CLARENCE VERNON VISAGIE

6.2.4 Geslag-identiteite
180
Die vier onderwysers besit sterk oortuigings dat die man in beheer moet wees, wat aandui
op ’n Christelike patriargale lewensbeskouing van die man as dominerend teenoor die
vrou. Soos in die geval met hul ras, klas en geloof-identiteite, het hierdie vier
onderwysers ook in ’n ‘man-gedomineerde wêreld’ deur die skoolstelsel van die
apartheidsera opgegroei en gesosialiseer. Strauss (2000:25-27) dui aan hoedat daar teen
vroulike blanke onderwysers gediskrimineer is, veral in die vroeë stadiums van
Overbergse skole. Daarmee saam opper Giddens (2001:298) klagtes dat die vrou steeds
in kontemporêre era in alle samelewings in minderwaardige posisies is. Ongelykhede
tussen geslagtes is volgens hierdie argument histories selfs dieper gewortel as klasse
ongelykheid. So is die vrou deesdae steeds in ’n stryd gewortel vir erkenning en ’n
regverdige hantering (Singh, 1995:182).
Dit blyk dat daar in die Overberg ’n bevraagtekening en ’n diskoers-analise nodig is teen
die patriargale teks. Vir talle feministe is hierdie dekonstruksie teen die grein van die
patriargale teks nodig (Singh, 1995:185-187). Hierdie dominasie deur mans soos ontvou
in die Overbergstreek (sien afdeling 4.2.3), en gehandhaaf word deur die vier
respondente, voorsien dominante diskoerse in die gemeenskappe. Dit word aanvaar dat
hierdie diskoerse deurlopend deur hierdie vier onderwysers geïnternaliseer was. ’n
Diskoers analise is dus nodig om die impak van dominante religieuse-diskoerse op die
ontvang-identiteite van hierdie vier onderwysers, dieper te ondersoek. In hoofstuk sewe
gaan die verskynsel dieper ondersoek word.