis van onderwysers
te genereer. Daarmee moet kurrikulumbeleid-formuleerders op makro-nasionale vlakke,