Tjaart Jurgens Maré Doctor Legum Universiteit van die Vrystaat

449
die algemene publiek moet dus nie buite verhouding wees met die
voordele vir die gemeenskap of die individu nie; daar moet ʼn ewewig
bestaan tussen die doel en die middele.
• Die ewewigtigheid van die maatreël moet getoets word aan die nadele
wat deur die optrede voorkom is, die voordele wat uit die optrede sal
voortspruit en die nadele veroorsaak deur die maatreël. Die voor- en
nadele moet vergelyk en teen mekaar opgeweeg word.
Die volgende gevolgtrekkings kan gevolglik gemaak word:
1. Artikel 6(2)(f)(ii) reël die uitoefening van administratiewe diskresionêre
bevoegdheid.
2. Die Artikel vereis ʼn rasionele verband tussen die uitoefening van die
diskresie en die optrede as sodanig.
3. Die vereiste van regverdigbaarheid maak deel uit van die vereiste dat
daar ʼn rasionele verband moet wees tussen die redes wat vir die
besluit verskaf word, en die besluit self.
4. Die vereiste van eweredigheid bly ʼn administratiefregtelike beginsel.
Dit maak ʼn integrerende deel uit van die rasionaliteitsvereiste en is ook
deel van die verbod op onredelike administratiewe optrede.
5. Die eweredigheidsvereiste kom daarop neer dat die maatreël gepas en
nodig moet wees, en dat die botsende regte van nadeel vir die
individue en voordeel vir die gemeenskap teen mekaar opgeweeg en
uitgebalanseer moet word.
4.12 DIE BEPALING VAN ARTIKEL 6(2)(g) VAN PAJA : DIE BETROKKE OPTREDE
BESTAAN UIT ʼn VERSUIM OM ʼn BESLUIT TE NEEM
Artikel 6(2)(g) bepaal dat die versuim om ʼn besluit te neem grond vir geregtelike
hersiening daarstel. Dit is ʼn welkome insluiting, aangesien ʼn navraag deur ʼn
individu dikwels deur amptenare geïgnoreer is, op grond daarvan dat die saak
ondersoek of hersien word, of dat ʼn beslissing daaroor afgewag word. Artikel
6(2)(g) moet saam met Artikel 6(3) van die Wet gelees word, waar onderskei word
tussen :
• gevalle waar daar geen tydsbeperking gestel word waarbinne ʼn besluit
geneem moet word nie en
• gevalle waar die besluit binne ʼn voorgeskrewe tydperk geneem moet word.
In eersgenoemde geval kan om geregtelike hersiening aansoek gedoen word,
wanneer daar ʼn onredelike vertraging was om die besluit te neem. Die doel van
Artikel 6(3)(a) is om ʼn mate van redelikheid in te voer in die magtigende bepalings,
wat geen tydperk (waarbinne die besluit geneem moet word) spesifiseer nie.