inhoudsopgawe

TABLETVEREISTES EN
-EIENSKAPPE
LEEREENHEID 4
Dit behoort jou ongeveer 2 ure te neem om hierdie leergedeelte te voltooi en die
uitkomste te bereik.
Na voltooiing van hierdie leergedeelte moet jy in staat wees om:
1. Die eienskappe van die ideale tablet te kan noem of motiveer.
2. Die amptelike toetse op tablette (soos die farmakopëe vereis) te kan noem en die doel van
elke toets te kan motiveer
3. Die farmakopëe (BP/USP) te kan gebruik om die amptelike kriteria vir elke toets te kan vind
(en vir tablette met „n spesifieke geneesmiddel).
Geen tablet bestaan uit slegs geneesmiddel (aktiewe bestanddeel) nie, maar bevat ook ander
inerte stowwe (d.i. stowwe met geen farmakologiese effek opsig self nie), bekend as hulpstowwe.
Tablette bestaan hoofsaaklik uit (i) mengsels van verskillende poeiers of (ii) granules (afhangende
van die vervaardigingsmetode) wat saamgepers word om ʼn kompak te vorm. Hierdie mengsels of
granulaat bestaan op hul beurt weer uit poeiers van die verskillende komponente van die
tabletformules (die aktiewe bestanddeel en verskillende tablethulpstowwe). Dit is dus belangrik om
te besef dat die eienskappe van tablette dikwels bepaal word deur die eienskappe van die primêre
komponente (poeiers) waaruit die tablette bestaan. Tablette moet (i) aan bepaalde spesifikasies
voldoen en (ii) oor bepaalde kenmerkende eienskappe beskik.
69