Tjaart Jurgens Maré Doctor Legum Universiteit van die Vrystaat

388
word. Die vasgestelde-tydperkvereiste is slegs van toepassing op verlengings van die
tydperk.
Verlenging of vermindering van tydperke geskied by wyse van ooreenstemming tussen die
partye. Slegs ʼn redelike poging moet toegepas word om verlenging of vermindering te
verkry. Indien konsensus tussen die partye nie verkry word nie, kan ʼn hof of tribunaal die
versoek aanhoor. Volgens Artikel 9(2) kan die versoek ingevolge Artikel 9(1) toegestaan
word, mits dit in die belang van geregtigheid sal wees.
6. FORMELE VEREISTES VIR DIE VERSOEK
PAJA verlang nie dat die versoek om redes aan sekere voorgeskrewe vereistes moet
voldoen nie. Artikel 5(1) verwys slegs daarna dat ʼn persoon “may ..... request”. Enige
formele vereiste wat toegevoeg word waaraan die versoek om redes moet voldoen, sal
derhalwe ʼn lae standaard van regverdiging verlang.
Die regulasies mag vereis dat die versoek op skrif moet wees. Dit kan wel moontlik wees
dat hierdie ekstra vereiste onderhewig sal wees aan ʼn suksesvolle uitdaging dat dit nie
binne die trefwydte van PAJA val nie, of dat dit ʼn onkonstitusionele beperking op die reg
om redes te verskaf sal wees.
In die algemeen moet daar nie formele vereistes gestel word, waaraan die versoek vir
redes aan moet voldoen nie, aangesien so ʼn versoek nie ʼn moeilike en formele projek
moet wees, waaraan ʼn party wat die redes verlang, aan moet voldoen nie. Daar word geen
regverdiging in PAJA gevind vir die nakoming van formele vereistes waaraan ʼn versoek
om redes moet voldoen nie, aangesien dit beskou kan word as uit pas te wees met die
grondwetlike reg van administratiewe geregtigheid.
7. VOLDOENDE/GEPASTE REDES
Nie PAJA, of die voorgestelde regulasies omskryf die begrip “voldoende/gepaste redes op
skrif”, soos bepaal in Artikel 5(2) van die Wet nie. Daar is derhalwe nie ʼn voorgeskrewe
standaard, waaraan voldoen moet word nie. Voldoening aan enige standaard sal derhalwe
bepaal moet word aan die hand van verskillende aspekte. Dit sal met ander woorde van
saak tot saak verskil. Sekere standaarde sal wel gestel moet word, om eenvormigheid te
verseker.
Daar sal moet vasgestel word uit wie se oogpunt die begrip “voldoende” na waarde geskat
word en op grond van welke doeleindes daar bepaal kan word wat “voldoende” is. Daar
kan voorgestel word dat dit bepaal moet word deur verwysing na die doel van die
redegewende vereistes. Redes sal dus voldoende wees, indien dit die vereistes gestel
deur PAJA en die Grondwet nakom, wat bepaal dat die doel vir die verskaffing van redes
as verpligting bevorder sal word.