Interimresultate vir die ses maande geëindig 30 Junie 2009 - Sanlam

Prestasie-oorsig
Teen die agtergrond van die uitdagende omgewing het die Groep ’n
bevredigende bedryfsprestasie vir die eerste ses maande van die 2009finansiële
jaar aangeteken. Dit is aangehelp deur die gediversifiseerde aard
van die Groep se bedrywighede ten opsigte van marksegmentasie,
oplossingsaanbiedings en geografiese teenwoordigheid, wat ’n platform was
vir voortgesette groei in nuwebesigheidsvolumes en ’n gesonde
winsgewendheidsvlak. Die druk op die middelinkomstekleinhandelmark in
Suid-Afrika is egter sigbaar in dalende nuwebesigheidsvolumes by Sanlam
Persoonlike Finansies en Sanlam Private Beleggings, maar goeie prestasies
in die institusionele en intreevlakmark het hiervoor vergoed. Bedryfswins het
ook gemengde prestasie weerspieël, met ’n groot bydrae deur die
kleinhandellewensversekering- en kapitaalmarkbesighede. Dit het byna die
negatiewe impak van die heersende marktoestande op die verklaarde
verdienste van die korttermynversekerings- en beleggingsbestuurbesighede
geneutraliseer. Ondanks die druk op verdienste is die kernbedrywighede van
al die belangrikste Groep-besighede gesond.
Die primêre prestasiedoelwit van die Groep is om aandeelhouerswaarde te
optimaliseer deur die opbrengs op Groep-ekwiteitswaarde (GEW) te
maksimaliseer. ’n Teiken is gestel vir die groei in GEW om die Groep se koste
van kapitaal op ’n volhoubare grondslag te oorskry. Koste van kapitaal is
vasgestel as die opbrengskoers op langtermynstaatseffekte plus 3%. Die
doelwit is om hierdie opbrengs met minstens 1% te oorskry. Die jaarlikse
opbrengs op GEW per aandeel van 5% vir die ses maande geëindig
30 Junie 2009 het nie hierdie doelwit bereik nie, maar verteenwoordig steeds
’n goeie prestasie gegewe die betreklik swak beleggingsmarkte en ’n styging
van 2% in langtermynrentekoerse (en dus risikoverdiskonterings-koerse wat
toegepas is) gedurende die tydperk. Veral die verhoging in
risikoverdiskonteringskoerse het die waardasie en GEW-verdienste van die
lewensversekerings- en welvaartbestuurbesighede verminder. Op ’n
genormaliseerde grondslag, d.w.s. as ’n genormaliseerde beleggingsmarkprestasie
veronderstel en enige eenmalige items uitgesluit word, het die
jaarlikse opbrengs van 12,2% vir die ses maande die teiken van 11,3%
oorskry.
Totale nuwebesigheidsvolumes, uitgesluit die wisselvallige en laemarge
“white label”-besigheid, het met 3% gegroei – ’n besonder bevredigende
resultaat in die huidige omstandighede. Kleinhandelbesigheidsverkope het
met 8% gedaal, en Sanlam Persoonlike Finansies en Sanlam Private
Beleggings het onderskeidelik afnames van 7% en 22% gerapporteer. Dit is
in ’n mate geneutraliseer deur Sanlam Ontwikkelende Markte se sterk groei
van 8%. Verkope deur institusionele besighede was uitstekend en het ’n
verbetering van 27% teenoor 2008 getoon. Meeste van die institusionele
besigheidseenhede het tot hierdie groei bygedra. Die waarde van nuwe
gedekte besigheid (ná minderheidsbelange) het met 3% afgeneem van
R250 miljoen in die eerste helfte van 2008 tot R243 miljoen in 2009. Dit
weerspieël die uitwerking van kleiner nuwe lewensbesigheidsvolumes in die
middel-inkomstemark. Die winsgewendheid van nuwe gedekte besigheid is
gehandhaaf deur voortgesette fokus op kostebestuur en die gehalte van
nuwe besigheid wat geskryf is, en algehele marges het van 2,17% in 2008
tot 2,23% in 2009 gestyg.
Kernverdienste van R1 789 miljoen is 6% laer as in 2008 weens die
gesamentlike uitwerking van ’n afname van 7% in die netto resultaat van
finansiële dienste en ’n daling van 4% in netto beleggingsinkomste op die
kapitaalportefeulje verdien. Die relatief laer basis van bates onder bestuur
het ’n negatiewe impak op die groei in fooi-inkomste en die winsgewendheid
van veral die beleggingsbestuurbesighede gehad. Dit is vererger deur
verskeie groot kommersiële-eiendomseise by Santam. Kernverdienste per
aandeel het met slegs 2% gedaal te wyte aan die uitwerking van die aandeel-
terugkoopprogram gedurende 2008, wat ’n vermindering van 4% in die
geweegde aantal uitgereikte aandele teenoor die eerste helfte van 2008 tot
gevolg gehad het.
Die beleggingsopbrengs op die Groep se kapitaalportefeulje was gedurende
die eerste ses maande van 2009 effens positief, met ’n positiewe plaaslike
aandelemarkopbrengs wat in ’n mate geneutraliseer is deur ’n afname in
die waardasie van rentedraende instrumente en buitelandse beleggings. Die
beleggingsopbrengs was egter aansienlik beter as die negatiewe prestasie in
die eerste helfte van 2008. Genormaliseerde wesensverdienste per aandeel
het voordeel getrek uit die ommekeer in beleggingsopbrengs en was 34%
hoër as in 2008. Verwaterde wesensverdienste per aandeel, wat die impak
van Internasionale Finansiële Verslagdoeningstandaarde (IFRS) op Sanlamen
Santam-aandele wat deur die polishouersfonds gehou word, insluit, is
13% laer as in 2008.
Uitvoering van strategie
Die Groep se gefokusde strategie het hom weereens goed te staan gekom in
die eerste ses maande van 2009, wat gekenmerk is deur die voortsetting van
die mees uitdagende omgewing waarmee die Groep in baie jare te kampe
gehad het. Die Direksie en bestuur is steeds verbind tot die Groep se
hoofdoelwit om aandeelhouerswaarde te maksimaliseer. Dit word ondersteun
deur die vyf pilare van optimale kapitaalaanwending, verdienstegroei, koste
beheer en doeltreffendheid, diversifikasie en transformasie. Geen aandeelterugkope
het gedurende die eerste ses maande van 2009 plaasgevind nie.
Soos aangedui in die Groep se 2008-jaarverslag word in die huidige finansiële
en ekonomiese omgewing ’n meer omsigtige benadering by die aanwending
van diskresionêre kapitaal vereis. Die fokus was gevolglik op die verdere
optimalisering van die Groep se kapitaalbasis, en slegs ’n paar uitgesoekte
beleggings is in bestaande bedrywighede en toekomstige groeimarkte
gedoen.
’n Groot deel van die Groep se kapitaal word deur die lewensversekeringsbesighede
aangewend. Daar word deurlopend aandag gegee aan
kapitaalbestuur en -modellering binne hierdie besighede om ’n optimale
kapitaalvlak te verseker, met inagneming van die impak van veranderinge in
die kapitaal-bestuurstruktuur op verwagte opbrengs op GEW. Hierdie proses
het getoon dat aandeelhouerswaarde verder verhoog kan word deur ’n meer
konserwatiewe batesamestelling te implementeer vir die kapitaal wat die
lewensversekeringsbesighede ondersteun en sodoende die vlak van vereiste
kapitaal te verlaag. Die Sanlam-direksie het as doelwit ’n 10%-verlaging in
die kapitaalportefeulje se blootstelling aan beide aandele en vasterenteinstrumente
en ’n gevolglike 20%-verhoging in die blootstelling aan kontant
goedgekeur. Dit sal minder wisselvalligheid in die kapitaalbasis tot gevolg hê
en het kapitaal van nagenoeg R900 miljoen aan die Groep se diskresionêre
kapitaalportefeulje vrygestel. Die verandering in die batesamestelling het ’n
styging in die koste van kapitaal en gevolglik ’n eenmalige vermindering van
R313 miljoen in die waarde van vankrag- gedekte besigheid veroorsaak
(verwys kommentaar op resultate hieronder). Hierdie negatiewe impak sal
deur die waardetoevoegende aanwending van die bykomende diskresionêre
kapitaal geneutraliseer word.
’n Totaal van R375 miljoen is gedurende die tydperk vir korporatiewe
bedrywighede aangewend. Die grootste transaksies wat aangegaan is, was
die volgende:
4 5
› Ongeveer R200 miljoen is aangewend om die belang van minderheidsaandeelhouers
in Channel Life te verkry, wat die Groep se belang tot net
minder as 100% vergroot het. Hierdie verkryging sal die Groep in staat
stel om sinergieë tussen die lewensbesighede wat in die intreevlakmarksegment
in Suid-Afrika werksaam is, verder te verbeter en die
kapitaal-vereistes van die groei in hierdie mark doeltreffender te bestuur.