Riglyne vir Wêreld Vigsdag Erediens, Saamgestel en ... - Cabsa

Sondag 2 Desember 2012
Fokusteks: Lukas 21:25-38
Die Koninkryk van God is NABY
Riglyne vir Wêreld Vigsdag Erediens,
Saamgestel en Versprei deur CABSA
___________________________________________________________________

Ter agtergrond en Voorbereiding:
1 Desember is Wêreld Vigsdag. Dit word jaarliks reg oor die wêreld gebruik as ‘n dag om
bewustheid rondom MIV en Vigs te kweek en mense op te roep om deel te word van die
oplossing. Die tema hierdie jaar is steeds – “Getting to Zero”. Ons kan dit probeer vertaal
na: “Op pad na nul” en dit dui op die strewe na geen nuwe MIV infeksies, geen
Vigsverwante sterftes en geen stigma en diskriminasie.
Ook ons as kerk – as gemeenskap van gelowiges – is onlosmaaklik deel van hierdie wêreld
wat gebuk gaan onder die impak van MIV en Vigs. Daarom word ook ons as kerk geroep om
deel te wees van die oplossing.
Dit is waar dat MIV nie in alle kerke ewe intens of opsigtelik beleef word nie – maar hoe dit
ook al sy, 1 Kor 12:12-31 help ons om te verstaan dat:
“Net soos die liggaam ’n eenheid is en baie lede het, en soos al die lede saam, al is hulle baie,
een liggaam vorm, so is dit ook met die liggaam van Christus (12) ...Die liggaam bestaan ook
nie net uit een lid nie, maar uit baie. (14) ... Maar nou het God die lede, elkeen van hulle
afsonderlik in die liggaam gevoeg soos Hy dit wou hê. (18) ... Nou is daar wel baie lede, maar
net een liggaam. (20) Die oog kan nie vir die hand sê: Ek het jou nie nodig nie ... (21) ...
inteendeel ... As een lid ly, ly al die lede saam; en as een lid geëer word, is al die lede saam
bly.(26)”
In die lig hiervan, laat ons ons nie net vaskyk in die konteks van ons eie gemeente nie, maar
laat ons wyer kyk en doelbewus kies om ons te identifiseer met die MIV positiewe liggaam
van Christus.
Enkele statistiek kan gebruik word om te beklemtoon dat MIV ’n onlosmaaklike deel van ons
Suid-Afrikaanse konteks is:
Volgens UNAIDS en die Wêreldgesondheidsorganisasie is daar na raming 5.57 miljoen
mense In Suid-Afrika wat MIV positief is, dit beteken dat ongeveer 17.9% van die Suid-
Afrikaanse bevolking (15 -49 jaar) met MIV leef. En as ons verder ook dink aan die ouers,
gades, kinders, families, vriende, versorgers en kollegas van elkeen van hierdie individue,
dan is dit baie duidelik dat die impak van MIV baie ver en diep in ons gemeenskappe
uitkring.
Die Departement Gesondheid se volledige verslag met meer detail oor die verspreiding van
MIV in verskillende provinsies en ouderdomsgroepe kan by
http://www.doh.gov.za/docs/reports/2011/hiv_aids_survey.pdf afgelaai word. Hou ook die
media dop, want nuwe verslae word gewoonlik in die tyd van die jaar vrygestel. (Dit sal ook
op www.cabsa.org.za gelaai word.)
Internasionale VIGS statistieke is beskikbaar by
http://www.unaids.org/en/dataanalysis/datatools/aidsinfo/
So lank as wat ons in Afrika en in Suid-Afrika bly, is MIV en Vigs ’n onlosmaaklike deel van
ons alledaagse konteks. En die saak verdien dus om dwarsdeur die jaar op verskeie maniere
ons aandag te kry.
Maar op die Sondag voor of na 1 Desember doen ons ’n beroep op u as gemeente om op ’n
baie konkrete manier gestalte te gee aan hierdie saak. Dit is uiters noodsaaklik dat ons as

kerk ons vereenselwig met die MIV epidemie en bereid is om deel te wees van ’n
gemeenskap wat met verantwoordelikheid en deernis hierop reageer.
Wêreld Vigsdag val ook binne die 16 Dae van Aktivisme teen Geslagsgeweld (Gender
Violence) waarin daar ook aandag gegee word aan ’n verskeidenheid ander sake waarin die
profetiese stem van ons as kerk baie duideliker gehoor behoort te word.
Meer inligting oor die veldtog is beskikbaar by: http://www.cabsa.org.za/content/16-daysactivism-against-gender-violence
Video snitte wat vanaf YouTube afgelaai kan word en op verskillende tye tydens die
erediens gebruik kan word, is:
Maak seker dat u self na die snitte gekyk het en gemaklik is met die inhoud wanneer snitte
gekies word.
Words and Actions (Kan baie goed aan die einde van erediens gebruik word as oproep tot
aksie)
http://www.youtube.com/watch?v=vGi7EwWX_b0&feature=endscreen&NR=1 of
http://www.youtube.com/watch?feature=player_detailpage&v=vGi7EwWX_b0
HIV infections falling (Kan gebruik word rondom MIV statistiek)
http://www.youtube.com/watch?v=bFnaLXenRn0&feature=endscreen&NR=1
7000 infections per day
http://www.youtube.com/watch?v=PNZVwJU0nlw
I predict:
http://www.youtube.com/watch?v=vEUIQd9kk0Y&feature=list_other&playnext=1&list=SP9
407AE8E2E8EEB4B
Don’t turn your back (Kan oor en oor gespeel word, soos gemeente uitloop aan die einde
van die diens)
http://www.youtube.com/watch?v=coPEVTSuw8o

Liturgie
Welkom
Votum:
Aan God die Vader, ons Verlosser Jesus Christus, wat mens geword het en in ’n nederige stal
gebore is, en God die Gees wat in ons woon en ons harte op U rig en ons herinner aan die
lewende ware hoop wat deur Christus se kruisdood bewerkstellig is. Aan U kom toe al die lof
en die eer en die heerlikheid. Tot in alle ewigheid. Amen.
Seëngroet:
Geseënd is die wat weet hoe afhanklik hulle van God is, want aan hulle behoort die
koninkryk van die hemel. (Mat 5:3)
Lofprysing en Aanbidding.
Moontlike liedere om te gebruik:
Lied 159, 168, 169, 175, 177, 190
Gebed en Kers-seremonie
Aansteek van eerste Advent kers:
(Voorbereiding: Voor die erediens kry die volgende gereed: ’n groot genoeg wit kers sodat
gemeente dit sal kan sien – plaas dit op staander of preekstoel of tafel waar duidelik sigbaar
is. Sorg ook vir vuurhoutjies en ’n rooi strik van ongeveer 60 cm.)
Liturg: Vandag is die eerste Sondag in adventtyd. Alhoewel die winkels en advertensies al
lankal Kersfees uitbasuin, is Advent die tyd waarin ons as kerk begin uitsien en voorberei
om die geboorte van Jesus Christus te vier.
Daarom steek ons vandag die eerste adventskers aan – en hierdie kers brand vandag vir
ons as teken van HOOP. Hierdie kers brand vandag om ons te herinner dat ons hoop
geanker is in die lewende en Heilige God, Christus Jesus wat mens geword het en onder
ons kom woon het, Immanuel, God met ons.
(Steek kers aan. Of nooi ’n gemeentelid om dit te doen. Of spreek voor die tyd met iemand
spesifiek af.)

Liturg: In byna skrille kontras met die boodskap van Advent, val die aanbreek van Advent
ook saam met die harde werklikheid van hierdie wêreld waarin ons ons bevind. Gister is
Wêreld Vigsdag dwarsoor die wêreld herdenk wat ons herinner aan etlike miljoene
lewens wat deur die MIV pandemie geraak word.
Ook hier in die kerk het ons nodig om mekaar te herinner aan die teenwoordigheid van
MIV en Vigs in ons samelewing en ook in ons geloofsgemeenskap. En is daar ook vandag
vir ons troos daarin om te weet dat hierdie kers van hoop ook getuig van hoop in Christus
vir elke gesin en familie wat se lewens direk geraak word deur die teenwoordigheid van
MIV of Vigs.
(Neem ’n rooi lint en bind/strik dit om die Hoop. Of spreek vooraf af met ’n gemeentelid om
vorentoe te kom en dit te doen.)
Vra gemeente om die volgende gebed hardop saam te bid:
Jesus, U skenk aan ons lewe en hoop
U wat mens geword het, onder ons kom woon het,
U het self die liefde van ‘n aardse familie geken
En ook die kameraadskap en vriendskap van u dissipels,
Selfs toe u aan die kruis gehang het, was u moeder en van U vriende daar naby U.
Immanuel, God met ons
Ons wil dan ook nou spesifiek kom bid vir diegene onder ons en rondom ons
Wat met MIV en Vigs leef...
Mag elkeen geseën wees met die liefde en omgee van vriende en familie,
Mag U teenwoordigheid en hoop vir ons almal tasbaar wees – veral in moeilike tye,
Mag daar in elkeen se fisiese en geestelike behoeftes voorsien word
En mag niemand alleen of verwerp voel nie.
Here, mag elkeen tuis en veilig voel – en veilig wees, hier in ons midde
En leer ons om met deernis en begrip saam te huil en mekaar se laste te dra,
Maar ook saam te jubel in U, ons enigste ware hoop
Amen
Skriflesing
Fokusteks vandag: Luk 21: 25-38
Die koninkryk van God is NABY

Woordverkondiging
(Verwys asseblief na die volledige preekstudie “ 2 Desember 2012, Eerste Sondag in Advent,
Preekstudie – Lukas 21:25-38 in Woord en Fees “ vir meer gedetailleerde agtergrond oor die
bepaalde teks. Ons lig egter die volgende 4 hoof gedagtes uit.)
1. Ons wag nog op Jesus se wederkoms
Eerstens word ons in die teks daaraan herinner dat hierdie indrukwekkende, majestueuse
wederkoms waarvan ons in v 27 lees, nog nie plaasgevind het nie. Wanneer Lukas hierdie
gedeelte skryf, (85-90nC) gebruik hy Markus se evangelie as bron waar reeds 20 jaar vroeër
geskryf is oor die wederkoms van Jesus. Lukas moet probeer sin maak daaruit dat dit 20 jaar
later is en Jesus het nog nie teruggekom nie.
En vandag 2000 jaar later is die vraag nog meer relevant, want ons leef steeds in afwagting
op Jesus se wederkoms en ons word seeds gekonfronteer met die realiteit dat Hy nog nie
teruggekeer het nie. Dit sou ’n mens natuurlik by die vraag kon bring – hoe behoort ons te
wag op die wederkoms?
2. Dit mag soms voel asof God vandag afwesig is
In vers 25-26 lees ons van angswekkende tekens in die natuur, wat radeloosheid, angs en
vrees onder die mensdom saai.
“Die mense sal beswyk (letterlik hul asem uitblaas) van vrees en spanning oor die dinge wat
oor die hele wêreld aan die kom is, want die kragte van die hemelruim sal ontwrig word.”
v26
En as ons dink aan die realiteite van ons eie konteks, sou ons ook kon sê dat die uitdagings
van ons tyd ‘n mens baie keer laat voel dat God en sy koninkryk baie ver verwyderd staan
van ons daaglikse werklikhede.
Ons as mensdom staar verskeie krisisse in die gesig. Wêreldwyd is ons baie bewus van
gereelde natuurrampe - dink maar net aan die verwoesting en ontwrigting wat Super-storm
Sandy onlangs gesaai het en die effek van aardverwarming. Dan is daar nog die ekonomiese
resessie wat almal raak, maar veral gevestigde ou ekonomieë in Europa op hul knieë dwing,
politieke onstabiliteit en dreigende oorloë in die Midde Ooste, maar ook in verskeie ander
lande. Om nie te praat van armoede en die feit dat ongeveer 34 miljoen mense wêreldwyd
met MIV of Vigs leef nie!
Hier plaaslik lyk die prentjie nie veel beter nie. Ons almal onthou die Marikana ramp, die
uitgerekte stakings dwarsoor die mynbedryf, daar is grootskaalse korrupsie, werkloosheid,
stygende lewenskoste, geweld, onverdraagsaamheid en agterdog. En dan is ons boonop nog
een van die lande met die meeste MIV positiewe mense. Daar is ongeveer 5.57 miljoen
mense in Suid-Afrika wat met MIV leef. Dink net aan die ongelooflike impak wat dit op
soveel aspekte van ons samelewing het.

Ons sou inderdaad kon vra, waar is God dan? Is ons besig om tevergeefs op Jesus se koms te
wag?
3. Sien die tekens, tel jou kop op!
En wat sê Lukas? Hy daag ons uit om die hoop wat ons in Christus het, te LEEF en sê in v28 ...
“As hierdie dinge begin gebeur, staan dan regop en lig julle kop op, want dan is julle
verlossing naby.”
Ons word herinner dat ons hoop geanker is in die lewende Christus. Hierdie dinge sal
verbygaan, maar ons, ons droom oor die nuwe Jerusalem! Ons word dus herinner, eintlik
opgeroep, om nie moed te verloor nie en regop te staan.
Lukas gaan selfs verder deur te sê “dat wanneer julle hierdie dinge sien gebeur, weet dat die
koninkryk van God naby is.”( v31)
Hoekom? Want hierdie dinge is ’n teken:
- Soos ’n boom wat begin uitloop en bot vir ons ’n teken is dat somer naby is
- Soos die blink versierings in die winkels ’n teken is dat Kersfees naby is
- Soos Kersfees vir ons ’n teken, ’n herinnering is aan God se liefdesgeskenk aan ons
- Soos Jesus se geboorte ’n teken is van die verlossing wat God vir ons bewerkstellig het ...
So ook, is die dinge wat dreig om ons bang en radeloos te maak ’n teken dat die koninkryk
van God naby is.
4. Maar hoe gemaak met hierdie tussen-in tyd?
Hoe kan die koninkryk van God naby wees as dit so ver voel? As ons deur soveel pyn en
lyding omring word?
Die bekommernisse van die wêreld het die vermoë om ons af te rem, en die feit dat dit
verbygaan is nie noodwendig genoegsame troos vir ’n mens se daaglikse bestaan nie. Die
realiteit is dat ons weet daar gaan ’n einde kom aan hierdie wêreld, maar terwyl dit nog nie
die einde is, nie hoe leef ons nou?
Wag ons vir die koninkryk om uit die hemel te arriveer – of bring ons intussen die koninkryk
van God na ons huidige konteks? Of is dit eerder ’n kwessie van – sien ons God se koninkryk
in ons en om ons raak?
Die persoon wat vandag met MIV gediagnoseer word, sal definitief nie onmiddellike
vertroosting daarin kry dat almal immers eendag sal doodgaan nie, want die lewe wat ons
almal ken, is die een hier reg voor jou. En as ons met mekaar eerlik sou wees, dan wil
meeste van ons nie eintlik vandag dood gaan nie! Ons het drome en planne en mense hier in
ons aardse bestaan! En terwyl ons hier is, poog ’n mens tog om soveel moontlik betekenis
aan jou aardse bestaan te gee. En op dieselfde manier is dit ook logies dat die van ons wat
met MIV leef steeds hoop oor ’n betekenisvolle lewe en ook daaroor droom om ons kinders
te sien groot word en saam met ons geliefdes oud te word.

God het tog immers hierdie aarde geskep. As ons aardse bestaan vir God so onbenullig was,
hoekom sou Hy soveel bemoeienis gemaak het om ons weer met hom te versoen? Hoekom
gaan ons nie maar net almal dood en gaan solank hemel toe nie?
Dr Ronell Bezuidenhout skryf:
“As jou lewe onderstebo is, wil jy uitkoms hê ... sulke mense hou vas aan hoop. Dit dwing
ons natuurlik, as dit met ons goed gaan, om hulle te ondersteun met wie dit nie goed gaan
nie! Hulle wie se koppe hang, wie se bekommernisse hulle skouers plattrek. Dis vir hulle wat
ons ook ’n sluier moet lig ... want die een ding wat ons moet onthou, is dat ons slegs die
“nou” het om mee te leef .... hierdie tyd is nie “naby” omdat dit nog nie aangebreek het nie,
maar naby ... teenaan ... by ... rondom ... so naby ons, [want die] tyd het immers reeds
aangebreek!”
Jesus het reeds ons verlossing bewerkstellig. Daarom leef ons nou en kan elkeen van ons
vashou daaraan dat God ook teenwoordig is in ons vandag.
En as ons hoor dat die koninkryk van God naby is, moet ons dalk begin om nie net aan die
woord “naby” in terme van tydsaanduiding te dink nie. Die woord “naby” verwys immers
ook na posisie. Die koninkryk van God is naby beteken dus ook dat dit naby aan MY lyf en
MY werklikheid is.
Of ek MIV positief is of nie. Of MIV my huishouding direk raak of nie. Of ek al geliefdes aan
’n Vigsverwante dood afgestaan het of nie... of ek heimlik bekommerd is oor my eie MIV
status ... of leef met die skuld dat ek nie altyd getrou is aan my lewensmaat nie ... die een
ding wat ons almal met mekaar gemeen het, is dit :– vandag het ons almal vandag voor ons.
Ons weet nie oor môre nie. Ons weet nie wanneer Jesus se glorieryke terugkeer op die
wolke is nie, maar wat ons wel het, is vandag. Vandag is naby. Vandag is werklik. En hoe kan
ons vandag leef om die koninkryk van God te sien gestalte kry rondom my, naby my?
Die teks praat nie van ’n passiewe wag nie ... ons lees: “staan regop en lig jou kop op (v28),
wees op julle hoede (v34), wees waaksaam en bid altyddeur (36).”
Die Gees en die bruid sê: “Kom!”
En elkeen wat dit hoor,
Moet sê: “Kom!”
En elkeen wat dors het,
Moet kom;
Elkeen wat die water van die lewe wil hê,
Moet dit kom kry, verniet!
Openbaring 22:17
Want “Vandag is daar vir julle in die stad van Dawid die Verlosser gebore, Christus die Here!”
Lukas 2:11.
Uitnodiging aan gemeente
Liturg: Liewe Gemeentelede, terwyl ons waak, terwyl ons bid, brand die kers van hoop
vandag vir elkeen van ons en herinner dit ons dat ons hoop nie net in eendag is nie. Ons
leef vandag in die heerlike wete dat God vandag reeds teenwoordig is in en gemoeid is
met ons lewens. Ons weet ook dat God DEUR ons teenwoordig is in mekaar se lewens.

Laat ons dan ook in hierdie erediens gestalte gee aan ons deernis vir mekaar en elkeen
wie se lewens diep geraak word deur MIV en Vigs.
(Liturg kan enige van die volgende opsies kies en die gemeente as volg uitnooi):
Opsie 1
Liturg: As jy vanoggend jouself, ’n lewensmaat, ’n kind, ’n broer of suster, ’n vriend, kollega
of werknemer aan die Here wil opdra wat met MIV leef of saam-leef, kom gerus na vore
en steek ’n kersie vir hierdie persone aan.
(Nota: ’n Lied of sagte begeleiding kan in die agtergrond gespeel word, terwyl mense tyd het
om na vore te kom.
Maak seker dat genoeg klein kersies in mandjies beskikbaar is. Die eerste paar mense kan
hul kersies by die Hoop kers aansteek, maar daarna kan hulle ook hul kersies bymekaar
aansteek.)
Opsie 2
Liturg: As jy vanoggend jouself, ’n lewensmaat, ’n kind, ’n broer of suster, ’n vriend, kollega
of werknemer aan die Here wil opdra wat met MIV leef of saam-leef, kom gerus na vore
sodat ons almal saam kan bid.
(Nota: ’n Lied of sagte begeleiding kan in die agtergrond gespeel word, terwyl mense tyd het
om na vore te kom.)
Opsie 3
As jy vanoggend jouself, ’n lewensmaat, ’n kind, ’n broer of suster, ’n vriend, kollega of
werknemer aan die Here wil opdra wat met MIV leef of saam leef, staan op sommer net
daar waar jy is. Wanneer ons opstaan, verklaar ons ons solidariteit met mekaar en erken ons
dat die liggaam van Christus ook met MIV saamleef.
(Nota: Gee geleentheid vir gemeente om hieroor te dink en om rustig te beweeg en bid dan
die volgende gebed saam.)
Gebed in reaksie op MIV en Vigs (verkorte weergawe)
(Die hele gemeente kan gevra word om op te staan en saam te bid.)
Liturg: Hemelse Vader, ons buig voor u in eerbied en aanbidding. Ons prys U, Here Jesus,
dat U na die wêreld gekom het, sodat ons kinders van God kan word – erfgename van die

ewige lewe. Heilige Gees, ons loof U as ons Trooster en ons Leidsman op die pad van
geloof...
Gemeente: .... want aan U liefde is daar geen einde nie.
Liturg: Genadige Vader, ons dink vandag veral aan hulle wat siek is, veral die wat ly as
gevolg van MIV of Vigs...
Gemeente: .... want aan U liefde is daar geen einde nie.
Liturg: Gee hulle die moed om met hierdie toestand te lewe. Help hulle om hulle vrese te
erken en te oorwin. Wees met hulle wanneer hulle alleen en verwerp voel. Troos en
bemoedig hulle wanneer hulle sonder hoop voel. Raak hulle aan, o Heilige Gees, sodat
hulle lewe kan vind in die lewe wat U aan elkeen van ons wil skenk – die ewige lewe...
Gemeente: .... want aan U liefde is daar geen einde nie.
Liturg: Heilige en lewe-gewende God, vul ons harte en gedagtes met U liefde en deernis vir
mekaar. Verwyder vrees, stigma en vooroordele uit ons hart en leer ons om met U hart
na mekaar te kyk.
Gemeente: .... want aan U liefde is daar geen einde nie.
Liturg: Hemelse Vader, vergewe ons versuim om genoegsaam op die MIV pandemie en die
noodkrete van mense wat ons nodig het, te reageer. Vul ons met U liefde en deernis, en
maak ons draers van U hoop.
Gemeente: .... want aan U liefde is daar geen einde nie.
Amen
Lied:
(Moontlike liedere Lied 602, 599 of 590. Gemeente sing staande)
Seëngroet: Laat ons hier uitmekaar gaan oorgehaal om draers van hoop te wees – om
regop te staan in die wete dat God en sy koninkryk inderdaad naby is!

Beskikbaar gestel deur CABSA
Ontwikkel deur Aneleh Fourie le Roux
Gebaseer op “Woord en Fees - Preekstudies en Liturgiese Voorstelle Gebaseer op die
Kerklike Jaar 2013”, Bybel-Media.
Teks Verwysings Afrikaans Nuwe Vertaling © 1975, 1979, 1983, Bybelgenootskap van Suid-
Afrika
Wellington Kantoor
Posbus 16
Wellington
7654
Tel/
Faks: +27(0)21 873 0028
CARIS Kantoor
Posbus 771417
Fontainebleau
2032
Tel: +27 (0)11 796 6830
Faks: +27 (0)11 796 6810