everything maths and science - C2B2A

Ladings van verskillende groottes
Wanneer hul groottes nie gelyk is nie sal die groter lading die rigting van die veldlyne
meer beïnvloed as wanneer hulle gelyk was. Hier is byvoorbeeld ’n konfigurasie waar
die positiewe lading baie groter as die negatiewe lading is. Jy kan sien dat die veldlyne
meer soortgelyk lyk aan dié van ’n geïsoleerde lading by groter afstande as in die vorige
voorbeeld. Dit is omdat die groter lading ’n sterker veld laat ontstaan en dus ’n groter
relatiewe bydrae maak tot die krag op ’n toetslading as wat die kleiner lading maak.
-Q
+10Q
Elektriese veldsterkte ESE5P
In die vorige afdelings het ons bestudeer hoe ons die elektriese velde rondom ’n lading
of kombinasie van ladings kan voorstel deur middel van elektriese veldlyne. In hierdie
voorstelling sien ons dat die elektriese veldsterkte voorgestel word deur hoe naby die
veldlyne aan mekaar is. Benewens die tekeninge van die elektriese veld, wil ons ook
daartoe in staat wees om te kwantifiseer (’n getal te kry) hoe sterk ’n elektriese veld is
en wat sy rigting by enige punt in die ruimte is.
’n Klein toetslading q geplaas naby ’n lading Q sal ’n krag ondervind as gevolg van die
elektriese veld rondom Q. Die grootte van die krag word deur Coulomb se wet beskryf
en hang af van die grootte van die lading Q en die afstand van die toetslading vanaf Q.
Hoe nader die toetslading q aan die lading Q is, hoe groter is die krag wat die lading
sal ondervind. Verder, by punte nader aan die lading Q sal sy elektriese veld sterker
wees. Ons definieer die elektriese veld by ’n punt as die krag per eenheid lading.
DEFINISIE: Elektriese veld
Die grootte van die elektriese veld, E, by ’n punt kan gekwantifiseer word as die krag
per eenheid van lading. Ons kan dit skryf as:
E = F
q
waar F die Coulomb-krag is wat ’n lading op ’n toetslading, q, uitoefen.
Die eenhede vir elektriese veldsterkte is newton per coulomb: N·C−1 .
Hoofstuk 9. Elektrostatika
339