CLARENCE VERNON VISAGIE

144
onderwyser-implementering van K2005 in hierdie vier skole. Gevolglik word die
institusionalisering van K2005 in hierdie vier skole as negatief ervaar.
Daar is sekere ooreenkomste in die observasie-kategorieë van hierdie vyf skole
teenwoordig, soos dit ’n impak het op onderwyser-implementering van K2005. In die vyf
skole bestaan daar geen bewyse dat K2005 geïmplementeer word ooreenkomstig die
vereistes wat deur die K2005-beleid gestel word nie. Skole kon min bewyse van
beleidstukke aan my voorlê, of dat hulle hierdie beleid as raamwerke gebruik. Prinsipale
kon nie aan my uitwys hoedat hulle K2005-beleid in hul kantore liasseer en benut nie, of
hoedat K2005-beleid in die klaskamer ingefaseer word nie. Heelwat onderwysers het nie
beleidstukke in hul klaskamers teenwoordig gehad nie, aangesien dit nie deel was van die
vorige werkswyses en kultuur waarvolgens hul skole tradisioneel gefunksioneer het nie.
Waar K2005-beleidstukke wel teenwoordig was, kon onderwysers dit nie transformeer tot
onderrig-programme nie, of hul onderrig-programme nie in verband bring binne
raamwerke van K2005-beleid nie. Sodoende ontstaan daar by my ernstige bedenkinge of
die K2005-beleid in hierdie vyf skole in die geheel geïmplementeer word. Ek kon wel
waargeneem het hoedat geringe fasette van K2005 geïmplementeer word.
Vanuit my observasie-steekproef, en my opsommings van onderwysers, het ek vier
verteenwoordigende onderwysers geïdentifiseer vir onderhoude. Hierdie vier
verteenwoordigende onderwysers is verteenwoordigend van die vier implementeringstyle
(wyses van lesaanbiedinge) wat ek uit my observasie-steekproef opgesom het. In die
volgende afdeling word hierdie vier verteenwoordigende onderwysers breedvoeriger
bespreek.