beeld en kommunikasie - Bybel-Media

3.2.1.3 Styl
Die volgende element waarop mens kan wys in ʼn teks waarop die GKBP toegepas kan word om ʼn
bydrae te lewer tot die skep van ʼn beeld wat die instansie graag wil uitstraal met die betrokke
geskrewe kommunikasie, is styl. Styl is eenvoudig gestel, nie wát jy sê nie, maar hóe jy dit sê. ʼn
Skryfstyl is nie noodwendig reg of verkeerd nie, maar kan gepas of minder gepas wees.
Die persona van die LIG is dié van ʼn byderwetse, ingeligte gesinstydskrif vir moderne gesinsmense vir
wie die geestelike sy van die lewe belangrik is. Die konteks van hierdie tydskrif is dat dit ʼn
“anonieme” publikasie van die NG Kerk is wat op die ope mark verkoop word saam met ander
populêre tydskrifte, maar ook in gemeentes beskikbaar is en versprei word. Vandaar die geestelike
karakter.
Taal weerspieël kultuur. Die taalgebruik in LIG weerspieël ʼn ernstige kultuur met weinig humor. In
die Augustus 2007-uitgawe (sien Figuur 3.2) verskyn daar byvoorbeeld ʼn artikel vir tieners (jongLIG).
Frases en sinne soos …weinig geleentheid vir groei…, …wyer te dink en te doen…, …daag jouself uit…,
…oor kultuurgrense heen, besoek ʼn ander kerk, gee van jou tyd val formeel en outyds op, nie die
register wat vir of deur jongmense gebruik word nie. In hierdie stuk val die keuse telkens op ʼn meer
formele styl. Dieselfde geld vir die jongLIG in die Junie 2007-uitgawe. Die grafika wat gebruik word is
modern en selfs informeel, maar sodra daar dieper in die teks ingegaan word, tref mens ʼn ander
register aan.
22