Tjaart Jurgens Maré Doctor Legum Universiteit van die Vrystaat

(1) Voor ʼn openbare ondersoek behoort die betrokke owerheidsorgaan ʼn
geskrewe verklaring vry te stel waarin alle besonderhede rakende die
aangeleentheid uiteengesit word.
(2) Die verantwoordelike minister behoort, wanneer moontlik, voor die
ondersoek ʼn verklaring van die beleid wat ten opsigte van die
besondere aangeleentheid toepassing vind, beskikbaar te stel. Omdat
die kommissie aanvaar dat die minister ten opsigte van die breë beleid
slegs aan die parlement verantwoordelik is, sou hy nie wou sien dat die
minister se verklaring van beleid in die beperkte forum wat die
ondersoek bied, gedebatteer word nie. Dit behoort die minister daarom
vry te staan om te gelas dat sy verklaring van beleid geheel en al, of
gedeeltelik, van die beraadslagings tydens die ondersoek uitgesluit
word. Enige verandering in beleid na afhandeling van die ondersoek
moet deur die minister verduidelik word.
(3) Ten einde die onpartydigheid te verseker van die persone wat die
ondersoek waarneem (inspekteurs), behoort hulle onder beheer van die
Lord Chancellor geplaas te word en nie die betrokke departement nie.
(4) Tydens die ondersoek behoort van die minister vereis te word om die
voorgenome administratiewe optrede met behulp van mondelinge
getuienis toe te lig.
(5) Die prosedure tydens die ondersoek moet eenvoudig en goedkoop,
maar ordelik wees. Die Council on Tribunals moet die prosedure
formuleer, en dit moet in wetgewing vasgelê word.
(6) Die inspekteur behoort die bevoegdheid te hê om getuies te dagvaar en
die eed af te neem.
(7) Ten einde te verhoed dat amptenare ondervra word oor aangeleenthede
ten opsigte waarvan die parlement die korrekte forum is, beveel die
kommissie aan dat amptenare in die departement van die
verantwoordelike minister getuienis behoort af te lê slegs oor alle
aangeleenthede wat deur die verantwoordelike minister geïnisieer is.
(8) Die verslag van die inspekteur behoort openbaar gemaak te word,
omdat “publicity is in itself an effective check against arbitrary action.”
(9) Die minister se beslissing moet voldoende redes daarvoor bevat.
(10) ʼn Openbare ondersoek behoort voorkeur te geniet bo ʼn ondersoek agter
geslote deure.
37