1 - HTS John Vorster

DIE HOËR TEGNOLOGIESE SKOOL
John Vorster
Geregistreer as >n niewinsgewende organisasie
REG NO: 023-864-NPO E-POS adresse:
Posbus 31714 info@htsjv.co.za
Meyerstraat 1072 finansies@htsjv.co.za
TOTIUSDAL, 0134 jeugleiding@htsjv.co.za
Rietfontein adjunkhoof@htsjv.co.za
Tel : (012) 332 1760/1/2 hoof@htsjv.co.za
Fax : (012) 332 3700 Webblad www.htsjv.co.za
086 693 5121
OUEROMSENDBRIEF 1 VAN 2013
Geagte Ouers/Voogde
9 Januarie 2013
Baie welkom terug aan almal na die afgelope vakansie en feestyd. Mag 2013 vir u
persoonlik, u gesin en die skool ‘n voorspoedige jaar wees waarin ons weer die
genade van die Here sal ervaar.
Ons verwelkom ook in besonder nuwe ouers en leerders in graad agt asook die in
ander grade. Tweehonderd graad agts begin vandag hul hoërskoolonderrig by ons.
Ook ‘n woord van welkom aan die personeel, veral nuwe personeellede. Hulle is
Mnr. Coenie van Niekerk (IGO), me. Vasti van Wyk (Kuns en Kultuur), en mnr.
Christo Pretorius (IGO).
Ons is dankbaar dat die skool die nuwe jaar kan begin met ‘n volledige en
uitstekende personeelkorps.
1. MATRIEKUITSLAE
Die matriekuitslae was, soos in die verlede, weereens uitstekend. Die slaagsyfer
van 99 % vergelyk goed met die ander skole in die distrik. Baie geluk aan die
personeel en leerders.
Ons toppresteerder was Marnus Ferreira met 9 A’s. Heinrich Joubert en Ilana Swart
met 7 A’s elk het ook uitstekend presteer. Heinrich Joubert, Ilana Swart en Leandri
Swanepoel het ook ’n toekenning van die LUR van Onderwys vir Gauteng
ontvang omdat hulle onder die top vyf presteerders van alle Tegniese Skole in
Gauteng was.
Baie sterkte aan vanjaar se matrieks en die personeel wat hulle moet onderrig.
2. KONTRAKDOKUMENT
Dié dokument word ook vandag vir bestudering en ondertekening aan u
gestuur. Sake wat onder andere hierin aangespreek word, is algemene sake,
asook spesifieke sake rakende toelatingvereistes, skoolgeld, vrywaring,
skoolreëls en die gedragskode van die skool. Die ondertekende dokument
moet in sy geheel nie later nie as Maandag, 14 Januarie 2013, terug wees by u
kind se voogonderwyser.
3. FINANSIES EN SKOOLGELD
Verlede jaar het die ouers weereens meer as 93% van die begrote skoolgeld
betaal ten spyte daarvan dat ons in moeilike ekonomiese tye leef. Baie dankie
daarvoor! Dit getuig van die ouers se positiewe gesindheid teenoor die skool
en dat die skool se fooie bekostigbaar is.
Die ouers van die skool het verlede jaar tydens die algemene ouervergadering
die skoolgeld vir 2013 op R9 900 vasgestel. Die goedgekeurde begroting vir
2013 is in die kantoor beskikbaar vir ouers wat nie die jaarlikse algemene
ouervergadering bygewoon het nie.
Die wyses van betaling word in die kontrakdokument in Bylaag B, uiteengesit.
‘n Registrasiefooi van R500.00 per gesin, wat ingesluit is by die skoolgeld,
moet teen Donderdag, 31 Januarie 2013 betaal wees. Die skool se
bankbesonderhede word verskaf indien u verkies om die skoolgeld elektronies
te betaal. Onthou om u kind se verwysingsnommer by elektroniese betalings
te meld.
Die skool se bankbesonderhede is as volg : ABSA
Ben Swartstraat
Tak nr : 334645
Rek nr : 0090750569
Daar is ook kredietkaartfasiliteite beskikbaar in die finansiële kantoor vir u
gerief.
Indien u enige navraag het, kan u mev. Ilza van Rensburg of mnr. Eddie
Vigoureux kontak.

4. GEDRAG
Goeie, gesonde dissipline is een van die talle redes waarom u u kind na HTS John
Vorster stuur.
Een voorwaarde vir goeie dissipline is EENVORMIGHEID met betrekking tot
voorkoms en drag. U sal daarom verstaan dat ek geen afwykings van die
eenvormige en neergelegde riglyne kan toelaat nie. Hierdie riglyne is opgestel en
aanvaar deur die leerders, ouers en personeel. Indien u kind vandag ‘n geel of rooi
vorm ontvang het oor voorkoms of drag, versoek ek u dringend om die sake reg te
stel. Indien u kind se voorkoms korrek is, wil ek hom/haar en uself bedank dat hy/sy
die eerste dag soos ‘n ware JV lyk. Wees verseker dat ons trots op ons voorkoms
en drag is en dat leerders wat vir ons ‘n verleentheid is of nie wil inpas nie en
daardeur die dissipline wil ondermyn, nie welkom sal wees nie.
Leerders wat nie wil inskakel nie, sal met kennisgewing huis toe gestuur word. As u
die saak nie kan of wil regstel nie, moet u vir hom/haar ‘n skool vind wat dit sal
aanvaar dat die leerder voorskryf wat hy/sy wil dra en hoe hy/sy wil lyk.
Dieselfde beginsel sal geld vir gedragsafwykings buite die normale patroon.
Ongelukkig het ‘n aantal seuns verlede jaar hul skoollidmaatskap as gevolg van
bogenoemde sake verbeur. Moenie dat dit vanjaar met u kind gebeur nie.
5. SPORT EN ANDER BUITEMUURSE AKTIWITEITE
Behalwe goeie akademiese werk en gesonde dissipline, is HTS John Vorster ook
bekend as ‘n kompeterende en suksesvolle skool in alle buitemuurse aktiwiteite.
‘n Voorvereiste is dat soveel moontlik leerders betrokke moet wees. Maak seker
dat u kind deelneem en nie in die bondel wegraak nie. Ons het elke leerder se talent
en positiewe gesindheid nodig.
Ons begin alreeds hierdie week met atletiekoefeninge waaraan almal kan deelneem.
Volgende Vrydag, 18 Januarie, vind alreeds ‘n eerste atletiekbyeenkoms plaas.
Ander sportsoorte wat ook dadelik ‘n aanvang neem, is swem, krieket en eersdaags
ook rugby en tennis. Vergelyk die aangehegte datumlys vir u beplanning. Daar is
ook verskeie kulturele en vakverwante buitemuurse aktiwiteite waarby u kind
betrokke kan raak.
6. UITREIKING VAN NUWE VOORRAAD
Enige leerder (gr. 9 – 12) wat nog uitstaande items van verlede jaar het en dit
nie teen Vrydag 11 Januarie terugbesorg het nie, se skoolgeldrekening sal met
die bedrag gedebiteer word om die onkostes te dek. Rapporte en ander
dokumente van verlede jaar wat nog nie afgehaal is nie, kan by die
graadhoofde van 2012 gekry word. Boeke wat verlore is, moet vergoed word
teen R130 per boek.
7. PARKERING OP SKOOLTERREIN
Slegs leerders wat oor wettige bestuurderslisensies beskik, sal toegelaat word
om hulle voertuie op die afgebakende terrein te parkeer. Ter wille van die
veiligheid van al die leerders mag geen leerder sonder ’n wettige
bestuurslisensie ’n voertuig op die skoolterrein bestuur nie. Ons vra dat u ons
asseblief in hierdie saak sal ondersteun.
8. AANMELDINGSVERSLAE EN AFWESIGHEIDSUITDRUKKE
Elke leerder ontvang maandeliks ’n aanmeldingsverslag waarop al die
positiewe asook negatiewe aanmeldings van die betrokke leerder getoon word.
Maak asseblief seker dat u hierdie verslag gereeld met u kind bespreek. Daar
sal ook tweeweekliks ’n uitdruk van elke leerder se afwesighede aan elke
leerder gegee word. Kontroleer asseblief hierdie afwesighede met u kind. Dit is
belangrik dat leerders elke dag by die skool sal wees om goeie akademiese
resultate te behaal. Volg dit asseblief op indien u nié hierdie verslae ontvang
het nie.
9. MAKRO-WONDERBOOM
Makro-Wonderboom is een van die skool se hoof borge. U kan by HTS John
Vorster, me. King / mnr. Vigoureux, ’n aansoekvorm kry, om aansoek te doen
vir ’n Makrokaart wat direk aan die skool se naam gekoppel is. Met alle
aankope wat u as indiwidu of vir u besigheid, met dié kaart by die instansie
doen, ontvang die skool ’n sekere persentasie rabat (rebate), wat die
Beheerliggaam en die skoolbestuur weer vir die skool se skoolfonds kan
aanwend. Ons wil ’n versoek tot u rig om ons ook met dié projek te
ondersteun. Vir verdere navrae kan u mnr. Vigoureux skakel.
10. BELANGRIKE DATUMS – EERSTE KWARTAAL
Vrydag 11 Januarie - Gr.8 – Atletiek en Swemgala
Vrydag 18 Januarie - Atletiek : Centurion (weg)
Maandag 21 Januarie - Prysuitdeling Gr.8 (2012)
Dinsdag 22 Januarie - Prysuitdeling Gr. 9 (2012)

Woensdag 23 Januarie - Prysuitdeling Gr.10 (2012)
Donderdag 24 Januarie - Prysuitdeling Gr.11 en 12 (2012)
Vrydag 25 Januarie - Atletiek : Rustenburg (weg)
Vrydag 1 Februarie - Atletiek : Mootbyeenkoms by Oos-Moot
Vrydag 8 Februarie - Atletiek : Sutherland (weg)
Donderdag 14 Februarie - Swem Interskole-gala
Vrydag 15 Februarie - Atletiek : Die Wilgers (weg)
Maandag 18 Februarie - Toetsreeks begin
Vrydag 1 Maart - Atletiek Interhoër LC
Maandag 4 Maart - Rugbyproewe begin
Saterdag 9 Maart - Rugbyproewe
Saterdag 16 Maart - Rugby vs Pretoria Boys High (weg)
Woensdag 20 Maart - Skole sluit
Elke leerder ontvang ook Maandag ’n kwartaalprogram met al die belangrike
datums.
Voltooi asseblief die aangehegte skeurstrokie en stuur dit terug aan die skool.
Enige navrae kan aan my, die skoolbestuur of die beheerliggaam gerig word.
Ons sien met opgewondenheid uit na die nuwe skooljaar met al sy nuwe uitdagings.
Met die ondersteuning van die personeel, leerders en ouers asook genade van Bo,
sal HTS John Vorster net van krag tot krag gaan.
Sterkte en voorspoed vir 2013.
JV-Groete
………………………….
J.C. STEINMANN
HOOF
-Skeurstrokie-
Hiermee neem ek, ouer/voog van ………………………………………………… in
gr. ……/……. kennis van omsendbrief 1 van 2013.
……………………………. …………………………….
OUER/VOOG Datum