beeld en kommunikasie - Bybel-Media

Hoofstuk 5: Fokusgroepondersoeke
5.1 Doel van fokusgroepondersoek
Die doel van die fokusgroepondersoek was om die vraelysondersoek aan te vul en enige
onduidelikhede en/of interpretasieprobleme te probeer oplos. Omdat ’n vraelysondersoek
noodwendig problematies is omdat die fyner nuanses van lesers se ervarings dikwels verlore gaan, is
dit belangrik om ’n geleentheid te skep waar hierdie nuanses ontgin kan word.
5.2 Metodologie
Die fokusgroepe is na afloop van die vraelysondersoek by dieselfde gemeentes waar die
vraelysondersoek gedoen is, gehou. Elke groep by ’n gemeente is saamgestel uit lidmate van die
betrokke gemeentes en het bestaan uit sewe tot tien deelnemers elk. Die fokusgroepe was semigestruktureer
deurdat dieselfde vrae aan al die groepe gestel is om die gesprek te lei. Hierdie
strukturering het verseker dat die fokusgroepe dieselfde inkleding gehad het, die fyner uitbreiding
van temas is bepaal deur die aard van elke gesprek en het dus sy eie individuele karakter gehad.
Hierdie gesprekke was minder gestruktureer om te verseker dat die navorsers wat die fokusgroepe
lei, nie leidende vrae stel wat spesifieke response uitgelok het nie. Daar is egter, in al die gevalle,
definitiewe en herhalende temas wat na vore gekom het, maar hierdie temas is deur deelnemers
self geïdentifiseer en is nie deur die navorsers ingelei nie. Die vrae wat by elke fokusgroep die
gesprek gestruktureer het, was die volgende:
• Kry u gereeld publikasies soos die Kerkbode, LIG en Vrydagnuus te lese?
• Watter ander kommunikasie kry u van die Kerk?
• Wat is u gevoel in die algemeen oor die kommunikasie wat van die kerkowerheid uitgaan?
• Word die onderwerpe wat u belangrik ag voldoende gedek in die kommunikasie van die
Kerk? Verduidelik.
• Wat is u gevoel oor die gehalte van die kommunikasie en die wyse waarop die
kommunikasie gevoer word.
• Hoe voel u oor die beeld wat die Kerk uitstraal?
Die tema-analise is deur ’n onafhanklike, onbetrokke en daarom ook objektiewe navorser gedoen
om enige subjektiwiteit in die analise uit te skakel. Die gevolgtrekking van die onafhanklike navorser
ondersteun die algemene tendense wat deur die leiers van die fokusgroepe opgetel is.
5.3 Profiel van deelnemers
Die fokusgroepe het bestaan uit tussen sewe en tien deelnemers met die meeste deelnemers uit die
stedelike fokusgroepe (sien Figuur 5.1) alhoewel die getalle redelik verspreid was. In die algemeen
was daar 18.4% meer dames as mans wat aan die fokusgroepe deelgeneem het (sien Figuur 5.2). Dit
is egter interessant om te let daarop dat meer mans as dames in die stedelike gebiede deelgeneem
het, teenoor die platteland waar ’n oorweldigende hoeveelheid dames by die fokusgroepe betrokke
was.
60