inhoudsopgawe

ALGEMENE INLIGTING
FMSG 311
Farmaseutiese doseervorme en Tegnologie I
(‘n 16 kredietmodule wat ongeveer 160 studie-ure in beslag sal neem)
VERWELKOMING
Baie welkom by module FMSG 311 (Farmaseutiese doseervorme en tegnologie I). Met hierdie
module betree jy die wêreld van medisynevervaardiging. Die vervaardiging van medisyne is ʼn hoogs-
gespesialiseerde en unieke veld in farmasie en met die voltooiing van hierdie module sluit jy aan by ʼn
uitgelese groep persone met kennis en vaardighede van die ontwikkeling van medisyne. Dit is dié één
aspek wat jou, die apteker, onderskei van alle ander lede van die gesondheidsprofessies met
betrekking tot kennis oor die inhoud (samestelling), maak (vervaardiging), toetsing (evaluering) en
toebereiding (reseptering) van medisyne en die korrekte hantering (gebruik) en bewaring (berging)
daarvan.
Die Suid-Afrikaanse Aptekersraad, wat die riglyne neerlê vir aptekersopleiding in Suid-Afrika, het 8
eenheidstandaarde daargestel waarin die bevoegdhede (“competencies”) wat van alle
intreevlakaptekers (dus na voltooiing van ʼn aptekersgraad) vereis word, aangedui word. Hierdie
eenheidstandaarde omvat alle aspekte van belang vir die opleiding van aptekers. Eenheidstandaard
1 vereis kennis, vaardighede en vermoëns van intreevlakaptekers rakende die organisasie en beheer
oor die vervaardiging, toebereiding en verpakking van farmaseutiese produkte of te wel medisyne. In
eenheidstandaard 1 word die volgende kennis van intreevlakaptekers vereis:
Die eienskappe van bestanddele wat gebruik word in produkvervaardiging;
Vervaardigingsmetodes vir medisyne en apparate wat tydens vervaardiging gebruik word;
Die wetlike aspekte betrokke by die registrasie, kliniese toetsing, bewaring en verspreiding van
medisyne;
Logistiese aspekte rakende die verkryging, bewaring en verspreiding van grondstowwe,
komponente en klaarvervaardigde produkte;
Verpakking van finale produkte, insluitend stabiliteitseienskappe en bewaringsvereistes;
Begrip van die beginsels van goeie bestuur met betrekking tot die vervaardiging, toebereiding,
verpakking en verspreiding van medisyne ten einde ‟n omvattende, etiese en koste-effektiewe
farmaseutiese diens aan die publiek/gemeenskap te verseker.
In hierdie module gaan jy dus kennis maak met die basiese beginsels van produkontwikkeling van
konsep (die geneesmiddel) tot realiteit (die eindproduk of medisyne). Jy gaan kennis opdoen oor die
produkontwikkelingsproses (van enige tipe medisyne in die algemeen en van orale vaste doseervorme
spesifiek) en jy gaan die geleentheid kry om (in groepsverband) medisyne (tablette spesifiek) te
ontwerp, te formuleer, te vervaardig en te toets. Jy gaan sien hoe ‟n tabletpers werk en self jou hand
daaraan waag, jy gaan sien hoe suksesvol jou formulerings- en vervaardigingspoging(s) was deur jou
produk aan al die toetse, wat in die industrie uitgevoer word, te onderwerp en jy gaan (hopelik) besef
hoe belangrik jou kennis, insig en vaardighede is in die lewering van ‟n hoogs-professionele diens
(binne die totale gesondheidspan) aan die bevolking van Suid-Afrika.
v