Tjaart Jurgens Maré Doctor Legum Universiteit van die Vrystaat

Hoofstuk 2
ADMINISTRATIEWE GEREGTIGHEID EN ADMINISTRATIEWE
OPTREDE
300
Administratiewe optrede (“administrative action”) kan beskou word as die sleutel tot die bepaling
van die bestek van die Wet op die Bevordering van Administratiewe Geregtigheid. Hierdie aspek
kom weer eens voor in beide die Finale-Grondwet en die Wet op die Bevordering van
Administratiewe Geregtigheid. Daarom sou dit goed wees om oor dié definisies duidelikheid te
verkry.
Die opskrif van Artikel 33 verwys eerstens na “regverdige” administratiewe optrede, en nie slegs
na administratiewe optrede nie.
1. ARTIKEL 33 : REGVERDIGE ADMINISTRATIEWE OPTREDE
“33(1) Elkeen het die reg op administratiewe optrede wat regmatig, redelik en
prosedureel billik is.
33(2) Elkeen wie se regte nadelig geraak is deur administratiewe optrede het die reg
op die verskaffing van skriftelike redes.”
Dit is verder insiggewend dat die wetgewer geen definisie van die term “administratiewe
optrede” in Artikel 239 (Woordomskrywing) van die Grondwet gee nie. “Staatsorgaan”
word wel omskryf.
Die definisie vir administratiewe optrede in die Wet op die Bevordering van Administratiewe
Geregtigheid, is egter hoogs gekompliseerd. Dit omskryf eerstens nie net wat onder
administratiewe optrede verstaan word nie, maar sluit ook ʼn hele aantal handelinge uit wat
nie as administratiewe optrede beskou kan word nie.
Artikel 1 van die Wet op die Bevordering van Administratiewe Geregtigheid 3 of 2000
bepaal soos volg :
“(i) ‘Administrative Action’ means any decision taken, or any failure to take a
decision, by -
(a) an organ of state; when -
(i) exercising a power in terms of the Constitution or a provincial
constitution; or
(ii) exercising a public power or performing a public function in terms
of any legislation; or
(b) a natural or juristic person, other than an organ of state, when
exercising a public power or performing a public function in terms of an