inhoudsopgawe

ALGEMENE INLIGTING
Ek hoop van harte dat jy hierdie module besonder interessant, leersaam en van besondere waarde sal
vind en dat die kennis, insig, vaardighede en ervaring wat jy hierin gaan opdoen eendag van jou ʼn
uiters bekwame en unieke lid van die gesondheidspan sal maak wat ‟n besondere bydrae tot
gesondheidsorg in Suid-Afrika lewer, ongeag in watter area van die aptekersprofessie jy jou ook al
gaan vestig.
SAMESTELLING VAN DIE MODULE
Die module is saamgestel uit (i) bepaalde basiese beginsels van produkontwikkeling wat vir alle
doseervorme geld en (ii) die ontwerp, formulering, vervaardiging en evaluering van orale vaste
doseervorme.
Die term produkontwikkeling impliseer al die prosesse betrokke by die verwerking van geneesmiddels
tot medisyne, en sluit in preformulering, formulering, vervaardiging, evaluering (insluitend
stabiliteitstoetsing), verpakking en die definiëring van die korrekte bewarings- en gebruiksaanwysings.
Die kennis, ervaring, insig en vaardighede wat jy hier opdoen, sal jou help met die ontwerp en
ontwikkeling van al die doseervorme wat in hierdie module en volgende modules (FMSG321,
FMSG411 en FMSG422) bestudeer gaan word.
PLEK VAN HIERDIE MODULE IN DIE PROGRAM
Kennis oor medisyne is een van die vereistes en basiese, onderskeidende kenmerke van die apteker.
Hierdie kennis behels nie net advieslewering oor die korrekte gebruiks- en bewaringsaanwysings van
medisyne nie, maar ook kennis en vaardighede oor die samestelling (formulering), vervaardiging en
kwaliteit van medisyne ten einde die pasiënt te kan verseker van die effektiwiteit en veiligheid van die
medikasie en om die korrekte keuse te kan maak van die beste produk vir die behandeling van ʼn
bepaalde siektetoestand om sodoende die optimale uitkoms van geneesmiddelterapie te help
verseker.
Ten einde jou in staat te stel om as bewaker op te tree oor die gehalte, effektiwiteit, betroubaarheid en
veiligheid van medisyne, asook om as ingeligte en bekwame adviseur op te tree oor die korrekte
keuse, bewaring en gebruik van medisyne, en om jou te help om medeverantwoordelikheid te aanvaar
vir die korrekte en optimale uitkoms van geneesmiddelterapie, neem hierdie module jou eerstens op
die pad deur die totale ontwikkelingsproses van medisyne, vanaf die geneesmiddel tot die uiteindelike
produk.
Vervolgens fokus die uitkomste van hierdie module op die ontwerp, ontwikkeling (formulering,
vervaardiging en toetsing) en korrekte gebruiks- en bewaringsaanwysings van die mees algemene
tipe doseervorm, naamlik orale vaste doseervorme.
Hierdie module bou op voorafgaande modules waarin jy kennis gemaak het met toepaslike
farmaseutiese berekeninge (FCAG121) en die basiese fisies-chemiese beginsels van Farmaseutika in
toebereiding en reseptering van medisyne (FMSG211) en biofarmaseutika en farmakokinetika
(FMSG222) waarin jy geleer het van die absorpsie van geneesmiddels, die bepaling van die snelheid
en mate van geneesmiddelabsorpsie en faktore wat geneesmiddelabsorpsie beïnvloed.
vi