Tjaart Jurgens Maré Doctor Legum Universiteit van die Vrystaat

346
en die blatante uitsluiting daarvan in PAJA vernou die omvang van
administratiewe geregtigheid. Hierdie uitsluiting moet so ver as moontlik
beperkend uitgelê word. Terwyl die beraadslagingsproses van hierdie
kommissie beskerm moet word en onderhewig gestel word aan die
beveiliging van legaliteit soos verskaf in die Grondwet, moet ander handelinge
van die kommissie wel onderhewig gestel word aan die reg tot
administratiewe geregtigheid.
Indien die uitsluiting slegs van toepassing is op die aanstelling van regters,
kan daarmee saamgeleef word. Besluite van die Regterlike
Dienstekommissie, ingevolge Artikel 177 van die Grondwet rakende die
gedrag en onvermoë van regters, sal sekerlik aan PAJA onderhewig wees.
4.8.8 ʼn BESLUIT GENEEM, OF VERSUIM OM ʼn BESLUIT TE NEEM,
KRAGTENS ʼn BEPALING VAN DIE PROMOTION OF ACCESS TO
INFORMATION ACT, 2000 (WET NO 2 VAN 2000)
Hierdie uitsluiting spreek egter vanself. Besluite ingevolge die Promotion of
Access to Information Act geneem, is nie ingevolge PAJA hersienbaar nie.
Dié Wet bevat sy eie hersieningsmeganismes, vereistes vir die verskaffing
van redes en prosedures vir die oorweging van besluite om inligting te
verskaf. Besluite ingevolge hierdie Wet geneem, moet voldoen aan
regmatigheid, redelikheid en prosedurele billikheid en hoef dus ingevolge
PAJA nie hersienbaar te wees nie.
Daar word ingevolge Artikel 32 van die Grondwet apart gehandel met die
verskaffing van inligting. Die Wet kan onafhanklik staan, en die
hersienbaarheid van besluite, soos PAJA, hanteer.
4.8.9 ʼn BESLUIT GENEEM, OF VERSUIM OM ʼn BESLUIT TE NEEM
KRAGTENS ARTIKEL 4(1) VAN DIE WET (PAJA)
Artikel 4(1) van PAJA gee aan amptenary ʼn diskresie om te besluit welke
prosedure gevolg moet word, wanneer ʼn besluit geneem word wat nadelig vir
die publiek mag wees. Hierdie uitsluiting is gemik om hersienings van die
besluite oor prosedures te beperk.
Die uitsluiting van Artikel 4(1) van PAJA se definisie van administratiewe
handeling vrywaar nie die amptenary van die grondwetlike verpligting wat
hulle opgelê word om wel ʼn besluit te neem welke prosedure gevolg gaan
word nie. Die uitsluiting beteken slegs dat daar nie ʼn hersieningsremedie
beskikbaar is deur PAJA aan verontriefde partye ingevolge besluite geneem
in terme van Artikel 4(1) nie, of om aan hulle redes vir sodanige besluite te
verskaf nie.